މިއީ އާ ކަމެއް ނޫނެވެ. އަބަދުވެސް ގޮތެވެ. ރޯދަ މަސް ފެށުމާއެކު ނުވަތަ ފުރަތަމަ ދިހައެއްގައި މިސްކިތްތައް ވަރަށް ބާރު ބޮޑުވެ އެވެ. މެންދުރު ނަމާދާއި އަސުރު ނަމާދަށް ހާއްސަ ގޮތެއްގައި ޖަމާއަތް ބޮޑުވެ އެވެ. ނަމަވެސް ރޯދަ މަސް ކުރިއަށް ދިޔަ ވަރަކަށް ސަފު މަދުވެ އެވެ.
މި ރޯދަ މަހު ވެސް އެތަން މިހާރު އެބަ ފެނެ އެވެ. ރޯދަ މަސް ފެށުނުތާ ކައިރީ މެންދުރު ނަމާދާއި އަސުރު ނަމާދަށް ވަރަށް ގިނަ ބަޔަކު ދިޔަ އެވެ. މިސްކިތްތައް އެއްކޮށް ފުރި، ގިނަ މިސްކިތްތަކުގެ ބޭރުގައި ވެސް ސަފު ހަދަންޖެހުނެވެ. އާންމުކޮށް ހުކުރު ނަމާދުގައި ނޫނީ މި މަންޒަރު ނުފެންނާނެ އެވެ. ނަމަވެސް މިހާރު މަގުމަތީ ސަފު ހަދަން ޖެހުނަސް ޖެހެނީ މަދު މިސްކިތެއްގެ ދޮށުގަ އެވެ. އެތަން ވެސް ފެންނަނީ އިޝާ ނަމާދަށްފަހު ތަރާވީސް ނަމާދުކުރާ ވަގުތުތަކުގަ އެވެ.
މިއީ އެދެވިގެންވާނެ ގޮތެއް ނޫނެވެ. ރޯދަ މަހަކީ ވަރަށް މާތް ދުވަސްތަކެވެ. މި ދުވަސްތަކުގައި ކުރާ ހެޔޮ އަމަލުގެ ސަވާބާއި ދަރުމަ، އެހެން މައްސަރުތަކުގަ ކުރާ ހެޔޮ އަމަލުތަކުގެ ސަވާބާއި ދަރުމައަށްވުރެ މާތްﷲ އިތުރުކޮށްދެއްވަ އެވެ. އެހެންކަމުން ހެޔޮ އަމަލުކުރުމާއި ޖަމާއަތުގައި ނަމާދުކުރުން މި މަސް ތެރޭގައި އިތުރުކުރަންޖެހެ އެވެ.
ނަމާދަށް ޖަމާއަތަށް ދާ މީހުން ރޯދަ މަސް ފެށުނު އިރަށްވުރެ މިހާރު މަދުވެފައިވީ ނަމަވެސް މިސްކިތްތަކުން ވަރަށް އުފާވެރި މަންޒަރުތަކެއް ވެސް ފެނެ އެވެ. އެއީ ޖަމާއަތަށް ނޫނަސް ގިނަ ޒުވާނުންތަކެއް މެންދުރު ވެސް ހަވީރު މިސްކިތަށް ދާ ކަމެވެ. އަދި މިސްކިތްތަކުގައި ޤުރުއާން ކިޔެވުމުގައި ވެސް ގިނަ ވަގުތުތަކެއް ޒުވާނުން ހޭދަކުރެ އެވެ.
ހަތަރު ދުވަސް ފަހުން މި ބަރަކާތްތެރި މައްސަރުގެ ފަހު ދިހައެއް ކުރިމަތިވެގެން އަންނައިރު ޖަމާއަތުގައި ކޮންމެ ނަމާދެއް ވެސް ކުރުމަށް އަޒުމު ކަނޑައެޅުމަކީ މުހިންމު ކަމެކެވެ. އެއީ، ޖަމާއަތުގައި ނަމާދުކުރުމަކީ އޭގެ ސަވާބު އެތައް ގުނައެއް އިތުރުވެގެންދާނެ ކަމެއް ކަމަށްވާތީ އެވެ. އަދި ސުންނަތް ނަމާދު އިތުރުކޮށް ރޭ އަޅުކަމުގައި ވަގުތުތައް ހޭދަކުރުމަކީ ވެސް ވަރަށް މުހިންމު ކަމެކެވެ. ފަހު ދިހައެއްގައި ބަރަކާތްތެރި ރެއެއް ހިމެނެ އެވެ. އެއީ، ލައިލަތުލްގަދުރުވި ވިލޭ ރޭ އެވެ. އެ ރޭގެ އިންތިޒާރުގައި މުސްލިމުން މަސައްކަތް ކުރަންޖެހެ އެވެ. އެ ރޭ ހާސިލުކުރުމަށް މަސައްކަތް ކުރަންޖެހެ އެވެ. އެ ރެއަކީ 1،000 މައްސަރަށްވުރެ ހެޔޮކަން ބޮޑުވެގެންވާ ރެއެކެވެ.