ދޮގު މައުލޫމާތު ނޫސްވެރިންނާ ހިއްސާކުރާ ކަމަށް ބުނެ ކުރީގެ ޑެޕިއުޓީ ޕީޖީ، ހުސެއިން ޝަމީމް ފުލުހަށް ހާޒިރު ކުރަން ޗިޓް ފޮނުވައިފި އެވެ. ޗިޓް ފޮނުވާފައިވަނީ މިރޭ 8:00 އަށް ފުލުހަށް ހާޒިރުވާށެވެ.

ޗިޓްވާ ގޮތުން ޝަމީމް ފުލުހަށް ހާޒިރުކުރަނީ، މި މަހުގެ 13 ވަނަ ދުވަހުގެ ރޭ އެންދެރިމާގޭގައި އޮތް ނޫސްވެރިންގެ ބައްދަލުވުމުގައި ފުލުހުން ތަހުގީގު ކުރަމުން އަންނަ މައްސަލައަކާ ގުޅިގެން ހޯދާފައިވާ ހެއްކާ ބެހޭ ގޮތުން ދޮގު މައުލޫމާތު ދީފައިވާ ކަމަށް ތުހުމަތު ކުރެވޭތީ އެވެ. އެ މައްސަލާގައި ބަޔާނެއް ނަގާނެއް ކަމަށް ވެސް ޗިޓްގައިވެ އެވެ.

އެ ރޭ ނޫސްވެރިންގެ ބައްދަލުވުމުގައި ޝަމީމް ވިދާޅުވީ އެ ފޮށި ފުލުހުންނަށް ފެނުމުގެ ކުރިން ފޮއްޓެއް ފެންނާނެ ކަމަށް ރައީސް އަބްދުﷲ ޔާމީން ވިދާޅުވި ކަމަށެވެ. ރުމާލު ޖަގަހައިގައި ހައެއް ފެބުރުއަރީ ވަނަ ދުވަހުގެ ރޭ އޮތް ޖަލްސާއެއްގައި ވާހަކަފުޅު ދައްކަވަމުން ރައީސް ޔާމީން އެ ފޮށީގެ ވާހަކަ ދެއްކެވި އެވެ. އަދި އެ ފޮށީގައި ހެކިތައް ހުންނާނެ ކަމަށް ވިދާޅުވެފައިވެ އެވެ. އެ ފޮށި ނެގި ކަމަށް ފުލުހުން ބުނަނީ އޭގެ އަނެއް ދުވަހު ނަޖުމާގެ ގެ ބަލާ ފާސް ކުރުމަށްފަހު އެވެ.

"ފޮށި ފެނުމާ ގުޅޭ ގޮތުން ވެސް އިލްހާމެއްބާ މިވީ؟، އެ ފޮށީގަ ހެކި ހުންނާނެ ކަމާއި ފޮށި ފެންނާނެކަން އެމަނިކުފާނު މާކުރިން ވިދާޅުވި، އެހެންވީމަ އެއީ ކިހިނެއް ހިނގާފައިވާ ކަމެއްކަމާމެދު އަޅުގަނޑުމެންނަށް ސުވާލު އުފެދޭ، ފުލުހުންގެ ކަންކަން ހުންނަ ގޮތުން އެބަ ދިމާވޭ ފޮށި ފޮއްޓަށް އެއްޗެހި ލުމުގެ ކަންކަން، އަދި ހާއްސަކޮށް ސިޔާސީ ދާއިރާގައި މަސައްކަތް ކުރާ މީހުންނަށް އިއްތިފާގުން މިކަން މި ދިމާވަނީ ވެސް،" ޝަމީމް ވިދާޅުވި އެވެ.

ޝަމީމް އިތުރަށް ވިދާޅުވީ، "އެހެންވީމަ މި ފޮށީގެ ކަންތަކަކީ ކަނޑައެޅިގެން ދޮގެއް، ފޮށި މި ފެނުނީ މާފަހުން، އަދި އެ ފޮއްޓަކު ހެކި ހުރި ކަމަށް އެ ފޮށި ބަލާ ފާސްކޮށްފަ ދިން ލިޔުމަކު ވެސް ނެތް، ފޮއްޓެއް ނުފެންނަ ކަމަށް ފުރަތަމަ ލިޔުން ވެސް ދެއްވީ، އެ ފޮށިން ހެއްކެއް ފެނުނިއްޔާ އެއީ ފުލުހުން ލާފައިވާ އެއްޗަކަށް ވާނީ، އެއީ ލިޔުންތަކުން އެނގޭކަށް ނެތް އެ ފޮށިން އެއްވެސް އެއްޗެއް ފެނުނު ކަމަކަށް" ކަމަށެވެ.