ގައުމު ނުދަރާ ކުރިއަށް ދިއުމަކީ މި ސަރުކާރުގެ އެންމެ ބޮޑު ކާމިޔާބީ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
ދައުލަތުގެ މީޑީއާއަށް ދެއްވި އިންޓަވިއުއެއްގައި މިނިސްޓަރު ސައީދު ވިދާޅުވީ ރައީސް ޑރ. މުހައްމަދު މުއިއްޒު ވެރިކަމާއި ހަވާލުވިއިރު އިގުތިސާދު އޮތީ ވަރަށް ދަތި އުނދަގުލެއްގައި ކަމަށެވެ.
އެ ހާލަތު ހަމަމަގަށް އަޅުވައި ގައުމު ނުދަރާ މިހާރު ކުރިއަށްދާ ކަމަށް މިނިސްޓަރު ސައީދު ވިދާޅުވި އެވެ. އަދި ރާއްޖެ އާއި ރާއްޖެއިން ބޭރުގެ ވިޔަފާރިތަކަށްވެސް ރާއްޖޭގެ އިގުތިސާދާމެދު އިތުބާރު އުފެދިފައިވާ ކަމަށް މިނިސްޓަރު ވިދާޅުވި އެވެ.
ވަގުތީ ގޮތުން ޓޫރިޒަމް މިނިސްޓްރީ ހިންގެވުމާއި ހަވާލުވެ ހުންނެވި ވަޒީރު ސައީދު ވިދާޅުވީ މި އަހަރުގެ ތެރޭގައި ހއ. އަތޮޅާއި ހދ. އަތޮޅުގައި ފަތުރުވެރިކަމުގެ އިތުރު އެނދުތައް ތަރައްގީކުރުމަކީ ސަރުކާރުގެ ވިސްނުމެއް ކަމަށެވެ.
މީގެ އިތުރުން މި އަހަރަށް ބަޖެޓުގައި ހިމަނާފައިވާ މަޝްރޫއުތަކާއި ބަޖެޓުގެ ބޭރުން އެކި ސިނާއަތްތަކުގައި މަޝްރޫއުތައް ކުރިއަށްދާނެ ކަމަށް މިނިސްޓަރު ސައީދު ވިދާޅުވި އެވެ.
