މަޝްހޫރު ވިޔަފާވެރިޔާ އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ފަސް ކުންފުންޏަކުން ދައުލަތަށް 166 މިލިއަން ޑޮލަރު ދައްކަންޖެހޭ ކަމަށް ބުނެ މީރާއިން ސިވިލް ކޯޓުގައި ދައުވާކޮށް އެކަން މީޑިއާއަށް ހާމަކޮށްފައިވީ ނަމަވެސް އެ ކުންފުނިތަކުން ދައުލަތަށް ދައްކަންޖެހޭ ފައިސާއެއް ނޯންނާނެ ކަމަށް ކުންފުނިތަކުގެ ވަކީލުން ވިދާޅުވެއްޖެ އެވެ.
ގާސިމްގެ ފަސް ކުނި ކަމަށްވާ ވިލާ ހޮލިޑޭ، ވިލާ ޝިޕިން، ވިލާ ހޮޓެލްސް، ގަޒީރާ، އަދި މާނެންފުށީގެ ވަކީލުން ނެރުނު ބަޔާނެއްގައި ބުނެފައިވަނީ، ފަސް ކުންފުންޏާއެކު ސަރުކާރުން ވެފައިވާ ފަސް އެއްބަސްވުމުގެ ދަށުން ކުއްޔަށް ދޫކޮށްފައިވާ ފަޅުތަކާއި ރަށްތައް ސަރުކާރަށް ކުލި ދައްކަންޖެހޭ މުއްދަތު އައިސްފައި ނުވަނީސް އަދި ކޮންސްޓްރަކްޝަނަށް ދީފައިވާ މުއްދަތު ހަމަނުވަނީސް އެއްބަސްވުމާ ހިލާފަށް 2015 ވަނަ އަހަރުގެ ފެބްރުއަރީ މަހުގެ ފަސްވަނަ ދުވަހު ސިޓީއަކުން އެ އެއްބަސްވުންތައް ބާތިލުކޮށްފައިވާކަން ޓޫރިޒަމް މިނިސްޓްރީން އަންގާފައިވާ ކަމަށެވެ.
އެ އެންގުމަކީ އެއްބަސްވުމާ ހިލާފު އެންގުމެއް ކަމަށް ބުނެ އެ ކުންފުނިތަކުން ވަނީ ކޯޓަށް މައްސަލަ ހުށަހަޅާފަ އެވެ. އެ މައްސަލަތައް މިހާރު އޮތީ ސުޕްރީމް ކޯޓުގަ އެވެ. މައްސަލަތަކުގެ އިބްތިދާއީ އަޑުއެހުން ސުޕްރީމް ކޯޓުގައި ވަނީ ބާއްވާފަ އެވެ.
"އެ މައްސަލަތަކާ ގުޅިގެން ސުޕްރީމް ކޯޓުން އަދި ވަކި ގޮތެއް ނިންމާފައެއް ނުވޭ، އެހެންކަމުން ކޯޓު މަރުހަލާއިން އެއްބަސްވުންތައް ބާތިލުކުރި މައްސަލަ ނުނިމެނީސް މީރާއިން ވުޖޫދުގައިނުވާ ކަންތައްތަކަކަށް ރިއާޔަތްކޮށް ގިނަ އަދަދެއްގެ ފައިސާތަކެއް ދައްކަން އަންގައި ބެންކް އެކައުންޓްތައް ހިފަހައްޓައި، ދައުލަތުންދޭ ބައެއް ހިދުމަތްތައް ކަނޑާލައި، މައްސަލަ ސިވިލް ކޯޓަށް ހުށަހެޅުމުން ކުންފުނިތަކަށް އިންތިހާ ބޮޑު ގެއްލުމެއް ދަނީ ވަމުން،" ބަޔާނުގައި ވަކީލުން ބުނެފައިވެ އެވެ.
ބަޔާނުގައި އިތުރަށް ބުނެފައިވަނީ، މިނިސްޓްރީއާއެކު ކުންފުނިތަކުންވީ އެއްބަސްވުމުގައިވާ ގޮތުން ވެސް އެއްވެސް ކުންފުންޏަކުން ދައުލަތަށް ދައްކަންޖެހޭ ފައިސާއެއް ނޯންނާނެކަން އެނގޭ ކަމަށެވެ. އެއްބަސްވުމުގެ ދަށުން ކުލި ދައްކަން ޖެހެނީ ވެސް ރިސޯޓް ހަދައި ހިންގަން ފެށުމުން ނުވަތަ ކޮންސްޓްރަކްޝަން ޕީރިއަޑް ހަމަވުމުން ކަމަށެވެ. އެގޮތުން ކޮންސްޓްރަކްޝަން ޕީރިއަޑް ހަމަވެގެން ރަށްތަކުގެ ކުލި ދައްކަންޖެހެނީ ޑިސެމްބަރު 2018 އިން ފެށިގެން ކަމަށާއި ފަޅުތަކުގެ ކުލި ދައްކަން ޖެހެނީ ޑިސެމްބަރު 2020 އިން ފެށިގެން ކަމަށް ވަކީލުންގެ ބަޔާނުގައި ބުނެފައިވެ އެވެ. ކުންފުނިތަކުން އެޑްވާންސް ކުލީގެ ގޮތުގައި ފަނަ މިލިއަނަށްވުރެ ގިނަ ޑޮލަރު ދައްކާފައިވާ ކަމަށް ވެސް ބުންޏެވެ.
ގާސިމްގެ ވިލާ ހޮލިޑޭސްއަށް މީރާއިން ދައުވާކޮށްފައިވަނީ އެ ކުންފުނީގެ އަތުން 35 މިލިއަން ޑޮލަރު ހޯދުމަށެވެ. މާމެންފުށީގެ އަތުން 77 މިލިއަން ޑޮލަރު ހޯދަން ދައުވާކޮށްފައިވާއިރު ގަޒީރާ ދައްކަންޖެހޭނީ 17 މިލިއަން ޑޮލަރެވެ. އެއީ ޖުމްލަ 129 މިލިއަން ޑޮލަރެވެ. (1.9 ބިލިއަން ރުފިޔާއެވެ.) ވިލާ ޝިޕިން ކުންފުންޏާއި ވިލާ ހޮޓެލްސްގެ އަތުން 37 މިލިއަން ޑޮލަރު ހޯދުމަށް ވެސް މީރާއިން ވަނީ ދައުވާކޮށްފަ އެވެ.