ކުނި އުކުމުގެ ގަވާއިދަށް އިއްޔެ އިން ފެށިގެން އަމަލު ކުރަން ފެށިއިރު، މިހާތަނަށް 10،000 އަށް ވުރެ ގޭބިސީ ރަޖިސްޓްރީކޮށްފައިވާ ކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން މިއަދު ބުނެފި އެވެ.
ވެމްކޯގެ މެނޭޖިން ޑިރެކްޓަރު މުހައްމަދު ޝިފާއު "އަވަސް" އަށް ވިދާޅުވީ ރަޖިސްޓްރީ ކުރަން ހުޅުވާލުމުގެ އެންމެ ފަހު ވަގުތު ގިނަ ބަޔަކު ރަޖިސްޓްރީ ކުރަމުންދާ ކަމަށާއި، އެހެންކަމުން އެ ކުންފުނިން 24 ގަޑިއިރު މަސައްކަތް ކުރަމުންދާ ކަމަށެވެ.
"އެންމެ ފަހު ވަގުތަށް ދިވެހިން މި ތިބެނީ އެހެންވެ އިއްޔެ އާއި މިއަދު މީހުން ރަޖިސްޓްރީ ކުރަން ވަރަށް ގިނަ ބަޔަކު ދިޔަ. މިހާރު އިއްޔެ 2،000 ގިނަ ފޯމު އަދި މިއަދުވެސް 3،000 ގިނަ ފޯމު ލިބިފައިވޭ،" ޝިފާއު ވިދާޅުވި އެވެ.
ވެމްކޯ އިން ވަނީ ކުނި އުކުމުގެ ހިދުމަތް ދޭން ރަޖިސްޓްރީ ކުރަން ބޭނުންވާ ފަރާތްތަކަށް ގިނަ ފުރުސަތުތަކެއް އަދިވެސް ހުޅުވާލާފަ އެވެ. މިގޮތުން މާލެ އިންޑަސްޓްރިއަލް ވިލެޖާއި މާލޭގެ ބައެއް ލޮކޭޝަންތައް އަދި އޮންލައިން މެދުވެރިކޮށްވެސް މި ފުރުސަތު ހުޅުވާލާފައިވެ އެވެ.
އެމްޑީ، ޝިފާއު ވިދާޅުވީ އޮންލައިންކޮށް ދުވާލެއްގެ މައްޗަށް 1،000 އަށްވުރެ ގިނަ އެޕްލިކޭޝަން ލިބޭ ކަމަށެވެ.
"އަޅުގަނޑުމެން އެދެނީ ވީހާ އަވަހަކަށް ރަޖިސްޓްރީ ކުރަން. އެ ފުރުސަތު ވަނީ ހުޅުވާލާފަ،" ޝިފާއު ވިދާޅުވި އެވެ.
ވެމްކޯއިން މާލެއިން ކުނި އުކާލަން ނަގަނީ އެޕާޓްމަންޓް ތަކުން 150ރ. އެވެ. އަދި އެއް ތަނަކަށް ޖަމާކުރާނަމަ ކޮންމެ އެޕާޓްމަންޓަކުން 100ރ. ގެ ފީއެއް ނަގާނެ އެވެ. މިގޮތުން މާލޭގައި 27،000 ގޭބިސީއެއް ހުރެ އެވެ.
ސަރުކާރުން ވަނީ ކުނި އުކުން ހަރުދަނާ ކުރުމުގެ ގޮތުން އިއްޔެ އިން ފެށިގެން ރަޖިސްޓްރީ ނުކޮށް ގޭގެއިން ބިދޭސީންނާ ހަވާލުކޮށްގެން ކުނި އުކާލުމަކީ މަނާ ކަމެއްގެ ގޮތުގައި ހަމަޖައްސައި ގަވާއިދެއް ހަދާފައެވެ.