އެއްގަމު އަދި ކަނޑު އުޅަނދުތަކުގެ އަހަރީ ފީ އާއި އެ ފީ ނުދެއްކުމުން އަރާފައިވާ ޖޫރިމަނާތައް ބަހާލައިގެން ދެއްކޭ ގޮތް ހަމަޖައްސައިފި އެވެ.
ޓްރާންސްޕޯޓް މިނިސްޓްރީން ގެޒެޓްކޮށްފައިވާ "އެއްގަމު އުޅަނދާއި ކަނޑު އުޅަނދުފަހަރާ ގުޅޭގޮތުން ދައްކަންޖެހޭ އަހަރީފީއާއި ޖޫރިމަނާގެ ފައިސާ ބަހައިލައިގެން ދެއްކުމުގެ ގަވާއިދުގައި ވަނީ ފައިސާ އެކީ އެއް ފަހަރާ ދައްކަން ދަތިވާ މީހުންނަށް ލުއިތަކެއް ދީފަ އެވެ.
ގަވާއިދުގައި ވަނީ އަހަރީ ފީ އާއި ޖޫރިމަނާ ބަހާލައިގެން ދައްކަން ފުރުސަތު ދެވޭނެ ފަސް ޝަރުތެއް ބަޔާންކޮށްފަ އެވެ.
ބަހާލައިގެން ފައިސާ ދައްކަން ފުރުސަތު ދެވޭނެ ޝަރުތުތައް
- ދައްކަން ޖެހި ނުދައްކާ ހުރި ފައިސާގެ އަދަދު 10،000ރ. އަށް ވުރެ އިތުރުވެފައިވުން،
- އެ ފައިސާއަކީ ފައިސާ ދެއްކުމުގެ ސުންގަޑި ފާއިތުވެފައިވާ ފައިސާއަކަށްވުން،
- ގަވާއިދުގެ ދަށުން ފައިސާ ބަހާލައިގެން ދެއްކުމަށް ހުށަހެޅުން،
- މީގެކުރިން ބަހާލައިގެން ފައިސާ ދެއްކުމުގެ ފުރުސަތު ދީފައިވާ މީހަކަށް ނުވުން،
- އެދޭ ފަރާތަކީ އުޅަނދުގެ ވެރިފަރާތް ކަމުގައިވުން.
ބަހާލައިގެން ޖޫރިމަނާގެ ފައިސާ ދައްކަން ފުރުސަތު ދޭނީ ކޮމިޓްމަންޓް ފީއެއް ދެއްކުމުން ކަމަށް ގަވާއިދުގައި ބުނެފައިވެ އެވެ.
އަހަރީ ފީ އާއި ޖޫރިމަނާގެ ގޮތުގައި ދައްކަންޖެހޭ އަދަދަށް ބަލައި 10 މަސް ދުވަހާއި 42 މަސް ދުވަހުގެ މުއްދަތެއް އެ ފައިސާ ދެއްކުމަށް ލިބެ އެވެ.