މިއީ ފްރާންސްގައި 2006 ވަނަ އަހަރު ވިދާލި ރެޕަރެއްގެ ވާހަކަ އެވެ. ކެރިއާގެ އެންމެ އުސްމިނުގައި ވަނިކޮށް ގެއްލުނު ރެޕަރެއްގެ ވާހަކަ އެވެ. މެލާނީގެ ވާހަކަ އެވެ. ކުރީގެ ނަމުންނަމަ ޑިއޭމް އެވެ.
އޭނާއަކީ ރެޕްކުރުމުގައި ވަރަށް ކުޅަދާނަ ފަންނާނެކެވެ. އޭނާގެ އަލްބަމެއް ނެރެ ވަރަށް ގިނަ ފައިސާ ވެސް ހޯދާފައިވެ އެވެ. ކުރިއަށް ދެވޭނެ މަގު ވެސް އޮތެވެ. ނަމަވެސް ނެތީ އެންމެ ކަމެކެވެ. ހިންހަމަޖެހުމެވެ. ދިރިއުޅުމުގައި ލިބެންޖެހޭ އެއްވެސް ހިންހަމަޖެހުމެއް އޭނާއަކަށް ނުލިބެ އެވެ. ޑިޕްރެޝަނަށް އޭނާދެ އެވެ. ޑްރަގް ނަގަން ޖެހެ އެވެ. ހާލު ބޮޑުވެ ހޮސްޕިޓަލުގައި އެޑްމިޓްކޮށް ފަރުވާން ދޭން ޖެހެ އެވެ.
ޑިޕްރެޝަނުގެ ކަންތައް ބޮޑުވެ އެއްފަހަރު މެލާނީއަށް ހޮސްޕިޓަލްގައި ވަރަށް ގިނަ ދުވަހު އޮންނަން ޖެހުނެވެ. އެގޮތަށް އޮއްވާ އޭނާގެ މުސްލިމް އެކުވެރިޔަކު އޭނާއަށް ގޮވާލަން އައެވެ. އެކުވެރިޔާ އޭނާގެ ކައިރިން ނިކުމެގެން އައީ ނަމާދަށް ދާން ޖެހޭ ކަމަށް ބުނެފަ އެވެ. އެކުވެރިޔާ ދާން ހިނގައިގަތުމުން އޭނާ ހުއްޓުވާ ނަމާދުކުރަން ބޭނުންވާ ކަމަށް މެލާނީ ބުންޏެވެ.
އޭނާގެ އެދުމާއެކު އެކުވެރިޔާ އޭނާ ގޮވައިގެން މިސްކިތަށް އެރި އެވެ. އެކުވެރިޔާގެ ހަރަކާތްތަކަށް ބަލަމުން އޭނާ ވެސް ނަމާދުކުރަން ފަށައިފި އެވެ. އޭނާ ސަޖިދައަށް ގޮސް ނިތްކުރި ބިންމަތީ ޖައްސާލި އެވެ. އެ ލިބުނު ހިންހަމަ ޖެހުމާއި ހިތަށްވީ ފަސޭހަ އޭނާ ކިޔައިދޭން ނޭނގުނެވެ. އިސްލާމްދީނުގެ މަތިވެރި ހިދާޔަތު އޭނާއަށް ލިބުނީ އެ ސަޖިދަ މަތީގަ އެވެ.
މިހާރު އޭނާ ގަބޫލުކުރާ ގޮތުގައި އަޅުކަން ކުރަންޖެހޭނަމަ އެ އަޅުކަމެއް ކުރަންޖެހޭނީ މާތްﷲއަށެވެ. އެކަލާނގެ ނޫން އިލާހެއް ނެތެވެ. އިސްލާމްދީނަކީ ހަމައެކަނި ދީނެވެ.
އޭނާ ބުނީ، ކުރިން އުޅެވުނީ ދިރިއުޅުމެއް ނޫން ކަމަށާއި ހަގީގީ ދިރިއުޅުމަކީ ދެ ދުނިޔޭގެ ބާޖަވެރިކަމަށް އުޅޭ ދިރިއުޅުން ކަމަށެވެ. ކުރީގެ ދިރިއުޅުން ހަނދާން ނައްތާލައި މިހާރު ފަށާފައިވާ އިސްލާމީ ދިރިއުޅުމާމެދު އޭނާ ފަހުރުވެރިވެ އެވެ.