އަނބިމީހާއަށް އަނިޔާ ކުރި ދިވެއްސަކު ކޯޓުން ދޫކޮށްލައިފި އެވެ.
ގެވެށި އަނިޔާގެ މި މައްސަލައާއި ގުޅިގެން ހައްޔަރުކޮށްފައިވަނީ އުމުރުން 32 އަހަރުގެ ދިވެހި ފިރިހެނެކެވެ.
އޭނާގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން އޭނާ މިއަދު ވަނީ ޝަރުތުތަކަކާއެކު ދޫކޮށްލާފަ އެވެ.
އޭނާގެ ބަންދު އަމުރުން އެނގޭ ގޮތުގައި ދެމަފިރިންގެ ދެމެދުގައި ޖެހުނު މައްސަލައެއްގައި އޭނާ ވަނީ އޭނާގެ އަނބި މީހާގެ ގައިގައި ޖަހާފަ އެވެ.
ގެވެށި އަނިޔާގެ މި މައްސަލައިގައި ހިމެނޭ މީހާގެ ދެ ދަރިން ތިބޭކަންވެސް ބަންދު ރިޕޯޓުން އެނގެ އެވެ.
ރެކޯޑްތަކުން ދައްކާ ގޮތުގައި 32 އަހަރުގެ މި މީހާއަކީ ކުރިން ޖަމާއަތް ހަދައިގެން މަގުމަތިން މީހެއްގެ ފޯނު ފޭރުނު މައްސަލައަކާ ގުޅިގެން ހުކުމެއް އިއްވާފައިވާ މީހެކެވެ. އާޓިފިޝަލް ބީޗްގެ ބެންޗެއް މަތީ އިށީނދެގެން އިން މީހެއް ގާތު ފޯނެއް ކޮށްލަށް ފޯނު ދޭން ބުނުމުން، އެ މީހާ ފޯނު ނުދިނުމުން، އެ ފޯނު ފޭރިގެންފައިވާ މައްސަލައާ ގުޅިގެން މި މީހާގެ މައްޗަށް ހަ މަސް ދުވަހުގެ ހުކުމެއް އިއްވާފައިވެ އެވެ.