މި ދެތިން ދުވަހު ސޯޝަލް މީޑިއާގައި ވެސް އެންމެ ހޫނީ ސިޔާސީ މަސްރަހުގެ ވާހަކަތަކާއި ފާޑުކިއުމެވެ. އިތުރު ކަމަކަށް ސަމާލުކަން ދޭނެ ބަޔަކު ހަމަ އެއްގޮތަކަށް ވެސް ނެތެވެ. ނަމަވެސް މިއަދު ހެނދުނު އިރު އަރައިގެން އައި އިރު ސޯޝަލް މީޑީއާގައި އެންމެ ހޫނުވެގެން އުޅުނީ މާލޭގެ މަގުމަތީގައި އަންހެނެއްގެ ހެދުން ފިިރިހެނަކު "ބާލުވައި" އޭނާ އޮބައިގަންގެން އުޅޭ މަންޒަރު ފެންނަ ގާތް ގަނޑަކަށް ބަރަހަނާ ފޮޓޯ ތަކެކެވެ. އެ ފޮޓޯތައް ސޯޝަލް މީޑީއާގެ ތެރެއަށް ދޫކޮށްލުމާއެކު އެ އަންހެން މީހާގެ ދިފާއުގައި އެންމެހެން ނުކުތެވެ. އެ ފިިރިހެން މީހާ ވަރުގެ ނުބައި ނުލަފާ މީހަކު ވެސް ނެތެވެ. އޭނާ އާ ދިމާލަށް "ހެއްދެވި ނެހެއްދެވި" އަށް ގޮވާ ހީވީ އެހެން ފަދަ ކަމެއް ލައިގަތްހެނެވެ.
އެއްވެސް މީހަކު އޭގެ ހަގީގަތް ބަލާކަށް ބޭނުމެއް ނުވި އެވެ. ހޯދަން މަސައްކަތެއް ވެސް ނުކުރެ އެވެ. އަންހެނުންގެ ހައްގުތަކުގައި ހިފައިގެން ތެޅިފޮޅިގަތީ އެވެ. ބައެއް މީހުން ވަނީ އެ ފިރިހެން މީހާ ގަދަކަމުން އަންހެން މީހާއާ ބެހެން އުޅުނު ކަމުގެ ތުހުމަތުކޮށް އެތައް ވާހަކައެއް ފަތުރާލާފަ އެވެ. އަދި ބައެއް މީހުން އަނިޔާ ކުރަން އުޅުނު ކަމުގެ ތުުހުމަތު ވެސް ކުރި އެވެ.
އެކަމަކު ކަންވީ މުޅީން ތިޔަ ހީކުރި ގޮތަކަށް ނޫނެވެ. އެ އަންހެން މީހަކީ އެ ފިރިހެން މީހާއަށް ބިރު ދައްކައި ފޭރެން އުޅުނު މީހެކެވެ. ފުލުހުން މިހާރު ވަނީ އެ އަންހެން މީހާ ހައްޔަރުކޮށްފަ އެވެ. އަދިވެސް ހުރީ ފުލުހުންގެ ހައްޔަރުގަ އެވެ.
ފުލުހުން ބުނީ އެ އަންހެން މީހާ ފިރިހެން މީހާގެ އަތުން ފޭރެން އުޅުމުން ފިރިހެން މީހާ އެ އަންހެން މީހާގެ ހެދުމުގައި ހިފި ވަގުތު ހެދުން ވީދައިގެން ދިއުމާއެކު މަގު މައްޗަށް ހެދުން ދޫކޮށްލާފައި ފިލީ ކަމަށެވެ. ތަހުގީގު ކުރަމުންދާ މައްސަލައަކަށް ވާތީ އިތުރު ތަފްސީލެއް ފުލުހުން ހާމައެއް ނުކުރެ އެވެ. އެމައްސަލަ ފުލުހުންނަށް ރިޕޯޓުކޮށްފައިވަނީ މިއަދު ހެނދުނު 11:30 ހާއިރު އެވެ.
ފޭރުމުގެ މައްސަލަތަކެއްގައި މިދިޔަ ރޯދަމަހު ވެސް މާލެއިން ވަނީ އަންހެނަކު ހައްޔަރުކޮށްފަ އެވެ.