ޕީޕީއެމްގެ ރައީސް މައުމޫން އަބްދުލް ގައްޔޫމް އެ މަގާމުން ވަކިކުރުމަށް ކޯޓު އަމުރެއް ނެރެދިނުމަށް ސިވިލް ކޯޓުގައި އެދިއްޖެ އެވެ. މި އަމުރު ނެރެ ދިނުމަށް އެދިފައިވަނީ ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމާއި ހުޅުދޫ ދާއިރާގެ މެމްބަރު މުހައްމަދު ޝާހިދެވެ.
ސިވިލް ކޯޓަށް ވެއްދި މައްސަލާގައި އެދިފައިވަނީ، ޕީޕީއެމްގެ ރައީސްކަމުން މައުމޫން އެކަހެރިކޮށް ސިޔާސީ ޕާޓީތަކުގެ ގާނޫނާއި ޕާޓީގެ ހިންގާ ގަވާއިދާއި އަސާސީ ގަވާއިދާ އެއްގޮތަށް ދިވެހި ރައްޔިތުންގެ އެންމެ މަތީ މަސްލަހަތުތައް ރައްކާތެރިކޮށްދޭނެފަރާތަކާ ޕާޓީގެ ހިންގުން ހަވާލުކޮށްދިނުން އެޕާޓީގެ ކައުންސިލްގެ މައްޗަށް ލާޒިމްކޮށް އަމުރެއް ނެރެދިނުމަށެވެ.
ދެ މެންބަރުން ވެއްދި މައްސަލާގައި އިތުރަށް ބުނެފައިވަނީ، ޕާޓީގެ ރައީސްއަކީ އަސާސީ ގަވައިދާއި ހިންގާ ގަވައިދާ އެއްގޮތަށް ކައުންސިލުން ކަނޑައަޅާ ގޮތެއްގެ މަތިން ޕާޓީގެ ހިންގުމާ ހަވާލުވެވަޑައިގެން ހުންނަވާ ބޭފުޅެއް ކަމަށެވެ. އެހެންނަމަވެސް ރައީސް މައުމޫން ވަނީ ގަވައިދުތަކާ ހިލާފަށް ޕާޓީގެ ގުނަވަންތައް ސަސްޕެންޑްކޮށްފައި ކަމަށެވެ. އަދި، ސިޔާސީ ޕާޓީތަކުގެ ގާނޫނާ އެއްގޮތަށް ޕާޓީގެ ހަރަކާތްތައް ހިންގުމަށް ހުރަސްއަޅައި ޕާޓީގެ ސިޔާސީ ހަރަކާތްތައް ރައީސް މައުމޫން ހުއްޓުވާފައިވާ ކަމަށް މައްސަލާގައި ވަނީ ބުނެފަ އެވެ.
ޕީޕީއެމްގެ ގުނަވަންތައް ހުއްޓުވާފައި އޮތް ކަމަށް ބުނެ ދެ މެންބަރުން ކުރިން ވެއްދި މައްސަލާގައި ސިވިލް ކޯޓުން ވަނީ ކައުންސިލު ބައްދަލުވުންތަކާއި ކޮމެޓީތައް ހިންގުން ހުއްޓާލުމަށް މައުމޫން އެންގެވި އެންގެވުމަށް އަމަލުނުކުރުން ހުއްޓާލުމަށް ވަގުތީ އަމުރެއް ނެރެފަ އެވެ. މިހާތަނަށް ވެސް އެ އަމުރު ތަންފީޒުކޮށްފައިނުވާތީ މިފަހަރު ވެއްދި މައްސަލާގައި އެ އަމުރު ތަންފީޒުކޮށްދޭން އަމުރެއް ނެރުމަށް ވެސް ވަނީ އެދިފަ އެވެ.
އަދި، އެ މައްސަލާގައި ޖަވާބުދާރީވުމަށް މާދަމާ 3:30 އަށް ސިވިލް ކޯޓަށް ހާޒިރުވުމަށް ޕީޕީއެމްއަށް ވަނީ ޗިޓް ފޮނުވާފަ އެވެ.