ސަރުކާރު ވައްޓާލަން ނިކުތުމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފު ޒާކިރު ގޮވާލައިފި އެވެ.
އެމްޑީޕީން ރޭ ކާނިވާ ސަރަހައްދުގައި ބޭއްވި ޖަލްސާގައި މައުރޫފު ވިދާޅުވީ ވެރިކަމުގައި ހުރި މީހަކީ ދޮގުވެރިޔެއް ކަމަށް ރައްޔިތުން ނިންމުމުން އެ ވެރިއަކު ވެރިކަމުން ބާލަންޖެހޭ ކަމަށެވެ.
މައުރޫފު ވިދާޅުވީ ރާއްޖޭގައި އިންޑިއާގެ 2،000 ސިފައިން ތިބި ކަމަށް ވިދާޅުވެ ރައީސް މުއިއްޒު ރައްޔިތުންނަށް އޮޅުވާލެއްވި ކަމަށެވެ.
ރާއްޖޭގެ ދެކުނުން ގެއްލުނު ކަމަށް ބުނާ ކަނޑުގެ ސަރަހައްދު ވެރިކަމުގެ ފުރަތަމަ 100 ދުވަހުގެ ތެރޭގައި ހޯއްދަވާނެ ކަމަށް ވިދާޅުވެ ރައީސް މުއިއްޒު އޮޅުވާލެއްވި ކަމަށާއި ގޯތިތައް ހަވާލުކުރާނެ ކަމަށް ވިދާޅުވެ އޮޅުވާލެއްވި ކަމަށެވެ.
އެއަށްފަހު މައުރޫފު ވަނީ އެތަނަށް އެއްވެ ތިބި އާންމުންގެ އަރިހުން ރައީސް މުއިއްޒު އަކީ ދޮގުވެރިޔެއްތޯ އައްސަވާފަ އެވެ.
"ދެން އަޅުގަނޑުމެން ކުރަން ޖެހޭ ކަމަކީ އެއީ ދޮގުވެރިޔެއް ކަމަށް ރައްޔިތުން ނިންމީމާ އޭނާ ވެރިކަމުން ބާލަންޖެހޭނީ،" މައުރޫފު ވިދާޅުވި އެވެ.
މައުރޫފު ވިދާޅުވީ ގައުމުތަކުގައި އިންތިހާބުތަކުގައި ވެރިކަން ބަދަލުކުރުމަކީ އޮންނަ ނިޒާމެއް ކަމަށާއި ނަމަވެސް ދައުރު ހަމަނުވަނީސް ވެރިކަން ބަދަލުކުރުމަކީވެސް އޮންނަ ގޮތެއް ކަމަށެވެ.
އެގޮތުން ސީރިޔާ އާއި ސްރިލަންކާ އަދި ބަންގްލަދޭޝްގައި ވެރިކަން ބަދަލުކުރި ގޮތުން މިސާލު ނަންގަވާ މައުރޫފު ވިދާޅުވީ ރައްޔިތުން ތިބީ ގަދަކޮށް ކަމަށެވެ.
"މިރާއްޖޭގައިވެސް ދައުރު ހަމަވާކަށް ނުޖެހޭ. ގާނޫނުއަސާސީ ފުނޑާލީމާ ރައްޔިތުން ނުކުމެ ވެރިކަން ވައްޓާލަން ޖެހޭ. ބަދަލުކުރަން ޖެހޭ. ނުކުންނަންވީ،" އޭނާ ވިދާޅުވި އެވެ.
މައުރޫފު ވަނީ ދިގު ދެމިގެންވާ މުޒާހަރާއެއް އެބަ އޮތް ކަމަށް ވިދާޅުވެ އެކަމަށް ތައްޔާރުވުމަށް ގޮވާލާފަ އެވެ.