ގޯލްކީޕަރު އިމްރާނު މުހައްމަދުގެ ފައިގެ ކުޑަހުޅަށް އަނިޔާވެފައިވާ ކަމަށް އޭނާ އަށް އެންމެ އަވަހަށް ވެސް ދެން ކުޅެވޭނީ 10 ދުވަސް ފަހުން ކަމަށް މާޒިޔާއިން ބުނެފި އެވެ.
އެކުލަބުގެ ސީއީއޯ ހުސައިން ޝާފިއު (ކޮކީ) ވިދާޅުވީ އުރީދޫ ދިވެހި ޕްރެމިއާ ލީގުގައި އިއްޔެ ވިކްޓަރީއަތުން 3-3އިން އެއްވަރުވި މެޗުގައި އިމްރާނަށް ނުކުޅެވުނީ ވެސް އޭގެ ކުރީ ދުވެހު ލިބުނު އަނިޔާގެ ސަބަބުން ކަމަށެވެ.
"ޕްރެކްޓިހުގައި އަނިޔާވީ. ނާއްޓޭއާ ދެމީހުން ބޯޅައަށް އެރިވަގުތު އޭނާގެ ފައިގެ ކުޑަހުޅަށް ތަދުވީ. ވަގުތުން ފައި ދުޅަވީ. ޑޮކްޓަރަށް ދެއްކީމަ ބުނީ ރެނދުލައިފައިވެސް ހުރެދާނެކަމަށް. އެހެންވެ އިތުރަށް ބަލަމުންދަނީ. ހީވަނީ 10 ދުވަސްވަރު ނަގާނެހެން. އިންޖަރީއެއްވެއްޖިއްޔާ އިމްރާނަކީ އެކަމާ ވަރަށް އުޅޭ ކުޅުންތެރިއެއް،" ކޮކީ ބުންޏެވެ.
އިމްރާނަކީ މިސީޒަނުގައި މޮޅަށް ކުޅެމުން އަންނަ ހަމައެކަނި ދިވެހި ކީޕަރެވެ. އޭނާ އަށް މިދިޔަ އަހަރުގެސް ބޮޑު އަނިޔާއެއްވި އެވެ. އެއީ ވޯލްޑް ކަޕް ކޮލިފައިންގައި ހޮންކޮންއާ ދެކޮޅަށް ގައުމީ ޓީމުގައި ކުޅެނިކޮށެވެ. މިހެންވެ މުޅި ސީޒަނުގެ ބޮޑުބައިގައި އޭނާ ހުންނަންޖެހުނީ ނުކުޅެ އެވެ. މާޒިޔާއިން މިދިޔަ އަހަރު އިމްރާނަށް އަނިޔާވުމުން ސީޒަން ފުރިހަމަކުރީ ކިރިގިސްތާނުގެ ގައުމީ ކީޕަރު ގެނެސްގެންނެވެ.
ގައުމީ ޓީމުގެ 15 ކުޅުންތެރިން ތިބި ވަރުގަދަ މާޒިޔާއިން ވަނީ އިމްރާނަށް ނުކުޅެވޭފަދަ ކަމެއް ދިމާވެއްޖެނަމަ ކުޅުވަން ސްރީލަންކާގެ ކީޕަރަކު ވެސް ގެނެސްފަ އެވެ. އިއްޔެ ވިކްޓަރީއާ ދެކޮޅަށް ގޯލު ބެލެހެއްޓީ ލަންކާ ކީޕަރެވެ.
ކީޕަރު އިމްރާން މާޒިޔާގެ ޕްރެކްޓިހުގައި