ރާއްޖޭގެ އެންމެ ބޮޑު ސްކޫލް ހުޅުމާލޭގައި އަޅަން ހަވާލުކޮށްފި

ހުޅުމާލޭގެ ނެއިބަހުޑް އެކެއްގައި 1700 ކުދިންގެ ޖާގައިގެ ބޮޑު ސްކޫލެއް އަޅަން ހައުސިން ޑިވޮލޮޕްމަންޓް ކޯޕަރޭޝަން (އެޗްޑީސީ) އިން އަމީން ކޮންސްޓްރަކްޝަނަށް މަސައްކަތް ހަވާލު ކޮށްފި އެވެ.

އެޗްޑީސީގެ މައި އޮފީހުގައި މިއަދު ބޭއްވި ސޮއި ކުރުމުގެ ރަސްމިއްޔާތުގައި އެ ކުންފުނީގެ މެނޭޖިން ޑިރެކްޓަރު މުހައްމަދު ސައިމަން ވިދާޅުވީ، ނެއިބަހުޑް އެކެއްގައި އަލަށް އިމާރާތް ކުރާ ސްކޫލަކީ ހުޅުމާލޭގެ އިތުރުވަމުން އަންނަ އާބާދީއަށް އެކަށީގެންވާ މިންވަރަށް ތައުލީމުގެ ފުރުސަތު ފަހިކޮށްދިނުމަށް އަޅާ ސްކޫލެއް ކަމަށެވެ. އޭނާ ވިދާޅުވީ މިއީ މިހާތަނަށް ރާއްޖޭގައި އަޅާ އެންމެ ބޮޑު ސްކޫލަށް ވާނެ ކަމަށެވެ.

ސައިމަން ވިދާޅުވީ ހުޅުމާލޭގެ އާބާދީ ބޮޑުތަނުން އިތުރުވަމުން އަންނައިރު މިއަހަރު އަލަށް މީހުން އުޅެން ފަށާ ފްލެޓްތަކާއެކު ހުޅުމާލޭގެ އާބާދީ އަށް އިތުރު 12،000 މީހުން ވަންނާނެ ކަމަށެވެ. -- މިހާރުވެސް އެ ރަށުގައި 30،000 އަށްވުރެ ގިނަ މީހުންގެ އާބާދީއެއް އޮވެ އެވެ.

"[ހުޅުމާލޭގެ] އާބާދީ އިތުރުވަމުން އަންނަ އިރު ސަޕޯޓް ފެސިލިޓީގެ ގޮތުގައި ބަދަލުތަކެއް އެބަ ގެންނަންޖެހޭ. އެގޮތުން އެޑިއުކޭޝަން ދާއިރާ އާއި ހައުސިންގެ ދާއިރާ އާއި މިފަދަ އެތަކެއް ދާއިރާތަކުން ސަޕޯޓް ފެސިލިޓީސްތައް އިތުރު ކުރަން ޖެހިފައި މި އޮތީ. މި ސްކޫލް އަޅަން މި ފަށައިގަނެވެނީ ވެސް ސްކޫލަކަށް ވަރަށް ބޮޑަށް ބޭނުންޖެހިފައިވާ ދަނޑިވަޅެއްގައި،" ސައިމަން ވިދާޅުވި އެވެ.

އާ ސްކޫލްުގެ މަސައްކަތް 132 މިލިއަން ރުފިޔާއަށް އަމީން ކޮސްޓްރަކްޝަނާ ހަވާލު ކުރިއިރު އެ ކުންފުނީގެ މެނޭޖިން ޑިރެކްޓާ އަބްދުﷲ މުހައްމަދު ވިދާޅުވީ މި މިއަދުން ފެށިގެން 14 މަސް ދުވަހުގެ ތެރޭގައި ސްކޫލް ނިންމާނެ ކަމަށާއި އެއީ ރާއްޖޭގައި ވަރަށް ފުރިހަމަ ސްކޫލަކަށްވާނެ ކަމަށެވެ.

މިއީ ނެއިބްހުޑް އެކެއްގައި އަޅާ އެންމެ ފަހުގެ ސްކޫލެވެ. ހަތް ބުރިއަށް ނަގާ އެ ސްކޫލުގައި ރާއްޖޭގެ އެހެން ސްކޫލްތަކާ ހިލާފަށް ހަ ވަނަ ބުރިއާ ހަމައަށް ހާއްސަ އެހީއަށް ބޭނުންވާ ކުދިންނަށް ރޭމްޕް ބަހައްޓަން ވަނީ ނިންމާފަ އެވެ. އަދި ލިފްޓު ހަރުކޮށް، ކޮންމެ ފްލޯ އެއްގައި އައުޓް ޑޯ އޭރިއާއެއް ހެދުމުގެ އިތުރަށް ހާއްސަ އެހީއަށް ބޭނުންވާ ކުދިންނަށް އުޅެން ފަސޭހަވާނެ ފަދަ ގޮތަށް ފަރުމާކޮށްފައިވާ ކްލާސްތަކެއް ވެސް ހަދާނެ އެވެ.