ހަތަރު މެންބަރުންގެ ގޮނޑީގެ މައްސަލާގައި ރޭ ސުޕްރީމް ކޯޓުން ނިންމި ނިންމުން ތަންފީޒުކުރަން އަމަލުކުރާނެ ގޮތެއް އިދިކޮޅު ޕާޓީތަކުން މަޝްވަރާކުރަމުންދާ ކަމަށް ޕާޓީތަކުގެ ފަރާތުން މިއަދު ކެންދޫ ދާއިރާގެ މެންބަރު އަލީ ހުސެއިން ވިދާޅުވެއްޖެ އެވެ.
ކުނޫޒުގައި މިއަދު ހަވީރު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އަލީ ހުސެއިން ވިދާޅުވީ، މެންބަރުންގެ ގޮނޑީގެ މައްސަލާގައި ސުޕްރީމް ކޯޓުގެ ނިންމުމަށް ބަލައިގެން ކަމަށް ބުނެ އިލެކްޝަން ކޮމިޝަނުން އަމަލުކުރަމުންދަނީ އެ ނިންމުމާ ހިލާފަށް ކަމަށެވެ. އިލެކްޝަން ކޮމިޝަނަށް އެ ދާއިރާތަކުގެ ބައި އިލެކްޝަން ކުރިއަށް ނުގެންދެވޭނެ ކަމަށެވެ. އަލީ ހުސެއިން ވިދާޅުވީ، ބައި އިލެކްޝަން އިއުލާން ކޮށްފައިވަނީ ސުޕްރީމް ކޯޓުގެ ހުރުމަތް ކަނޑާލައި ސުޕްރީމް ކޯޓުގެ ނިންމުމަށް ގޮންޖައްސަވާފަ ކަމަށެވެ.
އަލީ ހުސެއިން ވިދާޅުވީ، ބައި އިލެކްޝަން ބާއްވަން ޖެހޭ އެއްވެސް ސަބަބެއް ނުވަތަ ހަމައެއް އޮތް ކަމަށް ގަބޫލު ނުކުރައްވާ ކަމަށާއި އެފަދަ ހަމައެއް އޮތްނަމަ ސުޕްރީމް ކޯޓުގެ ނިންމުމުގައި އެކަން ބަޔާންކޮށްފައި އޮންނާނެ ކަމަށެވެ. އެހެންކަމުން ސުޕްރީމް ކޯޓުގެ ނިންމުން ވަރަށް ސާފު ކަމަށާއި މެންބަރުންގެ ގޮނޑި ނުގެއްލޭ ކަމަށެވެ. އެ ނިންމުން ތަންފީޒުކުރުމަށް ކުރަންޖެހޭ ކަންކަން ކުރުމަށް ދެން އަމަލުކުރާނެ ގޮތެއް މިހާރު މަޝްވަރާކުރަމުންދާ ކަމަށް ވެސް އަލީ ހުސެއިން ވިދާޅުވި އެވެ.
"އަޅުގަނޑުމެން މީގަ އަމަލުކުރާނެ ގޮތެއް މިފަނީ ޕާޓީތަކުގެ މެދުގަ މަޝްވަރާކުރަމުން، މި ނިންމުން ތަންފީޒުކުރުމަށްޓަކައި ނުވަތަ ނިންމުން އިތުރަށް ތަފްސީރުކޮށް ސަރަހަކުރުމަށްޓަކައި އަޅުގަނޑުމެން ކުރާނީ ކޮން ކަމެއްތޯ ދާނީ ކޮން ކޯޓަކަށްތޯ، ގާނޫނީ ގޮތުން އަޅާނީ ކޮން ފިޔަވަޅެއްތޯ، އަޅުގަނޑުމެން މިދަނީ ގުޅިފައިވާ ޕާޓީތަކުން މަޝްވަރާކުރަމުން،" ނޫސްވެރިންގެ ބައްދަލުވުމުގައި އަވަސްއިން ކުރި ސުވާލަކަށް ޖަވާބު ދެއްވަމުން އަލީ ހުސެއިން ވިދާޅުވި އެވެ.
އަލީ ހުސެއިން ވިދާޅުވީ، ކޯޓަކުން ހުކުމެއް ކުރީމަ އެއަށް އަމަލުކުރުމަކީ ދައުލަތުގެ މުއައްސަސާތަކުގެ މައްޗަށް ވެސް ލާޒިމްވާ ކަމެއް ކަމަށެވެ. ނަމަވެސް އިލެކްޝަން ކޮމިޝަނުން އަމަލުކުރަމުން ދަނީ މިނިވަންކަމެއް ނެތި، ކޯޓުގެ ހުކުމްތަކަށް ވެސް ބެލުމެއް ނެތި ސަރުކާރުން އަންގާހާ ގޮތަކަށް ކަމަށެވެ.
"އެކަމުގެ ހެއްކެއް ރޭގަ ވެސް އަޅުގަނޑުމެންނަށް ފެނިގެން އެދިޔައީ، ގާތްގަނޑަކަށް 7:30 ގައި އަޅުގަނޑުމެންނަށް ސުޕްރީމް ކޯޓުގެ ނިންމުން ލިބުނީ، އެގާރަ ޖަހަން އުޅެނިކޮށް އިލެކްޝަން ކޮމިޝަނުން ބައި އިލެކްޝަން ބާއްވަން ނިންމައި މިކަހަލަ ވާހަކަތަކެއް ބަޔާންކޮށް ނޫސް ބަޔާނެއް ނެރުނުތަން، އިލެކްޝަން ކޮމިޝަނުން ކަންކަން ނިންމަންޖެހޭނީ ޖަލްސާތައް ބާއްވައި އެކަމާ ގުޅޭ ގޮތުން މަޝްވަރާކޮށްގެން، އެކަމަކު އަޅުގަނޑުމެންނަށް ގަބޫލުކުރެވެނީ އެގޮަތަކަށް ނޫން އަމަލުކޮށްފަ އޮތީ،" އަލީ ހުސެއިން ވިދާޅުވި އެވެ.
ސުޕްރީމް ކޯޓުގެ ނިންމުމުގައިވާ ކަންކަން ވަރަށް ސާފުވާއިރު، ބައި އިލެކްޝަނަށް ދިޔުމުގެ ހާލަތެއް ނެތް ކަމަށާއި އެހެންކަމުން ބައި އިލެކްޝަން ހުއްޓުވަން ކޯޓަށް ދިޔުމާ ގުޅޭ ގޮތުން ޕާޓީތަކުން ނިންމާނެ ނިންމުމެއް ނެތް ކަމަށް ވެސް އަލީ ހުސެއިން ވިދާޅުވި އެވެ.