ރާއްޖޭގެ ގައުމީ އުފެއްދުންތެރިކަމުގެ މިންގަނޑު މުރާޖައާކޮށްފި

އިތުރު މައުލޫމާތަށް ހިމަނައި ރާއްޖޭގެ، ގްރޮސް ޑޮމެސްޓިކް ޕްރޮޑަކްޓް (ޖީޑީޕީ) ނުވަތަ ގައުމީ އުފެއްދުންތެރިކަމުގެ މިންގަނޑު ނޭޝަނަލް ބިއުރޯ އޮފް ސްޓެޓިސްޓިކްސް (އެންބީއޯއެސް) އިން މުރާޖައާކޮށް އަލުން، ނެރެފި އެވެ.

ޖީޑީޕީއަކީ ގައުމުގައި އަހަރެއްގެ ތެރޭގައި އުފައްދާ ތަކެއްޗާއި ވިއްކާ ހިދުމަތުގެ ޖުމްލަ އަގެވެ.

ޖީޑީޕީ އެކުލަވާލަނީ ވަކި އަހަރެއްގައި އިގްތިސާދުގެ އޮނިގަނޑު ބިނާވެފައިވާ ގޮތް ދިރާސާކޮށް ބެލުމަށްފަހު އެ އޮނިގަނޑުގެ މައްޗަށް ބިނާކޮށްގެންނެވެ. މިގޮތުން ރާއްޖޭގެ ގައުމީ އުފެއްދުންތެރިކަމުގެ މިންގަނޑުގެ ޖީޑީޕީ ބޭސް އިޔާގެ ގޮތުގައި ކުރިން ބަލަމުން އައީ 2003 ވަނަ އަހަރެވެ.

ރާއްޖޭގެ ތަފާސް ހިސާބުތައް ބަލަހައްޓާ، ނޭޝަނަލް ބިއުރޯ އޮފް ސްޓެޓިސްޓިކްސް އިން ބުނި ގޮތުގައި ޖީޑީޕީ ބޭސް އަހަރު މުރާޖައާ ކުރީ އިގްތިސާދަށް އައިސްފައިވާ ބަދަލުތައް ޖީޑީޕީން ރަމްޒުކޮށްދިނުމަކީ މުހިންމު ކަމެއްގެ ގޮތުގައި ފެންނާތީ ކަމަށެވެ. އަދި ގަވައިދުން ރިއަލް ޖީޑީޕީ ބިނާކޮށްފައިވާ އަހަރު ނުވަތަ ބޭސް އިޔާ ބަދަލުކޮށް އިގްތިސާދީ އޮނިގަނޑަށް އަންނަ ބަދަލުތައް ޖީޑީޕީ ހިސާބުތަކުން ދެއްކުމަކީ އޭގެ ސައްހަކަން އިތުރު ކޮށްދޭނެ ކަމެއް ކަމަށް އެންބީއޯއެސް އިން ބުނެފައިވެ އެވެ.

ނޭޝަނަލް ބިއުރޯ އޮފް ސްޓެޓިސްޓިކްސް އިން ބުނީ މި ބަދަލާއެކު، ރާއްޖޭގެ ޖީޑީޕީ ހިސާބު ކުރުމުގެ ބޭސް އަހަރެއްގެ ގޮތުގައި ދެން ބަލާނީ 2003 އިން 2014 އަށް ކަމަށެވެ. މި ބަދަލުގެ އިތުރުން، ޖީޑީޕީ ހިސާބު ކުރުމުގައި ލިބެން ހުރި އިތުރު މައުލޫމާތުތައް ބޭނުން ކުރުމާއި ވަކިވަކި ސިނާއަތްތަކުގެ ހިސާބުތައް އިތުރަށް ދިރާސާކޮށްފައިވާނެ ކަމަށް ބުނެފައިވެ އެވެ.

ރާއްޖޭގެ ގައުމީ އުފެއްދުންތެރިކަމުގެ މިންގަނޑު މުރާޖައާ ކުރިއިރު، ރާއްޖޭގެ އުފެއްދުންތެރިކަމުން ބޮލަކަށް ޖެހޭ މިންވަރު 10،000 ޑޮލަރަށް އަރާފައިވާ ކަމަށް ސަރުކާރުން ވަނީ ބުނެފަ އެވެ. ސަރުކާރުގެ އަމާޒަކީ މި ދައުރު ނިމެންވާއިރަށް މި އަބަދު 12،000 ޑޮލަރަށް ޖެއްސުމެވެ.