އއ. ތޮއްޑޫގައި ޑޮލަރު އޭޓީއެމްއެއް ގާއިމުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ތޮއްޑޫ ރައްޔިތުންނާ ބައްދަލުކުރައްވާ ރައީސް މުއިއްޒު ވަނީ އެ ރަށަކީ ލޯކަލް ޓޫރިޒަމް ވަރަށް ބޮޑަށް ހިނގާ އަދި އެ ވިޔަފާރި ފުޅާވަމުންދާ ރަށެއްކަން ފާހަގަކުރައްވާފަ އެވެ.
އެ ގޮތުން އެ ރަށުގައި 50 އެއްހާ ގެސްޓްހައުސް ހުރިއިރު ގާތްގަނޑަކަށް 40 ގެސްޓްހައުސްގެ މަޝްރޫއު މިހާރުވެސް ކުރިއަށްދާ ކަމަށް ރައީސް ވިދާޅުވި އެވެ.
ރައީސް މުއިއްޒު ވިދާޅުވީ އެ މަޝްރޫއުތަކާއެކު ކުރިއަށް އޮތް ދެ އަހަރުގެ ތެރޭގައި 3،000 ޓޫރިސްޓުން ގެނެވޭނެ ލޯކަލް ޓޫރިޒަމް އިންޑަސްޓްރީއެއް އެ ރަށުގައި އުފެދޭނެ ކަމަށެވެ.
"(މިރަށަކީ) ޑޮލަރުގެ އާމްދަނީ ވަރަށް ބޮޑަށް ލިބޭ ރަށެއްވީމަ ޑޮލަރުގެ އޭޓީއެމްއެއް ގާއިމުކޮށްދޭނަން،" ރައީސް މުއިއްޒު ވިދާޅުވި އެވެ.
ތޮއްޑޫގައި ޑޮލަރު އޭޓީއެމްއެއް ގާއިމުކުރައްވާނެ ކަމަށް ރައީސް ވިދާޅުވިއިރު މާލޭގެ އިތުރުން މިވަގުތު ޑޮލަރު އޭޓީއެމްއެއް ހުރީ ކ. މާފުށީގަ އެވެ.
ތޮއްޑޫ ރައްޔިތުންނާ ބައްދަލުކުރައްވާ ރައީސް މުއިއްޒު ވަނީ އެރަށަކީ ދަނޑުވެރި ރަށަކަށްވާތީ ޓޫރިޒަމް ޑައިވަސިފައިކުރަން އެދިވަޑައިގެންފަ އެވެ.
ރައީސް މުއިއްޒު ވަނީ ތޮއްޑޫގެ މަގުތައް ރަނގަޅު ފެންވަރަށް ތަރައްގީކުރުމުގެ މަޝްރޫއު އަންނަ އަހަރު ފައްޓަވާނެ ކަމަށާއި އެ މަޝްރޫއުގައި ސޮއިކޮށްފައިވާ ކަމަށް ވިދާޅުވެފަ އެވެ.
މީގެ އިތުރުން އަންނަ އަހަރު ތޮއްޑޫ ސްކޫލާއި ސިއްހީ މަރުކަރުގެ ޖާގަ ބޮޑުކުރުމުގެ މަޝްރޫއު ކުރިއަށް ގެންދަވާނެ ކަމަށް ރައީސް ވިދާޅުވި އެވެ.