އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދަށް ވަރަށް އިތުބާރާއި އިހްތިރާމް ކުރެއްވި ކަމަށާއި ނަމަވެސް މިހާރު އެކަން ކިލަނބުވެފައިވާ ކަމަށް ރައީސް އަބްދުﷲ ޔާމީން މިރޭ ވިދާޅުވި އެވެ. ރައީސް ވިދާޅުވީ، އެމަނިކުފާނަށް ކެހި ދެނީ އަބަދު ވެސް އެންމެ އިތުބާރު ކުރައްވާ ބޭފުޅުން ކަމަށެވެ.
ސިޔާސީ ނުވަ ބޭފުޅުން ދޫކޮށްލުމަށް ކުރި އަމުރާ ގުޅިގެން އުއްތަމަ ފަނޑިޔާރާއި އަލީ ހަމީދު ހައްޔަރު ކުރުމަށް ކުއްލި ނުރައްކަލުގެ ހާލަތު އިއުލާންކޮށް އެ ދެ ބޭފުޅުން އެކަހެރިކޮށް ގިނަ ހައްގުތަކެއް ވަނީ ހިފަހައްޓާފަ އެވެ. އެ ދެ ބޭފުޅުން އިސްވެ ތިއްބަވާ ނެރުއްވި އަމުރު އަނެއް ތިން ފަނޑިޔާރުން މިރޭ ވަނީ ބާތިލުކޮށްފަ އެވެ.
ޕީޕީއެމްގެ ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، ރައްޔިތުންގެ މުސްތަގުބަލް ނުރައްކަލަކަށް ހުށަހެޅީ އެންމެ ފަސް ބޭފުޅުންގެ ރައުޔުއިން ކަމަށެވެ. ރާއްޖެ ނުރައްކަލުގެ ތެރެއަށް ވެއްޓިގެން ނުދިޔައީ، އެ ފަސް ބޭފުޅުންގެ ތެރޭގައި ސުލްހައަށް ލޯބި ކުރައްވާ ތިން ބޭފުޅުން ތިބުމުން ކަމަށެވެ.
"އިސްކޮށް ތިބި ދެ ބޭފުޅުންނަކީ މި ނުރައްކަލަށް ހުށަހެޅި ދެ މީހުން، އޭގެ ނަތީޖާ މިހާރު އެބަ ފެނޭ،" ރައީސް ޔާމީން ވިދާޅުވި އެވެ.
ރައީސް ޔާމީން ވިދާޅުވީ، ގައުމަށް ނުރައްކާތެރި ހާލަތެއް ގެނުވި އުއްތަމަ ފަނޑިޔާރު އަބްދުﷲ ސައީދާއި އަލީ ހަމީދަކީ އެމަނިކުފާނު ވަރަށް އިތުބާރު ކުރެއްވި އަދި އިހްތިރާމް ކުރެއްވި ދެ ބޭފުޅުން ކަމަށެވެ. ރައީސް ޔާމީން ވަނީ އެ ދެ ބޭފުޅުން ސުޕްރީމް ކޯޓުގެ ބެންޗަށް ގެންނަން އެމަނިކުފާނު ކުރެއްވި މަސައްކަތް ވެސް ކިޔައިދެއްވާފަ އެވެ.
އެގޮތުން ވިދާޅުވީ އަލީ ހަމީދު ފަނޑިޔާރުންގެ ބެންޗަށް ގެނައީ އެމަނިކުފާނުގެ ރުހުމާއެކު ކަމަށާއި އަބްދުﷲ ސައީދު ބެންޗަށް ގެންނަން ދެކޮޅު ހަދަމުން ދަނިކޮށް އެމަނިކުފާނު ބެންޗަށް ގެނައީ ރައީސް ޔާމީން އަބްދުﷲ ސައީދާ ނުލައި ބެންޗު އެކުލަވާލަން ބޭނުންފުޅު ނުވާތީ ކަމަށެވެ. އެހެންވެ، އެ ދެ ބޭފުޅުންނަށް ވެސް ބެންޗަށް ވަޑައިގެންނެވުނީ އެމަނިކުފާނު އިސްވެ ހުންނަވާ ކުރެއްވި މަސައްކަތުން ކަމަށް ވިދާޅުވި އެވެ.
ރައީސް ޔާމީން ވިދާޅުވީ، އެ ދެ ބޭފުޅުންނަށް ކުރެއްވި އިހްތިރާމާއި އިތުބާރަށް ބޮޑު ކިލަނބު ކަމެއް އައީ އަސްލެއް ނެތް ގޮތަށް މައްސަލަ ނިންމެވީމަ ކަމަށެވެ. އަދި ޖަވާބުދާރީވާން ފުރުސަތު ނުދީ، އެ ދަރަޖައަށް ދެ ބޭފުޅުން ވަޑައިގެންނެވީމަ ކަމަށެވެ.
"އަޅުގަނޑަށް އަބަދުވެސް ކެހި ދެނީ، އަޅުގަނޑާ އެންމެ ކައިރިން މަސައްކަތް ކޮށްފަ އަދި އެ ބަޔަކަށް އަޅުގަނޑު އެންމެ ބޮަޑަށް އެހީތެރިވި މީހުން، އަޅުގަނޑަށް އަބަދުވެސް ކެހި ދެނީ،" ރައީސް ޔާމީން ވިދާޅުވި އެވެ.
ރައީސް ޔާމީން ވިދާޅުވީ، ސިޔާސީ މައިދާނުގައި ކުރާ މަސައްކަތަކީ ވޭނާއި އުދާހުގައި ކުރާ މަސައްކަތެއް ކަމަށެވެ. އެކަމުގައި ޝަރަފެއް ކަރާމަތެއް ނެތް ކަމަށެވެ. އެމަނިކުފާނު މިހާރު ހުންނެވީ "ހަގީގަތުގައި ވެސް ވަރުބަލިވެފަ" ކަމަށް ވެސް ވިދާޅުވި އެވެ. ސުޕްރީމް ކޯޓުގެ އަމުރަށްފަހު އެމަނިކުފާނު އުޅުއްވި ހާލަތު ވެސް ކިޔައިދެއްވާފަ އެވެ. އެގޮތުން ރޭގަނޑު އެއްކޮށް ސިފައިންގެ އިދާރާގައި އިންނެވުމަށްފަހު ފަތިހު ގެއަށް ވަޑައިގެން، އަނެއްކާވެސް ހެނދުނު އޮފީހަށް ވަޑައިގަންނަވާ ކަމަށެވެ. މިވީ ދުވަސްތަކުގައި އެމަނިކުފާނު ނިދިކުރެއްވީ އެންމެ ހަ ގަޑިއިރު ކަމަށް ވެސް ވިދާޅުވި އެވެ.