ޕީޕީއެމްގެ ތެރޭގައި ހިޔާލު ތަފާތުވުންތައް އުފެދި ޕާޓީ ދެބަޔަކަށް ބެހުނު އިރު އެއް ފެކްޝަން އޮތީ ޕާޓީގެ ރައީސް މައުމޫން އަބްދުލް ގައްޔޫމުގެ ފަޅީގަ އެވެ. އަނެއް ފެކްޝަން އޮތީ ޕާޓީގެ މުސްތަޝާރު ރައީސް އަބްދުﷲ ޔާމީނާއެކު އެވެ. ދެ ފެކްޝަންގެ ހިޔާލު ތަފާތުވުންތައް މިހާރު ވަނީ ކޯޓާ ހަމައަށް ގޮސްފަ އެވެ. ސިވިލް ކޯޓުން ޕާޓީން ހިންގާނެ ގޮތް އަންގާ ހުކުމެއް ވެސް ވަނީ ކޮށްފަ އެވެ. އެ ހުކުމުގައިވާ ގޮތުން މައުމޫން އަތްޕުޅުން ޕީޕީއެމްގެ ހިންގުން ނަގައި، ރައީސް ޔާމީނާ ހަވާލުކުރަން ޖެހެ އެވެ.
ހުކުމާއެކު ދެ ބެންނަށް ނިސްބަތްވާ ދެ ފެކްޝަނުން ވެސް ގެންދަނީ ކައުންސިލް ބައްދަލުވުންތައް ބާއްވައި ނިންމުންތައް ނިންމަމުންނެވެ.
ހުކުމާ އެއްގޮތަށް ރައީސް ޔާމީނަށް ޕީޕީއެމްގެ ހިންގުން ހަވާލުކުރަން މައުމޫން ބޭނުންފުޅެއް ނުވެ އެވެ. އެމަނިކުފާނު އެ ހުކުމް ގަބޫލުފުޅު ނުކުރައްވައި ވަނީ އިސްތިއުނާފަށް ވަޑައިގަތުމަށް ނިންމަވާފަ އެވެ. އެހެން ނަމެވެސް އޭގެ ކުރިން އަމިއްލަ މެންބަރަކު އެ މައްސަލަ މިވަނީ ހައިކޯޓުގައި އިސްތިއުނާފުކޮށްފަ އެވެ. އެ މައްސަލައަށް މައުމޫން ވެސް ވަނީ ތަދުއްހުލްވެވަޑައިގެންފަ އެވެ.
މިއަދު އެ މައްސަލާގައި ބޭއްވި އަޑުއެހުމުގައި އެންމެ ތަފާތު ކަމަކަށް ފެނިގެން ދިޔައީ، ދެ ބެންއަށް ނިސްބަތްވާ މައްސަލާގައި ވަކާލާތު ކުރުމަށް ވަޑައިގެންނެވި ވަކީލުންނެެވެ. އިސްތިއުނާފު މައްސަލަ ރައްދުވަނީ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމާއި ހުޅުދޫ ދާއިރާގެ މެމްބަރު މުހައްމަދު ޝާހިދަށެވެ. އެ ދެ މެންބަރުންގެ ކޯޓަށް ވެއްދި މައްސަލައާ ގުޅިގެން ޕާޓީގެ ހިންގުން ރައީސް ޔާމީނަށް ލިބޭ ގޮތަށް ވަނީ ހުކުމްކޮށްފަ އެވެ. އަދި، އެ ދެ މެންބަރުންނަކީ ޔާމީން ފެކްޝަނުގެ ދެ މެންބަރުންވެސްމެ އެވެ.
ޔާމީން ފެކްޝަނުގެ ނުވަތަ އެ ދެ މެންބަރުންގެ ވަކީލަކީ ކުރީގެ ބަންޑާރަ ނައިބު އަބްދުﷲ މުއިއްޒެވެ.
މައްސަލާގެ ތެރެއަށް ތަދުއްހުލްވެ ވަޑައިގެންނެވި ރައީސް މައުމޫންގެ ފަރާތްޕުޅުން ވަކީލަކީ ކުރީގެ ޕީޖީ އަހުމަދު މުއިއްޒެވެ. އަހުމަދު މުއިއްޒަކީ ޔާމީން ފެކްޝަނުގެ ވަކީލް އަބްދުﷲ މުއިއްޒުގެ އެއްބަނޑު އެއްބަފާ ބޭބެ އެވެ. މި ދެ ބެންނަކީ ވެސް ރައީސް މައުމޫނާއި ރައީސް ޔާމީންގެ ތިމާގެ ދެބޭފުޅުންނެވެ.
އެހެން ކަމުން ދެ ބެންގެ ދެމެދު އުފެދިފައިވާ މި މައްސަލާގައި ވަކާލާތުކުރުމުގެ ޒިންމާ ވެސް އުފުލާފައިމިވަނީ ދެ ބެންނެވެ. ޕީޕީއެމްގެ މައްސަލަވެފައިމިވަނީ ދެ ބެންގެ ދެމެދު ކުރެވޭ ހަނގުރާމައަށެވެ. މައްސަލާގައި ދެކޮޅުން ވެސް ހޫނު ރައްދުތަކެއް ދެމުންގެންދާއިރު، މައްސަލައިގެ ޝަރީއަތް ވަރަށް ޝައުގުވެރިވެގެންދާނެ އެވެ.