ޝަރީއަތަށް މައްސަލައެއް ފޮނުވުމުގެ ކުރިން ދެ ފަރާތުން އެއް ގަލަކަށް އެރުވުމަށް ކުރިއަށް ގެންދާ ޑިސްޕިއުޓް މަރުހަލާގައި މައްސަލާގައި އެދޭ އަމުރާ މެދު ގޮތެއް ނުނިންމާނެ ކަމަށް ސިވިލް ކޯޓުން ބުނެފި އެވެ. ސިވިލް ކޯޓުން މިހެން ބުނެފައިމިވަނީ މިއަދު ޕީޕީއެމްގެ ރައީސް މައުމޫން އަބްދުލް ގައްޔޫމާ ދެކޮޅަށް ސިވިލް ކޯޓަށް ހުށަހަޅާފައިވާ މައްސަލާގައި ވަގުތީ އަމުރު ނެރެނުދިން ކަމަށް ބުނެ ޕީޕީއެމްގެ ބައެއް އޮފިޝަލުން ވާހަކަ ދައްކާފައިވަނިކޮށެވެ.
ސިވިލް ކޯޓުގެ އޮފިޝަލަކު ވިދާޅުވީ، ޑިސްޕިއުޓް މަރުހަލާގައި އަމުރު ނެރުމަށް ވެސް އަދި ނުނެރުމަށް ވެސް ނުނިންމާނެ ކަމަށެވެ. އެހެންކަމުން ޕީޕީއެމް މައްސަލާގައި ވެސް އަމުރު ނެރެ ނުދިނުމަށް ނިންމާފައިނުވާނެ ކަމަށެވެ.
ސިވިލް ކޯޓަށް ހުށަހަޅާފައިވާ މައްސަލައަކީ ޕާޓީގެ ކައުންސިލްގެ މަޝްވަރާއެއް ނެތި އަސާސީ ގަވާއިދާ ހިލާފަށް ޕާޓީގެ ރައީސް، މަޝްވަރާ މަޖިލީހެއް އެކުލަވާލައްވައި ޕާޓީގެ ހުރިހާ ގުނަވަންތަކެއް ސަސްޕެންޑްކޮށްފައިވާ މައްސަލަ އެވެ.
އެ މައްސަލަ ސިވިލް ކޯޓަށް ހުށަހެޅުއްވީ ހުޅުދޫ ދާއިރާގެ މެމްބަރު މުހައްމަދު ޝާހިދު އާއި ނައިފަރު ދާއިރާގެ މެމްބަރު އަހުމަދު ޝިޔާމް އަދި ދާންދޫ ދާއިރާގެ މެމްބަރު އަހުމަދު އަސްއަދެވެ.
ވަގުތީ އަމުރުގައި އެދެނީ ވަކި މުއްދަތެއް ނެތް ގޮތަށް ޕީޕީއެމްގެ ކައުންސިލް ބައްދަލުވުންތައް ހުއްޓުވާލުމާ ގުޅިގެން އެކަން އުވާލުމަށެވެ. އެ އަމުރަށް އެދުނު އިރު މައުމޫން ވަނީ ޕާޓީގެ އަސާސީ ގަވާއިދާ އެއްގޮތަށް ޕާޓީގެ ގުވަނަންތަކުގެ ބައްދަލުވުންތައް ބޭއްވުމަށް ހުއްދަ ދެއްވައިފަ އެވެ.
މި މައްސަލާގެ ދެވަނަ އަޑުއެހުމެއް މި މަހުގެ 19 ވަނަ ދުވަހު ބޭއްވުމަށް ވަނީ ނިންމާފަ އެވެ. އެ އަޑުއެހުމުގައި މައްސަލަ ޝަރީއަތަށް ފޮނުވާނީތޯ ނުވަތަ އެއް ގަލަކަށް އަރާ އެ ހިސާބުން މައްސަލަ ނިންމާލާނީތޯ ނިންމާނެ އެވެ.