އަންނަ އަހަރު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބުގައި އެމްޑީޕީގެ ޓިކެޓްގައި ވާދަކުރަން ބޭނުންވާ ފަރާތްތަކުގެ މެދުގައި ބާއްވާ ޕްރައިމަރީ އަންނަ ނޮވެމްބަރު މަހުގެ ހަތަރު ވަނަ ދުވަހު ބާއްވަން ހަމަޖައްސައިފި އެވެ.
އެމްޑީޕީގެ ޕްރައިމަރީ ބާއްވާނެ ދުވަސް މިއަދު އެމްޑީޕީއިން އިއުލާންކޮށްފައިވާއިރު އެ ޕާޓީން ވަނީ ޕްރައިމަރީގައި ވާދަކުރާ ފަރާތްތަކުގެ މައުލޫމާތު ވެބްސައިޓްގައި ހާމަކޮށްފަ އެވެ.
އެމްޑީޕީއިން ބުނެފައިވަނީ އެ ޕާޓީން ކައުންސިލް އިންތިހާބުގައި 506 ގޮނޑިއަކަށް ވާދަކުރާނެ ކަމަށެވެ. އެއީ، ރަށު ކައުންސިލްތަކުގެ 435 ގޮނޑިއަކަށާއި އަތޮޅު ކައުންސިލްތަކުގެ 51 ގޮނޑިއަކަށް އަދި ސިޓީ ކައުންސިލްތަކުގެ 20 ގޮނޑިއަކަށެވެ.
އެމްޑީޕީ ކައުންސިލް އިންތިހާބަށް ނިކުންނަނީ އިދިކޮޅު އިއްތިހާދުގެ ތެރެއިން އަދާލަތު ޕާޓީއާއެކު އެވެ. އަދާލަތުން ކުރިމަތިލުމަށް ނިންމާފައިވަނީ ޖުމްލަ 147 ގޮނޑިއަކަށް ކަމަށެވެ. އެއީ ރަށު ކައުންސިލްތަކުގެގެ 128 ގޮނޑިއަކަށާއި އަތޮޅު ކައުންސިލްތަކުގެ 16 ގޮނޑިއަކަށް އަދި ސިޓީ ކައުންސިލްގެ ތިން ގޮނޑިއަކަށެވެ.
ދެ ޕާޓީގެ ގުޅިގެން އިންތިހާބަށް ނިކުންނައިރު، އެމްޑީޕީއިން ކުރިމަތިލާފައިމިވަނީ 77 ޕަސެންޓް ގޮނޑިއަށެވެ. އަދާލަތު ޕާޓީން ކުރިމަތިލާފައިވަނީ ބާކީވާ 23 ޕަސެންޓް ގޮނޑިއަށެވެ. މިފަހަރު ކައުންސިލް އިންތިހާބުގައި އިންތިހާބްކުރާ ކައުންސިލަރުންގެ އަދަދަކީ 655 އެވެ.