ފެނުގެ ހިދުމަތް ދިނުމަށް އިތުރަށް ބޭނުންވާ ދެ ޕެނަލް ބޯޑު ސީދާ ސިންގަޕޫރުން މިއަދު މާލެ ގެނެސްފި އެވެ. އެއާ އެކު ފެނުގެ ހިދުމަތް އާންމު ހާލަތަކަށް ގެންނަން ބޭނުންވާ ތަކެތި ހަމަވީ ކަމަށް ރައީސް އުފައްދަވާފައިވާ ޓާސްކް ފޯސްގައި އިސްކޮށް އުޅުއްވާ ހޯމް މިނިސްޓަރު ވަނީ ވިދާޅުވެފަ އެވެ.
ސިންގަޕޫރުގައި ރާވައިގެން އެ ގެނައި ޕެނަލް ބޯޑްތައް ގެނެސްފައި ވަނީ ސްރީލަންކާ އެއާފޯސްގެ މަތިންދާ ބޯޓެއްގައި މިއަދު ހެނދުނު އެވެ. އެ ޕެނަލް ބޯޑުތައް ބޭލުމުގެ ސިފައިން މިހާރު އަންނަނީ ކުރަމުންނެވެ.
އުމަރު ވިދާޅުވީ އެމްޑަބްލިއުއެސްސީގައި ހިނގި އަލިފާނުގެ ހާދިސާގައި އެތަނުގެ ތިން ޕެނަލް ބޯޑެއް ފިޔަވައި ހުރިހާ ޕެނަލް ބޯޑެއް ވަނީ ބޭނުން ނުކުރެވޭ ވަރަށް އަނދައިގެން ގޮސްފައި ކަމަށެވެ. އަދި ބޭނުން ކުރެވެން ހުރި ޕެނަލް ބޯޑުތައް މަރާމާތުކޮށް މިހާރު ބޭނުން ކުރަމުން އަންނަ ކަމަށް ވެސް އުމަރު ވިދާޅުވި އެވެ. މިނިސްޓަރު ވިދާޅުވި ގޮތުގައި ސިންގަޕޫރުން ބައެއް ސާމާނު ގެނެސްގެން ދެ ޕެނަލް ބޯޑެއް ރާއްޖޭގައި ހަަދައި އަންނަނީ ބޭނުން ކުރަމުންނެވެ.
"ޕެނަލް ބޯޑުތައް އައިމާ 24 ގަޑިއިރަށް ފެން ދިނުމަށް ކުރަން ޖެހޭ މަސައްކަތް ގާތްގަނޑަކަށް ނިމުމަކާ ހަމައަށް މި އައީ،" އުމަރު ވިދާޅުވި އެވެ.
ފެނުގެ ހިދުމަތް ހަމަޔަކަށް އެޅުވުމަށް ކުރާ މަސައްކަތުގެ ދަށުން، ޓެސްޓަކަށް މިހާރު ވަނީ ބައެއް ސަރަހައްދުތަކަށް ފެން ދޫކޮށްފަ އެވެ. ފެނުގެ މައްސަލަ އަންނަ އާދިއްތަ ދުވަހާ ހަމައަށް ހައްލު ވާނެ ކަމަށް މިހާރު ބެލެވެ އެވެ. ޑިފެންސް މިނިސްޓަރު މުހައްމަދު ނާޒިމް ވެސް ރޭ ވިދާޅުވެފައި ވަނީ ފެން އުފެއްދުން ސްޓޭބުލްކޮށް މިހާރު ހަތަރު ގަޑިއިރަށް ދުވާލަކު ދެ ފަހަރު ފެން ދޫކުރެވިދާނެ ކަމަށެވެ. އަދި މަތީ އިމާރާތްތަކަށް ވެސް މިހާރު ފެން ލިބޭނެ ކަމަށް ވެސް މިނިސްޓަރު ވަނީ ވިދާޅުވެފަ އެވެ.