ޝާޑްސްގެ ޅެންތައް: ޒުވާނެއްގެ ލޯބީގެ ހަދިޔާ

މިފަހަކަށް އައިސް ސޯޝަލް މީޑިއާގައި ޒުވާނުންގެ މެދުގައި އެންމެ ގަދަޔަށް ހިނގަނީ، "ޝާޑްސް"ގެ ޅެންތަކެވެ. އިނގިރޭސި ބަހުން ލިޔެފައިވާ މި ޅެންތަކަށް ވަނީ ބޮޑު ސަމާލުކަމެއް ލިބިފަ އެވެ. ލޯބިވެރިޔާއަށް މެސެޖެއް ދިނުމަށް ވެސް ޒުވާނުން ދަނީ މި ޅެންތަކުގެ ބޭނުން ހިފަމުންނެވެ.

މި ފުރިހަމަ ޅެންތަކުގެ ފަހަތުގައި ހުރީ ހަމަ އެންމެ 18 އަހަރުގެ ޝަހުދާ މުހައްމަދު (ޝާޑްސް) އެވެ. އޭނާއަކީ މި އަހަރުގެ ކައްޓި ހިތްވަރު ފެސްޓިވަލުން އެންމެ ބޮޑު ސަމާލުކަމެއް ދަމައިގަތް އަދި ފެސްޓިވަލުން އެންމެ ބޮޑު ނަފާއެއް ވެސް ހޯދި އެއް ޒުވާނާ އެވެ.

ސީއެޗްއެސްއީ މި އަހަރު ނިންމާލި ޝާޑްސް އަކީ އެންމެ ކުޑައިރު ވެސް ވާހަކަ ފޮތް ކިޔުމަށް މާވަރެއް ހުންނަ ކުއްޖެކެވެ. ވާހަކަ ކިޔަމުން ލިޔުމަކީ ވެސް އޭނާ ކުރަމުން އައި ކަމެކެވެ. ޅެން ހެދުމަށް ހިތް ޖެހުނީ ވެސް އެހެންވެ އެވެ.

"ދެން އެހެން ލިޔާ އެއްޗެހި ކްލާސްމޭޓްސްއިންނަށް ބޮޑަށް ފެންނަނީ، ދެން އެމީހުން އެ ކިޔާފަ ބުނާނެ ވަރަށް ރީއްޗޭ ރީއްޗޭ، ޕޯސްޓްކޮށްބަލާށޭ ވެސް ފްރެންޑްސް ބުނާނެ،" ކައްޓި ހިތްވަރު ފެސްޓިވަލްގައި ހުރެ ޝާޑްސް ބުންޏެވެ.

ޝާޑްސް މީހުންގެ ލޮލުގައި އަޅައިގަތީ ގުރޭޑް 10 ނިންމުމަށްފަހު ލިބުނު ޗުއްޓީގައި އޭނާގެ ޅެންތައް ލިޔެފައި އިންސްޓަގްރާމްގައި ޕޯސްޓްކުރަން ފެށި ހިސާބުންނެވެ. އިންސްޓަގްރާމްގައި ޕޯސްޓްކުރަން ފެށި ޅެންތަކަށް ބޮޑު ތަރުހީބެއް ލިބި، އޭނާގެ އިންސްޓަގްރާމް އެކައުންޓް ވެސް އެތައް ބަޔަކު ފޮލޯކުރަން ފެށި އެވެ. މިހާރު ވެސް އޭނާގެ އިންސްޓަގްރާމް އެކައުންޓް ފޮލޯކުރާ މީހުންގެ އަދަދު ވަނީ 5،000 ގާތްވެފަ އެވެ. އޭގެ ތެރޭގައި ބޭރު މީހުން ވެސް ވަރަށް ގިނަ އެވެ.

"އިންސްޓަގްރާމްގައި ޕޯސްކުރަން ފެށުމުން ވަރަށް ގިނަ ބަޔަކަށް ކަމު ގޮސް ޕޮޒިޓިވް ފީޑްބެކްތައް ލިބެން ފެށި، ދެން ވަރަށް ގިނަ މީހުން ބުނަން ފެށީ ފޮތެއް ލިޔާށޭ،" ޝާޑްސް ބުންޏެވެ.

ޝާޑްސްގެ ގާތު ފޮތެއް ލިޔުމަށް ގިނަ ބަޔަކު އެދެން ފެށުމުން އޭނާއަށް އެކަމާ ދެކޮޅެއް ނުހެދުނެވެ. ކައްޓި ހިތްވަރުން ފުރުސަތު ލިބުމާއެކު ޅެން ފޮތެއް ނެރުމަށް ވިސްނައި އެކަން އޭނާ ވަނީ ކޮށްފަ އެވެ. "ފްރެގްމެންޓްސް"ގެ ނަމުގައި ކައްޓި ހިތްވަރުގައި ޅެން ފޮތް ޝާޑްސް މިވަނީ ނެރެފަ އެވެ. އެ ފޮތުގައި 50 އަށްވުރެ ގިނަ ޅެން ވަނީ ހިމަނާފަ އެވެ.

"މި ފޮތުގައި ހުންނާނީ ޝާޑްސްގެ ހުރިހާ ޅެމެއް ނޫން، އެކަމަކު މިދިޔަ ތްރީ އިޔާސް ތެރޭގައި އެންމެ ގިނަ މީހުންނަށް ކަމުދިޔަ ޕޯމްސްތައް،" ޝާޑްސް ބުންޏެވެ.

ޕްރި އޯޑާކުރި ފަރާތްތަކަށް ފެސްޓިވަލްގެ ފުރަތަމަ ދުވަހު ފޮތެއް 250 ރުފިޔާއަށް ވިއްކިއިރު އެހެން ދުވަސްތަކުގައި ފޮތް ވިއްކާފައިވަނީ 350 ރުފިޔާއަށެވެ. އޭނާ ވަނީ "ފްރެގްމެންޓްސް"ގެ 100 ފޮތް ވިއްކާފަ އެވެ.

"އަސްލު އުއްމީދެއް ނުކުރަން މިވަރުގެ ތަރުހީބެއް ލިބިދާނެ ކަމަކަށް، ފުރަތަމަ 50 ފޮތް ޗާޕްކުރީ ވެސް އެކަމަކު ތަރުހީބު ބޮޑުވެ ޗާޕްސް އިތުރުކުރީ ވެސް،" ޝާޑްސް ބުންޏެވެ.

ލޯތްބާއި ހިތާމަ އަދި އުއްމީދު ފަދަ އެތައް ޖަޒުބާތުތަކެއް ހިމެނޭ މި ޅެންތައް އެކުލެވޭ ފޮތް ގިނަ ޒުވާނުން ގަނެފައިވަނީ އެހެން ފަރާތަކަށް ހަދިޔާކުރުމަށެވެ.

މިހާ ހިސާބުން ޝާޑްސްގެ މަސައްކަތް ނިމުނީއެއް ނޫނެވެ. ކުރިއަށް އޮތްތާ ވެސް ޝާޑްސްގެ މިފަދަ ފޮތްތަކެއް ފެންނާނެ ކަމުގެ އުފާވެރި ހަބަރު އޭނާ ޒުވާނުންނަށް ދިނެވެ. ވަކި ތީމަކަށް ހާއްސަކޮށްގެން ގިނަ ޅެންތަކެއް ހިމެނޭ ފޮތެއް ނެރުމަށް ޝާޑްސް ވަނީ އަމާޒު ހިފާފަ އެވެ.