މިދިޔަ އަހަރު އަހަރު، ރާއްޖެ އިން ބޭރަށް ފައިސާ ފޮނުވާ ކުންފުނިތައް މެދުވެރިކޮށް ބިދޭސީން ފޮނުވި ފައިސާގެ އަދަދު 39 ޕަސެންޓް ދަށަށް ގޮސްފި އެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ މިދިޔަ އަހަރުގެ އަހަރީ ނަމްބަރުގައިވާ ގޮތުން ރާއްޖޭން ބޭރަށް ފައިސާ ފޮނުވުމުގެ ހިދުމަތްދޭ ކުންފުނިތައް މެދުވެރިކޮށް މިދިޔަ އަހަރު 66.8 މިލިއަން ޑޮލަރު ވަނީ ފޮނުވާފަ އެވެ. މިގޮތުން 2016 ވަނަ އަހަރާ އަޅާބަލާއިރު 2017 ވަނަ އަހަރުގެ ހުރިހާ މަހެއްގައި ވެސް ރާއްޖެ އިން ބޭރަށް ފޮނުވާފައިވާ އަދަދު ދަށްވެފައިވެ އެވެ. މިގޮތުން ފެބުރުއަރީ، ޖޫން، އަދި ސެޕްޓެންބަރު މަހުގައި ރާއްޖެއިން ބޭރަށް ފޮނުވާފައިވާ ފައިސާގެ އަދަދު 45 ޕަސެންޓަށްވުރެ ބޮޑު ފަރަގަކުން ދަށްވެފައިވާކަން ވެސް ފާހަގަ ކުރެވެ އެވެ.
އެމްއެމްއޭގެ ރިޕޯޓުގައި ބުނެފައިވާ ގޮތުން މިދިޔަ އަހަރު ބޭރު ކުރި ފައިސާގެ 46 ޕަސެންޓް ބޭރުކުރީ ބަންގްލަދޭޝަން އަށެވެ. އަދި ދެން އެންމެ ގިނަ އިން ބިދޭސީން ފައިސާ ފޮނުވީ އިންޑިޔާ އާއި ސްރީލަންކާ އަށެވެ.
އެ ރިޕޯޓުގައިވާ ގޮތުން މިދިޔަ އަހަރު ވަނަ އަހަރު ރެމިޓަންސް ކުންފުނިތައް މެދުވެރިކޮށް ރާއްޖެ އިން ބޭރަށް ފޮނުވާފައިވާ ފައިސާގެ 71 ޕަސެންޓް ފޮނުވާފައި ވަނީ ބިދޭސީންނެވެ. މިއީ އޭގެ ކުރީ އަހަރު ރިޕޯޓުކުރި 83 ޕަސެންޓް އާއި އަޅާބަލާއިރު ދަށް އަދަދެއްގެ ފައިސާ އެކެވެ.
އެމްއެމްއޭއިން ބުނީ މިދިޔަ އަހަރު ރާއްޖެ އިން ބޭރަށް ފޮނުވި ފައިސާގެ ކޮންމެ މަހެއްގެ ޖުމްލަ އަށް ބަލާއިރު، ބިދޭސީން ރާއްޖެ އިން ބޭރަށް ފޮނުވި ފައިސާ އަހަރު ތެރޭ ދަށްވަމުން ގޮސްފައިވީ ނަމަވެސް، ދިވެހިން ބޭރަށް ފޮނުވާފައިވާ ފައިސާ އެއް ހަމައެއްގައި ހުރުމަށްފަހު، އަހަރުގެ ފަހުކޮޅު ވަނީ އިތުރުވެފަ އެވެ.