ރާއްޖޭގައި އަލަށް ތަންފީޒުކުރި މޮނިކޮން އަމުރާ ގުޅިގެން ފައިގައި ޓެގް އެޅުވި އެއްވެސް ގޭންގް މެންބަރަކު އަދި ގަވައިދާ ހިލާފު އެއްވެސް ކަމެއް ކޮށްފައި ނުވާ ކަމަށް ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ. -- މޮނިކޮން އަމުރު ނެރުނުތާ މިއަދަށް ވަނީ މަސް ދުވަސްވެފަ އެވެ. ޓެގް އަޅުވާފައި ވަނީ 14 މީހުންގެ ފައިގަ އެވެ.
އަވަސްއިން ކުރި ސުވާލަކަށް ޖަވާބު ދެއްވަމުން މިނިސްޓަރު އުމަރު ނަސީރު މިއަދު ވިދާޅުވީ، މޮނިކޮން އަމުރުގެ ދަށުން ޓެގް އެޅުވި އެއްވެސް މީހަކު ގަވައިދާ ހިލާފުވެފައި ނުވާ ކަމަށާއި ހުރިހާ މީހުން ވެސް ވަރަށް "ބަސްއަހާ" ކަމަށެވެ. އެ މީހުންގެ ފައިގައި ޓެގް އަޅުވާފައިވަނީ އެއް އަހަރު ދުވަހުގެ މުއްދަތަށެވެ.
މިނިސްޓަރު ވިދާޅުވީ، އެއް އަހަރު ނުވަނީސް ވެސް ޓެގް ނެއްޓިދާނެ ކަމަށާއި، އެއީ މިނިސްޓަރަށް ލިބިގެންވާ ބާރެއް ކަމަށެވެ. އަދި ގަވައިދާ ހިލާފަށް ކަމެއްކޮށްފިނަމަ ފިޔަވަޅު އަޅާނެ ކަމަށެވެ.
"ޓެގް ނައްޓާނީ މިނިސްޓަރަށް އެކަން ފެނުމުން، އެއް އަހަރު ނުވި ނަމަވެސް ޓެގް ނެއްޓިދާނެ، މިނިސްޓަރަށް ފެނުން ހަމަ އޮންނާނީ،" އުމަރު ވިދާޅުވި އެވެ.
މޮނިކޮން އަމުރު ހިންގާ މީހުންގެ ކަންކަން ބަލަހައްޓައި މޮނިޓާ ކުރެވޭނެ ހަރުދަނާ ނިޒާމެއް ފުލުހުންގެ މުއައްސަސާގައި ވަނީ ގައިމް ކޮށްފައެވެ. މިގޮތުން އެ މީހުންނަށް މި އަމުރުގެ ދަށުން ކަނޑައަޅާފައިވާ ކަންކަން ފުރިހަމަ ކުރުންމަތީ ދެމިތިބޭތޯ ބަލައި ދުވަހުން ދުވަހަށް އަދި ވަގުތުން ވަގުތަށް އެކަންކަން ބަލަހައްޓާނެ އެވެ.
ހައިކޯޓުން ނެރެފައިވާ މޮނިކޮން އަމުރުގައި މޮނީޓާކުރުމުގެ ގޮތުން ރޭގަނޑު 10:00 އާއި ހެނދުނު 6:00 އާއި ދެމެދު ގެއިން ބޭރަށް ނުދިއުމާއި، މިނިސްޓަރު އުމަރު ނަސީރުގެ ހުއްދަ ނެތި މާލެއިން ފުރައިގެން ނުދިއުން ހިމެނޭ އިރު އަމުރުގައި ކަނޑައަޅާފައިވާ ވަކި ސަރަހައްދުތަކަކަށް ނުދިއުމާއި، އެމީހުންގެ މާލީ މުއާމަލާތްތަކާއި މުދާ ކޮންޓްރޯލްކުރުމުގެ ގޮތުން ފިޔަވަޅު އެޅުމާއި، އެމީހުން މުއާސަލާތީ މުއާމަލާތްތައް ކޮންޓްރޯލްކުރުމާއި، ފުލުހުންގެ މަރުކަޒަށް ހާޒިރުވެ ސޮއިކުރުމާއި، އިލެކްޓްރޯނިކް އާލާތްތައް އެމީހުންގެ ހަށިގަނޑުގައި ނުވަތަ ދިރިއުޅޭތަނުގައި ހަރުކުރުމާއި އެމީހެއްގެ ފޮޓޯއާއި ދިރިއުޅޭ ތަންތަނުގެ ފޮޓޯއާއި އެމީހެއްގެ ފިންގަ ޕްރިންޓްފަދަ ސާމްޕަލްތައް ނަގައި އެމީހުން މޮނީޓަކޮށް ކޮންޓްރޯލްކުރުމަށް އަންގާފައިވެ އެވެ.
މޮނިކޮން އަމުރުގެ ދަށުން ޓެގް އަޅުވާފައިވާ 14 މީހުންނަކީ ނުރައްކާތެރި ގޭންގް މީހުން ކަމަށް ކުރިން ވަނީ ބުނެފަ އެވެ.
ކުރީގެ ހޯމް މިނިސްޓަރު އުމަރު ނަސީރު ---