ސައިކަލެއްގައި ދިޔަ އަންހެނެއްގެ ކަރުގައި އޮތް ފަށް ޖަހައިގަތް މައްސަލައިގައި އިއްޔެގެ ވަގުތެއްގައި ހައްޔަރު ކުރި މީހަކީ، ކުރިންވެސް މަގުމަތިން އަންހެނެއްގެ އަތުން ފޭރިގެން މައްސަލައެއްގައި ހުކުމެއްވެސް އިއްވާފައިވާ މީހެއްކަން އެނގިއްޖެ އެވެ.
މާލޭގެ އަލިކިލެގެފާނު މަގުގައި މިދިޔަ ބުރާސްފަތި ދުވަހުގެ މެންދުރުފަހުގެ ވަގުތެއްގައި ހިންގި ފޭރުމުގެ މިއަމަލާ ގުޅިގެން ހައްޔަރުކޮށްފައިވަނީ ވިލިމާލޭ، ފިޔަބަރި، ހަސަން އިސާމް (30 އ) އެވެ.
އިސާމު ހައްޔަރުކުރީ އިއްޔެ ހިނގި މި ހާދިސާގެ ވީޑިއޯ ސޯޝަލް މީޑިއާގައި އާންމުވުމާ ގުޅިގެން ފުލުހުން ކުރި ތަހުގީގަކަށް ފަހު އެވެ.
ފުލުހުން ބުނީ އެ މީހާ ދުއްވި ސައިކަލް ވެސް މިހާރު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.
ފުލުހުންގެ ރެކޯޑްތަކުން ދައްކާ ގޮތުގައި އިސާމްއަކީ، ކުރިންވެސް ސައިކަލެއްގައި މަގުމަތިން ދިޔަ އަންހެނެއްގެ އަތުން ފޭރުމުގެ މައްސަލައެއްގައި ހުކުމެއް އިއްވާފައިވާ މީހެކެވެ. އެގޮތުން އިސާމް އަދި އެހެން މީހަކާ ދެ މީހުން ވެގެން އަންހެނެއްގެ ވޮލެޓް ފޭރިގަތީ ކަލާފާނު ސްކޫލު ކައިރިން އަންހެން މީހާ ދަނިކޮށެވެ.