އޮންލައިން ވިޔަފާރި ކުރާ ކަމަށް ބުނާ މީހެއްގެ ޖިންސާއި ހަށިގަނޑާ ދޭތެރެއަށް ޖަހާފައި ހުރި މަރުތެޔޮ އެއް ފުލުހުން ހޯދައިފި އެވެ.
މިއީ، އުމުރުން 23 އަހަރުގެ މީހެއްގެ މައްސަލަ އެކެވެ.
މި މީހާ ބަންދުގައި ބެހެއްޓުމަށްފަހު މިހާރު ބަންދުން ދޫކޮށްލާފައިވަނީ އޭނާ އަކީ މުޖުމަތައަށް ނުރައްކަލެއް ނެތް މީހެއް ކަމަށް މިވަގުތަށް ބަލާފަ އެވެ.
އޭނާގެ ބަންދު އަމުރު ރިޕޯޓުން އެނގޭ ގޮތުގައި އޭނާ ދޫކޮށްލާފައިވަނީ ޝަރުތުކުރުމަށް ފަހު އެވެ.
މި މީހާގެ މައްޗަށް ފުލުހުން ކުރަނީ މާރާމާރީ ހިންގަން އުޅުމާއި އާއްމު ތަނެއްގައި މަގުބޫލު ސަބަބެއް ނެތި ނުރައްކާތެރި ހަތިޔާރު ގެންގުޅުމުގެ ކުށުގެ ތުހުމަތެވެ. ކުރިންވެސް ބަންދު ރެކޯޑް އޮތް މި މީހާއާ ގޭންގަކާ ގުޅުމެއް އޮތް ކަމެއް ފުލުހުންނަކަށް އެނގިފައެއް ނުވެ އެވެ.
މި މީހާގެ ބަންދު އަމުރުން އެނގޭ ގޮތުގައި މި މީހާ ގެންގުޅުނު މަރުތެޔޮ އަކީ އޭނާ ދިރިއުޅޭ އެޕާޓްމެންޓްގެ ބިއްލޫރު ދޮރު ތަޅައިގެން ދިއުމުން އެތަނުގައި ފިލާގަނޑެއް ހަރުކުރަން ގެންގުޅުނު މަރުތޭލަ އެކެވެ.
އޭނާގެ ޖިންސާއި ހަށިގަނޑާ ދެ މެދަށް މަރުތެޔޮ ޖަހާފައިވަނީ އޭނާގެ ސައިކަލުގެ މަޑި ދަށަށް އެ މަރުތޭލަ ނުލެވޭތީ ކަމަށްވެ އެވެ.