ޕީޕަލްސް ނޭޝަނަލް ކޮންގްރެސް (ޕީއެންސީ) އިން އިލެކްޝަންސް ކޮމިޝަން (އީސީ) އަށް ހުށަހެޅި ފޯމުތަކުގެ ތެރޭގައި ސައްނަ ނޫން ފޯމުތަކެއް ހުށަހެޅިފައިވާކަން ފާހަގަކުރެވިފައިވާ ކަމަށް އެ ޕާޓީން ބުނެފި އެވެ.
ޕީއެންސީ އިން ނެރުނު ނޫސްބަޔާނެއްގައި ބުނީ އެ ޕާޓީއަށް މެންބަރުން އިތުރުކުރުމަށް މުޅި ރާއްޖެއަށް ހުޅުވާލައިގެން ކުރިއަށް ގެންދިޔަ "މެންބަޝިޕް ޑްރައިވް" ގައި ޕާޓީއަށް ހުށަހެޅުނު އެތައްހާސް ފޯމެއް އީސީއަށް ހުށަހަޅާފައި ވަނިކޮށް މަދުން ނަމަވެސް ސައްހަ ނޫން ފޯމުތަކެއް ހުށަހެޅިފައިވާކަން ފާހަގަކުރެވިފައިވާ ކަމަށެވެ.
ޕީއެންސީ އިން ބުނީ ޕާޓީއަށް ލިބޭ ފޯމުތަކުގެ ސައްހަކަން ކަށަވަރުކުރުމުގެ ގާބިލުކަން ޕާޓީގައި ނެތް ކަމަށެވެ.
"ޕާޓީއަށް ލިބޭ ފޯމުތަކުގެ ސައްހަކަން ކަށަވަރު ކުރުމުގެ ގާބިލުކަން ޕާޓީގައި ނެތުމުގެ ނަތީޖާއަކީ ފޯމެއްގެ ސައްހަކަމާއިމެދު ސުވާލެއް އުފެދޭ ހިސާބަކީ އިލެކްޝަންސް ކޮމިޝަނަށް ފޯމު ހުށަހެޅުމުގެ ފަހުގެ މަރުހަލާއެއް ކަމުގައި ވުމެވެ،" ޕީއެންސީގެ ބަޔާނުގައި ބުނެފައިވެ އެވެ.
ޕީއެންސީ އިން ވަނީ ގިނަ ޕާޓީ އެކުލެޥޭ ވާދަވެރި ސިޔާސީ މާހައުލެއް ރާއްޖޭގައި ވުޖޫދު ކުރެވުނު ހިސާބުން ފެށިގެން މިއަދާއި ހަމައަށްވެސް ރާއްޖޭގައި ވަސީލަތްތައް ހުރި ގޮތުން މިކަމަކީ އެ ޕާޓީއަށް އެކަނ އޮތް ގޮންޖެހުމެއް ނޫންކަން ފާހަގަކޮށްފަ އެވެ.
ސައްހަ ނޫން ފޯމުތަކެއް ޕީއެންސީގެ ނަމުގައި އީސީއަށް ހުށަހަޅާފައިވާ ކަމަށް ބަޔާޏްކޮށް އީސީ އާއި ފުުހުންނަށް ޝަކުވާތަކެއް ލޮގް ކޮށްފައިވާތީ އެ ދެ މުއަައްސަސާއިން ވެސް އެ މައްސަލަތައް ބަލަމުން ގެންދާކަން އަންގާފައިވާ ކަމަށް ޕީއެންސީން ވަނީ ބުނެފަ އެވެ.
އެ ދެ މުއައްސަސާއަށް މިކަން ބެލުމުގައި ފުރިހަމަ އެއްބާރުލުން ޕާޓީން ދެމުން ގެންދާނެ ކަމަށްވެސް ޕީއެންސީން ބުނެފައިވެ އެވެ.
ޕީއެންސީ އިން ބުނީ ސައްހަ ނޫން ފޯމުތަކެއްގެ މުގާބިލުގައި ޕާޓީއަށް މެންބަރުން އިތުރުކޮށް ރައްޔިތުންގެ ހައްގުތަކެއް ގެއްލޭފަދަ ގޮތަކަށް އެއްވެސް ކަމެއް ކުރުމަކީ ޕާޓީގެ ރައީސް އަދި ލީޑަޝިޕުން އެއްވެސް ވަރަކަށް ބަލައިގަންނަ ނުވަތަ ހިތްވަރުދޭނެ ކަމެއް ނޫން ކަމަށެވެ.
ސައްހަ ނޫން ފޯމެއް މެދުވެރިކޮށް ޕާޓީއަށް ވެއްދުމުގެ އެއްވެސް މައްސަލައެއް ކުރިމަތިވެފައިވާނަމަ ޕާޓީއަށް މެއިލް ކުރުމަށްވެސް ޕީއެންސީ އިން ވަނީ އެދިފަ އެވެ.
ޕީއެންސީ އިން މިހެން ބުނެފައިވާއިރު ރައްޔިތުންގެ މަޖިލީހުގެ ވައިކަރަދޫ ދާއިރާގެ އެމްޑީޕީގެ މެންބަރު ހުސައިން ޒިޔާދު (ފިއްޓޭ)އަށް ނޭނގި އޭނާ ޕީއެންސީއަށް ވައްދާފައިވާ މައްސަލައެއް ވަނީ ފެންމަތިވެފަ އެވެ.
ފިއްޓޭ ޕީއެންސީއަށް ވައްދާފައިވަނީ ނިމިދިޔަ ރައްޔިތުންގެ މަޖިލީހުގެ އިންތިހާބުގައި އޭނާއާއި އެކު މަސައްކަތް ކުރި ވައިކަރަދޫ ދާއިރާގެ އެތައް ރައްޔިތަކާވެސް އެކު އެވެ.