އިނގިރޭސިވިލާތުގެ ޝާހީ އާއިލާގެ ވާހަކަތަކީ އަބަދުވެސް އެ ވާހަކަތަކަށް މީހުންގެ ސަމާލުކަން އަތުލައިގަންނަ ވާހަކަތަކެކެވެ. މިފަހަރު ވެސް މިއޮތީ ޝާހީ އާއިލާގެ ވާހަކައެކެވެ. އެ އާއިލާއަށް މެންބަރަކު އިތުރުވި ވާހަކަ އެވެ. ޕްރިންސް ވިލިއަމް އާއި އޭނާގެ އަނބިކަނބަލުން ކޭޓް މިޑްލްޓަނަށް ދެ ބޭފުޅުން ލިބިވަޑައިގެންފައިވާއިރު އަނެއްކާވެސް ބޭފުޅަކު ލިބެނީބާވައޭ ހިތަށް އަރާފާނެ އެވެ. އެކަހަލަ އަޑުތަކެއް މީގެކުރިން ވެސް ވަނީ އަރާފަ އެވެ. ނަމަވެސް އެހެނެއް ނޫނެވެ. މިއީ މުޅިން ތަފާތު މެންބަރެކެވެ.
މި މެންބަރު ތައާރަފްކޮށްދެއްވާފައިވަނީ ކޭޓެވެ. އެ މެންބަރުގެ ވާހަކަ ކޭޓް ދެއްކެވީ ހެމްޕްޓަން ކޯޓް ޕެލެސްގެ އާ މެޖިކް ގާޑެން ހުޅުވުމަށް ބޭއްވި ރަސްމިއްޔާތުގައެވެ. އެ ޕާކް ހުޅުވައިދެއްވީ ކޭޓެވެ.
ކޭޓް ވިދާޅުވެފައިވަނީ، ޝާހީ އާއިލާއަށް އިތުރުވި މެންބަރަކީ އެ ބޭފުޅުންގެ އާ ޕެޓް ކަމަށެވެ. އެއީ ކުޑަކުޑަ ހެމްސްޓާއެކެވެ. އެ ހެމްސްޓާއަށް ދީފައިވާ ނަމަކީ މަރްވިން އެވެ.
މަރްވިން ދެކެ އެންމެ ލޯބިވަނީ އަދި އެންމެ ގަޔާ ވަނީ ޕްރިންސެސް ޗާލެޓް ކަމަށް ކޭޓް ވިދާޅުވި އެވެ. ކޭޓް ވިދާޅުވީ، މަރްވިންގެ ކެހެރިތަކާ ކުޅުއްވަން ޕްރިންސެސް ޗާލެޓް ވަރަށް ގަޔާވާ ކަމަށެވެ.
މި ޕާކް ހުޅުވަން ބޭއްވި ރަސްމިއްޔާތުގައި ކޭޓް ވަނީ އެތަނުގައި ތިބި ކުޑަކުދިންނާއެކު ވަރަށް ގިނަ ވަގުތު ހޭދަކުރައްވާފަ އެވެ. އެ ކުދިން މީޑިއާތަކަށް މައުލޫމާތު ދެމުން ބުނެފައިވަނީ ކޭޓްއަކީ ހިތްހެޔޮ ބޭފުޅެއް ކަމަށެވެ. އަދި ވަރަށް ގިނަ ވާހަކަތައް ދެއްކެވި ކަމަށް ވެސް އެ ކުދިން ބުންޏެވެ.
އެ ކުދިން ބުނީ ޕާކްގައި އޮތް ޕްލާސްޓިކް އެންޑް ކްލޭ ޑްރެގަން ކައިރިއަށް ވަޑައިގެން ކޭޓް ވިދާޅުވީ، އެ ޑްރަގަންގައި ކުޅުއްވަން ޕްރިންސް ޖޯޖް ބޭނުންވެލައްވާނެ ކަމަށާއި، އެކަމަކު އެ ޑްރަގަންދެކެ ޕްރިންސް ޖޯޖު ބިރުގަންނަވާނެ ކަމަށެވެ.