މުސްކުޅިން ބުނެ އުޅެ އެވެ. ރީތި އަންހެނެއްގެ އެންމެ ބަލާލުމަކީ މިޔަ ތޫނު ކަނޑިއަކަށްވުރެ ތޫނު އެއްޗެކެވެ. ހަށިގަނޑުގެ ޝާއްބަކަން ލިބިފައިވާ ރީތި ހޫރެއްފަދަ އަންހެނަކަށް އެއްފަހަރާ އެތައް ހިތެއް ކަތިލެވިދާނެ ކަމަކަށް އަޅެ ގަބޫލެއް ނުކުރަން ހެއްޔެވެ. މިއަކީ އެއްގާގަނޑުން ޖަހާ ދެދޫނި މަރާލުމަށް ވުރެވެސް ކުޅަދާނެކަމެއްކަން ނުދެނަހުރިން ހެއްޔެވެ؟ ފުރަތަމަ ނަރަޒުން ވާ ލޯތްބަކީ އެކި މީހުން އެކި ގޮތަށް މިނެ ކިރާ އެއްޗެކެވެ.
މި ބަހުސެއް ހިނގަންފެށީ އިހަކު މިއަދަކު ނޫނެވެ. މިއީ މީގެ އެތަކެއް ސަތޭކަ ޒަމާނެއްގެ ކުރިއަށް ދިގިދެމިގެންދާ ބަހުސެކެވެ. ގަދީމީ ގްރީކް މީހުން މިއަށް ކިޔައި އުޅުނީ "ތިއެ މޭނިއާ" ނުވަތަ "ކަލާނގެ ތަކުންގެ ފަރާތުން ލިބޭ މޮޔަކޮށްލާ ޒާތުގެ ލޯބި" އެވެ. އެމީހުން ރީތި އަންހެނާގެ ކަތި ނަޒަރެއް ސިފަ ކުރަނީ "ބެސިލިސްކް" ނަމަކަށް ކިޔާ ހިޔާލީ ވިހަގަދަ ހަރުފައެއްގެ ބެލުމާ އެވެ. ބުނެވޭ ގޮތުގައި މިފަދަ ހަރުފައަކީ އެންމެ ނަޒަރަކުން މީހާ ހަލާކުކޮށް، މަރާލުމުގެ ގާބިލުކަން ލިބިފައިވާ ހަރުފައެކެވެ. (ހެހެ) އެހެންވީމާ މިވެސް ފުރަތަމަ ނަޒަރުން ލޯބިވެވިދާނެ ކަމަށް ބުނާ މީހުންގެ ތިއަރީއަށް އިތުރުކޮށްލެވިދާނެ ޕޮއިންޓެއްކަން ޔަގީނެވެ.
ކޮންމެއަކަސް މިޒަމާނުގެ ސައިންސާއި ބުއްދީގެ އަލީގައި ފުރަތަމަ ނަޒަރުން ލޯބި ވެވިދާނެތޯ ނޫންތޯ ބަލައިލުމަކީ ނުކޮށް ދުކޮށްލައިގެން ވާންއޮތް ކަމެއް ނޫނެވެ. މިކަމާ ގުޅިގެން ސައިކޮލޮޖިސްޓުން ގެ ރައުޔު މިއޮތީއެވެ. މީގެ ތެރެއިން އަމިއްލަޔަށް ހުންނާނެ ކޮޅެއް ޑިސައިޑްކޮށްލާށެވެ.
ސައުތު ފްލޮރިޑާގެ ސެންޓަ ފޯ މާޝަލް އެންޑް ސެކްޝުއަލް ހެލްތުގައި މަސައްކަތްކުރައްވާ ސައިކޮލޮޖިސްޓް، ޑރ. ލިންދާ މާޓިން ވިދާޅުވާ ގޮތުގައި ލޯތްބަކީ ސައިންސާއި ދިރާސީ އިލްމުވެރިންނަށް ވެސް މިހާތަނަށް އޭގެ އަސްލު ހަގީގަތް ދެނެގަނެވިފައި ނުވާ "މިސްޓްރީ"އެކެވެ. ފުރަތަމަ ނަޒަރުން ލޯބިވާ ކަމަށް ބައެއް މީހުން ގަބޫލުކުރާއިރު، މި ކަމެއް ގަބޫލުކުރާ ގްރޫޕުގައި ގިނައީ ފިރިހެނުން ކަމަށް ޑރ. ލިންދާ ގަބޫލުކުރެ އެވެ. އޭނާ ގަބޫލުކުރާ ގޮތުގައި ފުރަތަމަ ނަޒަރުން މީހަކު ރީތި ވެދާނެ އެވެ. އެމީހެއްގެ ރީތިކަން ފެނި އެމީހަކު ލިބުމަށް ހިތްވެސް ކިޔާފާނެ އެވެ. ނަމަވެސް އެއަކީ އޭނާގެ ނަޒަރުގައި ލޯތްބެއް ނޫނެވެ. ކޮންމެއަކަސް މިކަމުގައި އެކި މީހުންގެ ވިސްނުން ތަފާތުވެސް ވާނެތާ އެވެ.
"އަހަރެންގެ ނަޒަރުގައި މީހަކު ރީތިވެދާނެ. ބޭނުންވެސް ވެދާނެ. އިންސާނުންނަކީ ރީތި އެއްޗިއްސަށް ހިތްކިޔާ ބައެއް. ރީތިއެއްޗެހީގެ ބޭނުންކޮށްލަން ބޭނުންވާ ބައެއް، އެ ވިސްނުމުން ބުނާނަމަ އެއަކީ ލޯތްބެއް ނޫން. ފުރަތަމަ ނަޒަރުން ވަރަށް ލޯބިވެގެން އުޅޭ ކަމަށް ބުނެފަވެސް އެ މީހެއްގެ ފަރާތުން އަނެކާ ހިތްހަމަ ނުޖެހޭ ސިފައެއް ފެންނަން ފަށައިފިއްޔާ ފަސޭހައިން ފޫހިވަނީ އެހެންވެ،" ލިންދާ ވިދާޅުވެފައިވެ އެވެ.
ރިލޭޝަންޝިޕް އެކްސްޕާޓެއް ކަމަށްވާ ރިޗެލް ޑެލްޓޯވެސް ބުނަނީ ހަމަ މިހެންނެވެ. ފުރަތަމަ ނަޒަރުން ލޯބި ނުވާނެ ކަމަށެވެ. އެކަމަކު މީހަކު ބޭނުން ވެދާނެ އެވެ. ނަމަވެސް ލޮސްއެންޖަލިސްގެ އިންޑިޕެންޑެންޓް ލިވިން ފެސިލިޓޭޓާ އެއް ކަމަށްވާ ސޯޑާ މިންޓީގެ ނަޒަރުގައި ފުރަތަމަ ނަޒަރުންވެސް ލޯބި ވެވިދާނެ އެވެ. އޭނާއާއި އޭނާގެ ފިރިމީހާއަށް ވެސް ދިމާވީ އެފަދަ ލޯތްބެއް ކަމަށް އޭނާ ބުނެފައިވެ އެވެ.
އެހެންވީމާ މިކަމަށް ގޮތެއް ނިންމަން އުޅެމާ ހިނގާށެވެ. ގޮތެއް ނިންމާނީ ތިކޮޅުންނެވެ.