ދުނިޔޭގެ ހަތަރު ބިތަށް އިންޓަނެޓްގެ ހުކޫމަތު ފެތުރިއްޖެ އެވެ. ހިޔާލުފާޅުކުރުމުގެ މިނިވަންކަން މުޖުތަމައުތަކުގައި ތަންފީޒު ނުވެގެން އުޅެނިކޮށް މިކަމެއްވެސް އޮންލައިން ސައިޓްތަކެއް މެދުވެރިކޮށް ތަންފީޒު ކުރަން ބަޔަކު އުޅެ ކާމިޔާބު ހޯދައިފި އެވެ. ސައިބަ ޑިމޮކްރަސީ އަށް މީހުން ހޭނުނީ ނިކަން އަވަހަށެވެ. ފޭސްބުކް އާއި ތްވިޓާ ފަދަ ސޯޝަލް މީޑިއާގެ ސައިޓްތަކުގައި އާންމު ދިރިއުޅުމަށްވުރެ ބޮޑަށް މީހުން މާ ހަލަންޏެވެ. ވާނީވެސް އެހެނެވެ. ގޮނޑީގައި އިނދެގެން މުޅި ދުނިޔޭގައި ހިނގެ އެވެ. ލޯބިވެރިންވެސް ހޯދެ އެވެ.
ގަވާއިދުން ކާންޖެހޭ ބޭހެއް ފަދައިން ކޮންމެ ދުވަހަކުވެސް ކޮންމެވެސް ނަމެއްގައި ފޭސްބުކް ސްޓޭޓަސް އެއް އަޕްޑޭޓް ކޮށްލުމަކީ ސަގާފަތުގެ ތެރެއިން އަންނަ ޕްރެޝަރެއް ކަމަށް ވެސް ވެދާނެ އެވެ. ނޫނެކެވެ. ޕްރެޝާއެއް ނޫނެވެ. ޑިމާންޑެކެވެ.
އިންސްޓާ ގްރާމް އާދޭސް ކުރަނީ "ފުރިހަމަ" ފޮޓޯގަނޑަކަށެވެ. ފޭސްބުކް އާދޭސްކުރަނީ "ލޯބި" ސްޓޭޓަސް އަކަށެވެ. ޓުވިޓާ ބޭނުން ވަނީ އަދި އެއް ޓުވީޓެވެ.
އަހަރެމެން ފޭސްބުކްގައި ޖަހާލާނެ މޮޅު ވާހަކައެއް އަބަދުވެސް އޮންނަނީ ރެޑީގަ އެވެ. ފޭސްބުކާއި ޓުވިޓާ އޮންނަނީވެސް ވަކި ކީއްކުރަން ހެއްޔެވެ؟ އިހުސާސްތައް ހިއްސާކުރާށެވެ. ބޭނުން ވަރަކަށެވެ. ލިމިޓެއް ނެތެވެ. އަޑުއަހާނެ މީހުންވެސް ތިބޭނެ އެވެ.
ފޭސްބުކްގައި އެއްޗަކަށް އޮންނަނީ ލޯބިވެރިޔާ ނުވަތަ ބައިވެރިޔާ ދެކެ ލޯބިވާ ވާހަކަ، ފުރާޅަށް އަރާ އޮވެ ގޮވާހާ ބާރަށް ގޮވާ ޖަހާފައި ހުންނަ ސްޓޭޓަސްތަކުން ފުނިޖެހިފަ އެވެ. ބައިވެރިޔާ ހަޔާތަށް އައުމުން އުފާވާ ވާހަކައެވެ. ޝުކުރުކުރާ ވާހަކައެވެ. ދެމީހުން އެކީގައި ދިޔަހާ ތަނަކާއި ކުރިހާ ކަމެއްގެ ވާހަކައެވެ. އެއާއި ވިދިގެން އެކި މީހުން ކޮށްފައި ހުންނަ "ލޯބި" ކޮމެންޓް ތަކެވެ.
ލޯބިވެރިޔާއާއި ބައިވެރިޔާއާއި ނުވަތަ އާއިލީ ތެރޭގައި ނަމަވެސް އޮންނަ ގާތް ގުޅުންތަކާއި ގުޅިފައިވާ ހުރިހާ ވާހަކައެއްހެން ސޯޝަލް މީޑިއާއަށް ނަގައި އުކަމުންދާއިރު ތިޔަ ކުރާ ކަމެއްގެ ބާވަތާއިމެދު ވިސްނާލިން ހެއްޔެވެ. ވިސްނާ ނުލެވޭނަމަ މިހިރީ ވިސްނާލަންޖެހޭ ބައެއް ކަންކަމެވެ.
ސްޓޭޓަސް ތިޔަ ހަދިޔާކުރަނީ ބައިވެރިޔާ އަކަށް ނޫން
ކޮންމެ ސިފައެއްގައި ކުރިއަސް ތައުރީފު ވާނީ ތައުރީފަށް ކަން ގަބޫލުކުރަމެވެ. އެކަމަށް މަރުހަބާވެސް ކިޔަމެވެ. ބައިވެރިޔާގެ ރަނގަޅު ވާހަކަ ހިއްސާކުރަން ތިޔަ ލިޔުނީ މުޅިން ތެދުކަމަށް ވެސް ވެދާނެ އެވެ. އެކަމަކު މައްސަލައަކީ ކޮބައިކަން ބުނަން ހެއްޔެވެ. ދެންމެ ތި ޖެހި ސްޓޭޓަސް އަކީ ލޯބިވެރިޔާ އަށް ލިޔުނު ސްޓޭޓަސް އެއް ނޫނެވެ. އަދި ގިނަ ފަހަރަށް ސްޓޭޓަސް ލިޔަނީ ބައިވެރިޔާ ދެކެ ވާ ލޯބި، ރަހުމަތްތެރިންނާ ހިއްސާކުރުމުގެ ބޭނުމުގައެއްވެސް ނޫނެވެ.
އެ ސްޓޭޓަސް އަކީ ތިބާ އުޅޭ އުފާވެރިކަމާއި ބައިވެރިޔާދެކެ ވާ ލޯތްބާއި އޭނާ އާއި އެކު އުޅެން ބޭނުންވާ މިންވަރު ހާމަކުރުމުގެ ނިޔަތުގައި ޖަހާ ސްޓޭޓަސް އެއް ނަމަ އެ ސްޓޭޓަސް ޖެހުމުގެ ބޭނުމެއް ކޮބައިހެއްޔެވެ. ގިނަ ފަހަރަށް އަންހެނުން ލޯބިވާކަންވެސް ޔަގީންކުރަން ފޭސްބުކަށް ވަންނަން ޖެހުމަކީ ދެރަ މައްސަލައެކެވެ. ބައިވެރިޔާ ނިދަނީ ނުވަތަ ދިރިއުޅެނީ ފޭސްބުކްގައެއް ނޫނެވެ. އޭނާއަކީ އަބަދުވެސް ކައިރީގައި، ދުރުގައި ނަމަ އަބަދުވެސް ގުޅައިގެން ވާހަކަދައްކާނެ މީހެކެވެ. އެ ލިޔުން ލިޔެ ދުނިޔެއަށް ހާމަކުރުމުގެ ބަދަލުގައި ބައިވެރިޔާގެ ކަންފަތް ދޮށުގައި ނިކަން ލޯބިން، ލޯބިވާ ވާހަކަ ބުނެލުން ގޯހެއް ނުވާނެ އެވެ. މާ "ރޮމޭންޓިކް" ވެސް ވާނެ އެވެ.
ލައިފް ބްރޯޑްކާސްކުރުމުން ގުޅުމަށް ކުރާ ގަދަރު ކުޑަވެދާނެ
ދެމަފިރިއެއްގެ އެންމެ އަގުހުރި ރައުސުލްމާލަކީ އެ ދެމީހެއްގެ ދެމެދުގައި އޮންނަ ގުޅުމެވެ. ހަޔާތުގެ ބައިވެރިޔާއަކީ މުޅި ދުނިޔެއިން ތިބާގެ އެންމެ ޕާސަނަލް އިހުސާސްތައް ހިއްސާކުރުމަށް ހޯދި ހަމަ އެކަނި މީހާއެވެ. އެހެންކަމަށް ވާނަމަ ތިބާގެ އިހުސާސްތަކާއި ވާހަކަތަކާއި ހިތައް އަރާ ހުރިހާ ކަމެއް އެންމެ ފުރަތަމަ އެނގުމުގެ ހައްގު އޮތީވެސް އޭނާއަކަށް ނޫންހެއްޔެވެ. ބުއްދިވެރި ގޮތަކީ ފޭސްބުކްގައި ތިބި ރައްޓެހިންނަށް، ގިނަ ފަހަރަށް ދުވަހަކުވެސް ލޮލަށް ނުފެންނަ ރައްޓެހިންނަށް ހިތައް އަރާ މުހިއްމު ވާހަކަތަކާއި ދިމާވާ ހައްސާސް ކަންކަން ކިޔައިދިނުން ހެއްޔެވެ. އެހެން ކަމަށް ވާނަމަ ބައިވެރިޔާ އަށްވުރެ ތިބާ ގާތުގައި އެމީހުން މާ މޮޅުވީ އެވެ. މިއީ ވިސްނާލަން ޖެހޭ ކަމެކެވެ.
ފޭސްބުކަށް ވެސް ވަންނަން ވާނެ އެވެ. ސްޓޭޓަސް ވެސް ލިޔަން ވީ އެވެ. އެކަމަކު އެހެން މީހުންނަށް އެނގެން ނުޖެހޭ ކަންކަން ހުންނާނެ އެވެ. އަމިއްލަ ހަޔާތް އެންމެނަށް ނެރެ ހާމަ ކުރުމުގެ ކުރިން އަދި އެއް ފަހަރު ވިސްނާލާށެވެ.