ހއ. ހޯރަފުށީ ޕޮލިސް ސްޓޭޝަނަށް ގެންދިޔަ މީހާއަށް ފުލުހުންގެ ބަންދުގައި ހުރިއިރު އަނިޔާކުރިކަމުގެ އެއްވެސް ޝަކުވާއެއް މިހާތަނަށް ލިބިފައިނުވާ ކަމަށް ފުލުހުން ބުނެފި އެވެ.
ފުލުހުން މިހެން ބުނީ ހޯރަފުށީ ޕޮލިސް ސްޓޭޝަނަށް ގެންދިޔަ މީހަކަށް ފުލުހުން ޖިސްމާނީ އަދި ނަފުސާނީ ގޮތުން އަނިޔާކުރި ކަމަށް ބުނެ ދެކެވޭ ވާހަކަތައް ރައްދު ދެމުންނެވެ.
ފުލުހުން ބުނި ގޮތުގައި އުމުރުން 30 އަހަރުގެ އެމީހާއަކީ މަސްތުގެ ހާލަތުގައި ހުރެ ފުލުހަކަށް އިންޒާރުދީ، ބިރުދައްކައި، ހަޑި ހުތުރު ބަހުން މުއާމަލާތް ކުރުމުގެ ތުހުމަތުގައި ހައްޔަރުކުރި މީހެކެވެ.
އޭނާ ފުލުހުންގެ ބެލުމުގެ ދަށަށް ގެންދިޔައީ މިދިޔަ މަހުގެ 27 ވަނަ ދުވަހުގެ ރޭ ހޯރަފުށިންނެވެ. އޭނާގެ ބަންދާމެދު ގޮތެއް ނިންމުމަށް ނޮވެމްބަރު 28 ވަނަ ދުވަހު ކޯޓަށް ހާޒިރުކުރުމުން ކޯޓުން ޝަރުތުކުރުމަށްފަހު އޭނާ ދޫކޮށްލި ކަމަށް ފުލުހުން ބުންޏެވެ.
"މި މައްސަލައާ ގުޅިގެން ހައްޔަރުކުރި މީހާއަށް ފުލުހުންގެ ބަންދުގައި ހުރިއިރު އަނިޔާކުރިކަމުގެ އެއްވެސް ޝަކުވާއެއް ފުލުހުންނަށް މިހާތަނަށް ލިބިފައެއް ނުވޭ،" ފުލުހުން ބުނެފައިވެ އެވެ.
އެފަދަ ޝަކުވާއެއް އޮތް ނަމަ އޮންނަ އުސޫލުގެ ތެރެއިން ހުށަހަޅައިގެން ބެލުން އެއީ ބާރު އަޅާ ކަމެއް ކަމަށާއި އެފަދަ ތަހުގީގުތަކަށް ފުރިހަމަ އެއްބާރުލުން ދޭނެ ކަމަށްވެސް ފުލުހުން ބުންޏެވެ.