ފުރާނައަށް ނުރައްކާވާ ވަރުގެ ވިހަގަދަ ބޮއްޔެއް ކަމަށްވާ "ކޯން ސްނެއިލް" ރަސްފަންނުން ފެންނާތީ އެކަމަށް ސަމާލުވުމަށް ކަނޑުގެ ދިރުންތަކާ ގުޅޭ ގޮތުން މަސައްކަތްކުރާ "އޯޝަންހޯލިކް މޯލްޑިވްސް" އިން އެދިއްޖެ އެވެ.
އޯޝަންހޯލިކް މޯލްޑިވްސް އިން ބުނި ގޮތުގައި މި ބޮއްޔަކީ ރާއްޖެއިން ކުރިންވެސް ފެންނަ ބޮއްޔެކެވެ.
ބޮލީގެ ވައްތަރާއި ސައިޒަށް ބަލާފައި މިއީ ވަރަށް ވިހަގަދަ އަދި ފުރާނައަށްވެސް ނުރައްކާތެރި އެއްޗަކަށް ވެދާނެ ކަމަށް އެ ޖަމިއްޔާއިން ބުންޏެވެ.
މި ބޮލި އާންމުކޮށް ތިލަވަނީ ރޭގަނޑުކަން ފާހަކޮށް ހަވީރާއި ރޭނގަޑު މޫދަށް އެރޭއިރު ސަމާލުވުމަށް އޯޝަންހޯލިކް މޯލްޑިވްސް އިން ވަނީ އިލްތިމާސްކޮށްފަ އެވެ.
މޫދަށް އެރި އުޅޭއިރު ހާއްސަކޮށް ކުޑަކުދިން ބޫޓަށް އެރުމަށާއި ވިލުގައި ހުސްފަޔާ ނޫޅުމަށް އެ ޖަމިއްޔާއިން ވަނީ އެދިފަ އެވެ.