ޖުމްހޫރީ ޕާޓީގެ ލީޑަރު ގާސިމް އިބްރާހިމް ގަވައިދާ ހިލާފަށް ހައްޔަރުކުރި މައްސަލަ ތަހުގީގުކުރަމުން އަންނަ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް)އިން ބުނެފި އެވެ. އެ މައްސަލަ އެޗްއާރްސީއެމްއަށް ހުށަހަޅާފައިވަނީ ގާސިމްގެ ގާނޫނީ ޓީމުންނެވެ.
އެޗްއާރްސީއެމްގެ ނައިބު ރައީސް ޝިފާގު މުފީދު މިއަދު އަވަސްއަށް ވިދާޅުވީ، ގާސިމްގެ ފަރާތުން ހުށަހެޅި މައްސަލަ ތަހުގީގުކުރަމުން އަންނަ ކަމަށެވެ. ތަހުގީގުކުރަމުންދާ މައްސަލައަކަށްވާތީ އެކަމާ ގުޅޭ އިތުރު ތަފްސީލެއް މިވަގުތު ދެވެން ނެތް ކަމަށް ވިދާޅުވި އެވެ.
ޝިފާގު ވިދާޅުވީ، ގާސިމް ހައްޔަރުކޮށްފައި ހުންނެވިއިރު އާއިލާގެ ފަރާތުން ހުށަހެޅި ތަފާތު މައްސަލަތަކަކަކަށް ވެސް އެޗްއާރްސީއެމްއިން ވަގުތުން އެޓެންޑްވެފައިވާނެ ކަމަށެވެ. އެގޮތުން ގާސިމަށް ލިބިގެންޖެހޭ ބޭހެއް ނުލިބިގެން ހުށަހެޅި މައްސަލައަކާއި އާއިލާއަށް ބައްދަލުކުރުމުގެ ފުރުސަތު ނުލިބިގެން ހުށަހެޅި މައްސަލައަކާއި ގާސިމް ބެހެއްޓެވި ތަނުގައި ވައި ދައުރު ނުވާތީ ހުށަހެޅި މައްސަލައެއް ހިމެނޭ ކަމަށެވެ.
"އަޅުގަނޑުމެން އެ މައްސަލަތަކަށް ވަރަށް އަވަހަށް އެޓެންޑްވިން، އަދި ފުލުހުންނާ ވާހަކަ ދައްކައިގެން ގާސިމަށް ލިބިގެން ޖެހޭ ބޭސް ލިބޭނެ ގޮތް ވެސް ހޯދައިދިނިން، މައްސަލަތައް ހުށަހެޅި ދުވަހު އެ މައްސަލަތަކަށް ހައްލު ހޯދައިދިނިން،" ޝިފާގު ވިދާޅުވި އެވެ.
ގާސިމް ހައްޔަރުކޮށްފައިވަނީ ގަވައިދާ ހިލާފަށް ކަމަށް ހައިކޯޓުން ކަނޑައަޅައި، ކުރިމިނަލް ކޯޓުން އެމަނިކުފާނު ބަންދުގައި ބެހެއްޓުމަށް ނެރުނު އަމުރު ވަނީ ބާތިލުކޮށްފަ އެވެ.
ގާސިމް ހައްޔަރުކޮށްފައިވަނީ އިމްތިޔާޒު ގާނޫނުގެ 13 ވަނަ މާއްދާގެ (ހ)އާ ހިލާފަށެވެ. އެ ގާނޫނުގެ އެ މާއްދާގައި ބުނެފައިވަނީ، ޖިނާއީ ކުށެއް ކުރަނިކޮށް ހިފިއްޖެ ހިނދެއްގައި މެނުވީ ރައްޔިތުންގެ މަޖިލީހުގެ މެންބަރަކު ޖިނާއީ މައްސަލައެއްގެ ތަހުގީގަށް ހައްޔަރުކުރަން ބޭނުންވެއްޖެނަމަ އެކަން ކުރަންވާނީ ސުޕީރިއާ ކޯޓެއް ނުވަތަ އެއަށްވުރެ މަތީ ކޯޓެއްގެ ކޯޓު އަމުރަކަށް ކަމަށެވެ. އަދި މިފަދަ އަމުރަކަށް އެ ކޯޓުގައި އެދޭނީ އެ މައްސަލައެއް ތަހުގީގުކުރާ ފަރާތުން ޕްރޮސިކިއުޓާ ޖެނެރަލަށް ހުށަހެޅުމުން ޕްރޮސިކިއުޓާ ޖެނެރަލަށް ފެނިއްޖެނަމަ އެވެ.
މިކަމާ ގުޅިގެން ގާނޫނީ ގިނަ ބޭފުޅުންގެ ފާޑުކިޔުން ޕްރޮސިކިއުޓާ ޖެނެރަލަށާއި ފުލުހުންނަށް ވަރަށް ބޮޑަށް ވަނީ އަމާޒުވެފަ އެވެ. ނަމަވެސް އެކަމާ ގުޅިގެން ޕީޖީއިން ވެސް އަދި ފުލުހުން ވެސް ރަސްމީކޮށް ވަކި އެއްޗެއް ބުނެފައެއް ނުވެ އެވެ.