"ތަފާތު" އަދި "ސަޅި" ފަދަ ބަސްތައް އަލުން މަޝްހޫރު ކޮށްދިން މޯލްޑިވިއަން އައިޑޮލްގެ ޖަޖު އިބްރާހިމް އަލީ ނުވަތަ ކުޑަ އިއްބެއަކީ ޝޯ އިން ފެނުނު ހަމަ އެންމެ ތަފާތު މީހާ އެވެ. އިއްބެ ވެސް ބުނާ ގޮތަށް، މި ކުޑަ އިއްބެއެއް ހަމަ މާ ބޮޑަށް ވެސް "ސަޅީ" އެވެ. އިއްބެގެ ކޮމެންޓްތައް ވެސް ހަމަ ތަފާތީ އެވެ. ބައިވެރިންނާ އޮތް ގުޅުން ވެސް ތަފާތެވެ. ހަމައެހެންމެ ޝޯގައި އިއްބެ ދައްކާލި ޕާފޯމެންސްތަކާއި ހަރަކާތްތައް ވެސް ވަރަށް ތަފާތެވެ.
ފޯރިގަދަ ޝޯތަކަކަށްފަހު ފުރަތަމަ މޯލްޑިވިއަން އައިޑޮލް މިވަނީ ނިމިފަ އެވެ. ހަތް މިލިއަން ރުފިޔާގެ ބަޖެޓަކާއެކު ދެ ވަނަ ސީޒަން މިވަނީ އިއުލާންކޮށްފަ އެވެ. ގައިމު ވެސް މޯލްޑިވިއަން އައިޑޮލްގެ ޖަޖެއްގެ ޝަރަފު ލިބުމަކީ ބޮޑު ފަހުރެކެވެ. މަގުބޫލު ކަމެކެވެ. އެކަން އިއްބެއަށް ހާސިލުވެފައިވާއިރު، ދެން އޮތް ސުވާލަކީ އަންނަ ސީޒަނުން އިއްބެ ފެނިދާނެތޯ އެވެ. އިއްބެގެ ތަފާތު ދައްކާލާނެބާވަ އެވެ.
މި ސުވާލަށް އިއްބެ މިވަނީ ޖަވާބުދީފަ އެވެ. އިއްބެ ދިން ޖަވާބުން މާޔޫސްވެދާނެ އެވެ. ނަމަވެސް އެއީ އިއްބެގެ ނިންމުމެވެ. އިއްބެ ބުނަނީ، މޯލްޑިވިއަން އައިޑޮލްގެ ދެ ވަނަ ސީޒަނުން އޭނާ ނުފެންނާނެ ކަމަށެވެ.
"ދެ ވަނަ ސީޒަނުން ޕީއެސްއެމްއިން އިއްބެ އެ ފުރުސަތު ދިނަސް ބަލައެއް ނުގަންނާނަން، އެ ސީޒަނަށް ދާން އަދިއެއް ހިޔާލެއް ނުކުރަން، އެ ޕްލެޓްފޯމްގައި ޖަޖުންގެ ގޮނޑީގައި އިނުމުގެ ސްޓްރެންތް އެބަހުރި، އެތާ ތިބި ދެ ޖަޖުންނަށްވުރެ ސީނިއާ ވެސް ވާނެ، ފުދޭވަރަކަށް ގިނަ މަސައްކަތް ވެސް ކޮށްފައިވާނެ މި ދާއިރާގައި، އެއްޗެހި އެނގެން ވެސް އެނގޭނެ، ކިޔަވަން ވެސް ކިޔެވިން،" އިއްބެ ބުންޏެވެ.
ދެވަނަ ސީޒަންގެ ޖަޖުކަން ގަބޫލު ނުކުރަން އިއްބެ ނިންމި ސަބަބުތައް ވެސް ގިނަ އެވެ. އެގޮތުން އަމިއްލަ ސްޓޫޑިއޯއެއް ހިނގަމުން އަންނާތީ އެކަމަށް ވަގުތު ހުސްކުރުމަކީ އެއް ސަބަބެވެ. އަނެއް ސަބަބަކީ އިއްބެ ކިޔެވުމައިގެން ކުރިއަށް ދިޔުމަށް ވިސްނާފައިވާތީ އެވެ. އިއްބެ ކިޔަން ނިންމާފައިވަނީ އިންޖިނިއަރިންގެ ދާއިރާއިންނެވެ.
"ދުވަހަކު ވެސް ހަނދާން ނުނެތޭނެ ފުރުސަތެއް މޯލްޑިވިއަން އައިޑޮލަކީ، އެ މެމޮރީސްތައް ހުންނާނެ، ވަރަށް އުފާކުރަން އެ ފުރުސަތު ޕީއެސްއެމްއިން ދިނީމަ، އަބަދުވެސް ޕީއެސްއެމަށް ޝުކުރު އަދާކުރަން،" އިއްބެ ބުންޏެވެ.
ޓައިޓަލް ލައިޝާއަށް ހައްގު!
މޯލްޑިވިއަން އައިޑޮލް ލައިޝާއަށް ލިބުމުން އިއްބެ ހުރީ ހިތްހަމަ ޖެހިފަ އެވެ. އެއީ ލައިޝާއަށް ހައްގު މަގާމެއް ކަމަށް އިއްބެ ބުންޏެވެ.
"އިއްބެ ވަރަށް ހިތްހަމަ ޖެހޭ ނަތީޖާއާ ދޭތެރޭ، ލައިޝާއަށް ހަމަ ހައްގު މަގާމެއް އެއީ، ޝޯ ފެށިއިރު ވެސް ޖަޖެއްގެ ވިއު ބުނިއިރު އިއްބެ ބުނެފައި އިންނަނީ އިއްބެ ބޭނުންވަނީ ރެސްޕެކްޓްކުރާ އެހެން މީހުންނަށް ވެސް، އެހެން މިޔުޒިޝަނުންނަށް ރެސްޕެކްޓްކުރާ އަދި އަމިއްލައަށް ރެސްޕެކްޓްކުރަން ދަންނަ މީހެކޭ ހޯދަން، އިއްބެ ދެކޭ ގޮތުގައި އާޓިސްޓެއްގެ ކިބައިގައި ހުންނަންޖެހޭ ސިފައެއް އެއީ، އެމީހަކު ކުރިއަށް ދިޔުމަށް ވެސް އެންމެ މުހިންމު ސިފަތައް އެއީ،" އިއްބެ ބުންޏެވެ.
އެހެން މީހުންނަށް އިހުރިރާމްކުރުމާއި އަހުލާގަށް ބަލާނަމަ މި ދަތުރުން އެންމެ ފާހަގަކުރެވުނު ބައިވެރިޔަކީ ލައިޝާ ކަމަށާއި ހުނަރުގެ ގޮތުން ވެސް ލައިޝާ މޮޅު ކަމަށް އިއްބެ ބުންޏެވެ.
"ލައިޝާގެ ބްލަޑްގައި އޭތި [ލަވަ ކިޔުން] އެބައިން، ދޭތި ވެސް އެބައިން، އެކައްޗަކީ ބްލަޑްގައި އިން އެއްޗެއް އަނެއްކައްޗަކީ އޭނާގެ ކެރިއާ، އޭނާގެ ކެރިއާގެ އިތުރުން ލަވަ ކިޔުން ވެސް ހަމަ ދޭތި ވެސް އެބަހުރި ލައިފްގައި ބޭނުން ކުރެވެން، ލައި ކުރާނެ، ލައި އަށް ކުރެވޭނެކަން، އެހާ ސްޓްރެންތް ފެނޭ ލައިގެ ފަރާތުން، ވަރަށް ހިތްވަރުގަދަ ކުއްޖެއްކަން ފާހަގަކޮށްލަން،" އިއްބެ ބުންޏެވެ.
ސްކޫލްގައި ކިޔަވަމުން އައިޑޮލްގައި ވެސް ވަރަށް ރަނގަޅު އަހުލާގަކާއި އެކީ ބުރަ މަސައްކަތްތަކެއް ލައިޝާ ކޮށްފައިވާ ކަމަށް އިއްބެ ބުންޏެވެ. އިއްބެ ބުނީ، ކޮންމެ ކަމެއް ވެސް ކުރެވޭތޯ ލައިޝާ ބަލާ ކަމަށާއި، އެއްވެސް އުޒުރެއް އޭނާ ނުދައްކާ ކަމަށެވެ.
"ޓައިޓަލް ލިބުނީ ދެން ވިސްނަން ޖެހެނީ އެ ޓައިޓަލަކީ ކުރިއަށް ދިޔުމަށް ހުޅުވާލި ވަރަށް ބޮޑު ދޮރެއްކަން، އެކުއްޖެއްގެ ކަމެއް އޭތިގަ ހިފައިގެން ކުރިއަށް ދިޔުމަކީ އަދި އެ ކުއްޖެއްގެ އިތުރުން ވެސް އޮންނާނެ އެހެން ބައެއް މިސާލަކަށް އަމިއްލަ އުފެއްދުމަށް ނެރުމަށް ޕްރޮޑިއުސަރަކު އެ ކުއްޖާ ގޮވައިގެން ކުރިއަށް ދިޔުމަކީ އަދި ތަފާތު ކަމެއް، ޕްރޮޑަކްޓެއްގެ ގޮތުގައި މޯލްޑިވިއަން އައިޑޮލްގެ ޓައިޓަލް ފަދަ ޕްރޮޑަކްޓެއް ނުލިބޭނެ،" އިއްބެ ބުންޏެވެ.
ވަކި ބައިވެރިޔަކަށް ޖަޖުން ފޭވާކުރާ ކަމަށް ދެކެވޭ ވާހަކަތައް އިއްބެ ވަނީ ދޮގުކޮށްފަ އެވެ. އިއްބެ ބުނީ އެއްވެސް ބައިވެރިޔަކަށް ފޭވާކޮށްފައިނުވާނެ ކަމަށެވެ. އިއްބެ ކޮމެންޓްކުރާއިރު ވެސް ބަލަނީ ހުނަރަށް ކަމަށެވެ.
"ވަރަށް ގިނަ މީހުން އިއްބެ ކޮމެންޓް ނުކުރާތީ ވެސް ވާހަކަ ދައްކާ، އަސްލު ގަބޫލެއް ނުކުރަން އެއީ އެހާ މޮޅެތި ކުދިންތަކެއް ކަމަކަށް، ކޮންމެ ކުއްޖަކާ ދިމާލަށް އެހާ ޓެކްނިކަލް އެއްޗެހި ބުނަން ބޭނުމެއް ނުވޭ، އެހެންވެ އެހޭ ގިނައިން ކޮމެންޓް ނުކުރަނީ، އެނގޭ ދެން ތިބި ދެ ޖަޖުން ކުރާ ކަން ކޮމެންޓް، އިއްބެ ރެސްޕެކްޓް ކުރަން އެ ދެ މީހުންނަށް ވެސް، މިޔުޒިޝަނުން އެއީ، އެއްވެސް ކުއްޖަކާ ދޭތެރޭ ފޭވާއެއްގެ ގޮތަށް އެއްވެސް ކަމެއް ކޮށްފައެއް ނޯންނާނެ،" އިއްބެ ބުންޏެވެ.
އިއްބެ ބުނީ، އިއްބެގެ ކޮމެންޓްތަކާއި ކޮމެންޓްކުރާ ގޮތާއި ދޭ މާކްސްތަކާ އެއްގޮތް ވާނެ ކަމަށެވެ. ކުއްޖާއަށް ބުނަންވާ އެއްޗެއް ރެޑީވެގެން އިއްބެ ނުދާ ކަމަށާއި ކުއްޖާ ހުށަހަޅައިދޭ ލަވައާ ގުޅޭ ގޮތުން ކޮންމެހެން ބުނަން ޖެހޭ އެއްޗެއް ނޫނީ އިއްބެ ނުބުނާ ކަމަށް އޭނާ ބުންޏެވެ.