- ފުރަތަމަ އައިއީޑީ ތައްޔާރު ކުރީ ޓެސްޓަކަށް ލޯންޗެއްގައި ގޮއްވާލަން
- ދެވަނަ އައިއީޑީ އިން ގެއްލުން ކުޑަކުރަން ތައްޔާރު ކުރީ ބާރުދަށްކޮށް
- މިނިވަން 50ގެ ހަފްލާއާ ދިމާކޮށް ޒަހަރު ހޯއްދެވުމަށް އަދީބު އުޅުނު
ރައީސް އަށާއި ސަރުކާރުގެ އިސްވެރިންނަށް އިންޒާރުދީ ޔޫޓްބިއުބަށް ވީޑިއޯއެއް ލީ ކުރީގެ ނައިބު ރައީސް އަދީބު ކަމަށާއި އެއަށް ފަހު ލޯންޗެއްގައި ގޮއްވާލުމަށް ދެ އައިއީޑީ އެއް ތައްޔާރުކޮށްދިން ކަމަށް ބުނެ އެތަކެތި ހެދި ސިފައިންގެ މީހާ ޝަރީއަތުގެ މަޖިލީހުގައި މިއަދު އަދީބާ ދެކޮޅަށް ހެކިބަސްދީފި އެވެ.
ރައީސް ދަތުރުކުރެއްވި، ފިނިފެންމާ ލޯންޗްގައި އައިއީޑީއެއް ހަރުކޮށް ގޮއްވާލި ކަމަށް ބުނެ އަދީބުގެ މައްޗަށް ކުރާ ޝަރީއަތުގައި، ދައުލަތުން ސިއްރު ހެއްކެއްގެ ގޮތުގައި މިއަދު ހުށަހެޅީ ހަތިޔާރުގެ ދާއިރާއިން ތަމްރީން ލިބިފައިވާ ސިފައިންގެ މީހެކެވެ.
ހަތިޔާރާއި ގޮވާތަކެތީގެ ރޮގުން އިންޑިއާ، ޗައިނާ އަދި ޕާކިސްތާނުން އަސްކަރީ ތަމްރީން ހޯދާފައިވާ އޭނާ ހެކިބަސް ދެމުން ބުނީ ރައީސް އަށާއި ސަރުކާރުގެ އިސްވެރިންނަށް އިންޒާރުދީފައިވާ ވީޑިއޯއެއް ޔޫޓިއުބްއަށް ލީ އަދީބު ކަމަށެވެ. އަދި އެއަށް ފަހު ސިޔާސީ ސްޓަންޓެއް ކުޅުއްވުމަށް ކަމަށް ބުނެ ޓެސްޓެއްގެ ގޮތުން، ގަލްފް ކްރާފްޓްގެ ލޯންޗެއް ގޮއްވާލުމަށް އަދީބު އެދުމުން އައިއީޑީއެއް ތައްޔާރުކޮށްދިން ކަމަށް ވެސް އޭނާ ބުންޏެވެ. ދެން އަދީބު އެދުނީ އިތުރު ލޯންޗެއް ގޮއްވާލުމަށް އައިއީޑީއެއް ތައްޔާރުކޮށްދިނުމަށް ކަމަށް ވެސް އޭނާ ބުންޏެވެ. އެހެން ނަމަވެސް ގިނަ ބައެއްގެ ފުރާނައަށް ގެއްލުންވެދާނެތީ ދެވަނަ އައިއީޑީ ތައްޔާރު ކުރީ ވަރަށް ބާރު ދަށް އެއްޗެއްގެ ގޮތުގައި ކަމަށް ވެސް އޭނާ ބުންޏެވެ.
އޭނާ އަދި ބުނީ އޭރުގެ ޕޮލިސް ކޮމިޝަނަރު ހުސެން ވަހީދުގެ ކާރުކޮޅުގައި އައިއީޑީއެއް ހަރުކޮށް މޭޑޭގައި ގޮއްވާލުމަށް އެފަދަ އެއްޗެއް ތައްޔާރުކޮށް ދިނުމުން އަދީބު އެދުނު ކަމަށާއި އޭރުވެސް އައިއީޑީއެއް ތައްޔާރުކޮށްދިން ކަމަށެވެ. އެކަން ކުރަން އުޅުނީ އިމްރާން ހައްޔަރު ކުރަން ކަމަށް އެނގިފައިވާ ކަމަށް ވެސް އޭނާ ބުންޏެވެ. މީގެ އިތުރަށް މިނިވަން 50 އާ ދިމާކޮށް ބަޔަކު މަރާލުމަށް އަދީބު ޒަހަރު ހޯއްދަވަން އުޅުނު ކަމަށް ވެސް ހެކިވެރިއަކު ޝަރީއަތުގައި ވަނީ ހެކިބަސް ދީފަ އެވެ. ތަފްސީލް އަންނަނީ..