ފިނޭންސް މިނިސްޓްރީގެ ހިންގުމާއި މަސައްކަތް ހަރުދަނާ ކުރުމުގެ ގޮތުން މިނިސްޓްރީގެ އާ އޮނިގަނޑެއް އެކުލަވާލައި 45 ވަޒީފާ އުވާލަން އެ މިނިސްޓްރީން ނިންމައިފި އެވެ.
ފިނޭންސް މިނިސްޓްޓްރީން ވަނީ އެ ވުޒާރާގައި މަސައްކަތްކުރާ މުވައްޒަފުންގެ ނިސްބަތް މަދުކޮށް ޕްރޮޑަކްޓިވިޓީ އިތުރު ކުރުމުގެ ގޮތުން ބައެއް ވަޒީފާ އުވާލައި އެ ވަޒީފާތަކުގައި ތިބި މުވައްޒަފުން އެހެން އޮފީސްތަކުގެ ވަޒީފާތަކަށް ބަދަލު ކުރުމަށް މިނިސްޓްރީގެ އޮނިގަނޑަށް ބަދަލުތަކެއް ގެންނަން މީގެ ކުރިން ވެސް މަސްތަކެއް ފަށާފަ އެވެ.
އެގޮތުން އެ މަސައްކަތަށް މިނިސްޓްރީގެ ހިއުމަން ރިސޯސް އޮޑިޓެއް ހަދައި މަގާމްތައް މަދުކުރުމާ ބެހޭގޮތުން އެކި މުއައްސަސާތަކާއެކު މަޝްވަރާ ބައްދަލުވުންތައް ބާއްވާފައިވާ ކަމަށް އެ މިނިސްޓްރީން ބުންޏެވެ.
ފިނޭންސުން ބުނީ، އަލަށް އެކުލަވާލި އޮނިގަނޑުގެ ދަށުން މުވައްޒަފުންނާއި މެދު އަމަލުކުރާނެ އުސޫލެއް އެކުލަވާލާފައިވާ ކަމަށާއި، އެ އުސޫލުގެ ދަށުން ޖުމްލަ 45 މަގާމެއް އުވާލަން ހަމަޖެހިފައިވާ ކަމަށެވެ. އަދި މަގާމްތައް އުވުމުން އެ މަގާމްތަކުގައި ތިބި މުވައްޒަފުން އެހެން އޮފީހަކަށް ބަދަލުވާން ބޭނުންނަމަ މިނިސްޓްރީއާ ސިވިލް ސާވިސް ކޮމިޝަނުން އެ އެހީތެރިކަން ފޯރުކޮށްދޭނެ އެވެ.
ފި ނޭންސުން ބުނީ އާ އޮނިގަނޑަށް އަމަލު ކުރަން ފެށުމުން މިނިސްޓްރީގެ މަސައްކަތް އިތުރަށް ހަރުދަނާވެ، މަސައްކަތުގެ ސްޕީޑް އަވަސް ވެގެންދާނެ ކަމަށެވެ. އެހެންކަމުން އަލަށް އެކުލަވާލި އޮނިގަނޑުގެ ދަށުން ގެނެވޭ ބަދަލަކީ ހެޔޮ ބަދަލަކަށް ވާނެ ކަމަށެވެ.