އަންނަ ޖެނުއަރީ މަހު ފަށަން ހަމަޖެހިފައިވާ މޯލްޑިވިއަން އައިޑޮލްގެ ދެވަނަ ސީޒަންގެ އޮފިޝަލް ބޭންކިން ޕާޓްނަރަކަށް ބޭންކް އޮފް މޯލްޑިވްސް (ބީއެމްއެލް) ހަމަޖައްސައިފި އެވެ.
މިއަދު ބީއެމްއެލްގެ ހެޑް އޮފީހުގައި އޮތް ރަސްމިއްޔާތެއްގައި މޯލްޑިވިއަން އައިޑޮލްގެ ބެންކިން ޕާޓްނަރެއްގެ ގޮތުގައި ބީއެމްއެލް ހަމަޖެއްސުމުގެ އެއްބަސްވުމުގައި ބީއެމްއެލްގެ ފަރާތުން ސޮއިކުރެއްވީ، އެ ބޭންކްގެ ސީއީއޯ އެންޑްރޫ ހީލީ އެވެ. އަދި ޕީއެސްއެމްގެ ފަރާތުން ސޮއިކުރެއްވީ އެމްޑީ އިބްރާހިމް ހަލީލެވެ.
ބީއެމްއެލްގައި މިއަދު ހަވީރު ބޭއްވި ރަސްމިއްޔާތުގައި މޯލްޑިވިއަން އައިޑޮލް ސީޒަން އެކެއް ކާމިޔާބުކުރި ލައިޝާ ޖުނައިދު ވެސް ބައިވެރިވި އެވެ.
ދެވަނަ ސީޒަން ލޯންޗުކޮށްފައިވާއިރު، ސީޒަންގެ ޓައިޓަލް ސްޕޮންސާއަކީ ދިރާގެވެ. މެއިން ސްޕޮންސާއަކީ އެލައިޑް އިންޝުއަރެންސް އަދި ލޮޓަސް އެވެ. ޓްރެވެލް ޕާޓުނަރަކީ މޯލްޑިވިއަން އެވެ. ބެވަރޭޖް ޕާޓްނަރަކީ އެކްސް އެލް އެވެ.
މިފަހަރުގެ ސީޒަންގައި އޮޑިޝަންތައް ބާއްވާނެ ރަށްތައް އިއުލާންކޮށް، މި މަހުގެ ތެރޭގައި އޮޑިޝަންތައް ފެށުމަށް ވަނީ ހަމަޖައްސާފަ އެވެ. އޮޑިޝަންތައް އޮންނާނީ އައްޑޫ ސިޓީ އާއި ފުވައްމުލައް ސިޓީ އާއި މާލޭ ސިޓީ، ލ.ގަމާއި ބ. އޭދަފުށި އަދި ހދ. ކުޅުދުއްފުށީގަ އެވެ.