ރައީސް އަބްދުﷲ ޔާމީން ރޭ ބޭއްވި މިނިވަން ދުވަހުގެ ރަސްމީ ބައްދަލުވުމުގައި ކުރީ އަހަރުތަކާ ހިލާފަށް މުޅިން އާ ކަމެއް ވަނީ ފާހަގަވެގެން ގޮސްފަ އެވެ. ރަސްމީ ބައްދަލުވުމުގައި ބޭފުޅުން ތުރުކުރައްވައި ހެދުންތަކަކީ އަބަދުވެސް އެކަމަށް ސަމާލުކަން ހުއްޓޭ ކަމެކެވެ. ހާއްސަކޮށް އަންހެން ބޭފުޅުންގެ އެވެ. މީގެ ކުރިން ދިވެހި ރަތް ލިބާހުގައި ދުންޔާ މައުމޫން އެ ބައްދަލުވުމުގައި "ވިދާލި" އެވެ. ނަމަވެސް ރޭގެ އެ ބައްދަލުވުމުގައި އެންމެ "ވިދާލާފައި" ވަނީ ޑިފެންސް މިނިސްޓަރު އާދަމް ޝަރީފު އުމަރެވެ. ހާއްސަ ސަބަބަކަށްޓަ އެވެ.
ރޭ ޑިފެންސް މިނިސްޓަރު ހުންނެވީ، އަސްލު ދިވެހި ގައުމީ ހެދުމުގަ އެވެ. މިނިސްޓަރު ތުރުކުރައްވާފައި ހުންނެވީ އަތްދިގު ގަމީހަކާއި ހުދުމުންޑެކެވެ. ޖީބަށް ރުމާ ޖައްސަވާފައި ހުންނެވިއިރު ބޮލުގައި ތާކިހާ ވެސް ހުންނެވީ އަޅުއްވައިގެންނެވެ.
ޑިފެންސް މިނިސްޓަރު މި ހެދުމުގައި ފެނިގެންގޮސްފައިވާއިރު މިފަހަކަށް އައިސް ރަސްމީ ބައްދަލުވުންތަކުގައި ފިރިހެން ބޭފުޅުން ކޯޓު ފަޓުލޫނު ނޫން އެހެން ހެދުމެއް ނުލަ އެވެ. ރޭ ވެސް ޑިފެންސް މިނިސްޓަރު ނޫން އެހެން ހުރިހާ ބޭފުޅުން ތިއްބެވީ ކޯޓު ފަޓުލޫނުގަ އެވެ.
ކޯޓު ފަޓުލޫނާއި އަންހެން ބޭފުޅުންގެ ދިގު ހެދުމަކީ ރާއްޖޭގެ ރަސްމީ ހެދުމެވެ. އަންހެން ބޭފުޅުންގެ ރަސްމީ ހެދުމެއްގެ ގޮތުގައި ދިވެހިވަންތަ ހެދުމެއް ބޭނުންކޮށްފައި ފިރިހެން ބޭފުޅުންގެ ރަސްމީ ހެދުމަށް ކޯޓު ފަޓުލޫނު ބޭނުންކުރުމަކީ ދިވެހި ސަގާގަތަށް ލޯބިކުރާ ބޭފުޅުން އަބަދުވެސް ފާޑުވިދާޅުވާ ކަމެކެވެ. މިފަހުން އަވަށްޓެރި ސްރިލަންކާގައި ވެސް ވަނީ ކޯޓު ފަޓުލޫނަކީ އެމީހުންގެ ރަސްމީ ހެދުމެއް ނޫން ކަމަަށް ކަނޑައަޅާފަ އެވެ.
ދިވެހިންނަކީ އަބަދުވެސް އަމިއްލަވަންތަ ކަންތައްތަކެއް ގެންގުޅޭ ބަޔަކަށްވާއިރު ރަަސްމީ ހެދުމަކަށް ބޭރުން އެތެރެކޮށްފައިވާ ހެދުމެއް ބޭނުންކުރުމުގެ މާބޮޑު ބޭނުމެއް ވެސް ނެތެވެ. ދިވެހިންގެ އަމިއްލަ ހެދުންތަކާއި ގޮތްތައް އެބަހުއްޓެވެ.
ރާއްޖެއާ އަވަށްޓެރި ގިނަ ގައުމުތަކުގެ އިސް ބޭފުޅުން ވެސް އެހެން ގައުމުތަކުގައި އޮންނަ ރަސްމީ ބައްދަލުވުންތަކުގައި ވެސް އެ ގައުމެއްގެ ރަސްމީ ހެދުންގެ ގޮތުގައި ބޭނުންކުރާ އެ ގައުމަށް ހާއްސަ ހެދުން ތުރުކުރައްވަ އެވެ. އެގޮތުން ނޭޕާލް، ބޫޓާން، އަފްގާނިސްތާނު ފަދަ ގައުމުތައް އެކަމުގައި ފާހަގަކޮށްލެވެ އެވެ.
ރޭ ޑިފެންސް މިނިސްޓަރު އެ ހެދުން ތުރުކުރައްވާފައިވާއިރު ދައުލަތުގެ ވަޒީރުންގެ ފެންވަރުގައި ހުންނަވާ ބޭފުޅެއް މިފަދަ ހެދުމެއް މިފަހުގެ ތާރީހުގައި ތުރުކުރެއްވި މިއީ ފުރަތަމަ ފަހަރު ކަމަށްވާނެ އެވެ. ގިނަ ބަޔަކު ވަނީ އެކަމަށް މިނިސްޓަރަށް ތައުރީފްކޮށް އެކުގައި ފޮޓޯ ވެސް ނަންގަވާފަ އެވެ. މިނިސްޓަރާއެކު މިނިސްޓަރުގެ އަނބިކަނބަލުން ވެސް ހުންނެވީ އެންމެ ދިވެހިވަންތަ ގޮތަށް ދިވެހި ރަތް ލިބާސް ތުރުކުރައްވައިގެންނެވެ.