ލޯކަލް ގަވަމެންޓް އޮތޯރިޓީ (އެލްޖީއޭ)ގެ ރައީސް ޑިފެންސް މިނިސްޓަރު މުހައްމަދު ނާޒިމްގެ އިތުބާރު ނެތް ކަމަށް ހުށަހެޅި މައްސަލަ މިއަދުގެ ބައްދަލުވުމުގެ އެޖެންޑާގައި ނުހިމަނަން ފާސްކޮށްފި އެވެ.
ބޯޑުގެ މެންބަރު ސުޖާއު ހުސައިން ހުށަހެޅުއްވި މި މައްސަލަ އެޖެންޑާގައި ނުހިމަނައި ކުރިއަށް ގެންދަން ބައްދަލުވުމުގެ ބައިވެރިންގެ އަޣުލަބިއްޔަތުން ނިންމި އިރު އެގޮތަށް ބައްދަލުވުން ކުރިއަށް ގެންދަން، މައްސަލަ ހުށަހެޅުއްވި މެންބަރު ނޫން އެހެން މެންބަރުން ވޯޓު ދެއްވި އެވެ.
ނާޒިމްގެ އިތުބާރު ނެތް ކަމަށް ހުށަހެޅީ ކޮންމެ މަހަކު އެލްޖީއޭގެ ދެ ބައްދަލުވުން ބާއްވަން ޖެހޭއިރު މިދިޔަ މަހު ދެ ބައްދަލުވުން ބާއްވާފައި ނުވާތީ ކަމަށް އެނގިފައިވެ އެވެ. މިދިޔަ މަހު މާލެއިން ފެނުގެ ހިދުމަތް ކެނޑި އެއް ހަފުތާ އަށް ސަރުކާރު ބަންދުކޮށްފައި ވާއިރު ފެނުގެ މައްސަލަ ހައްލު ކުރުމަށް ރައީސް އަބްދުﷲ ޔާމީން އުފެއްދެވި ޓާސްކްފޯސްގައި އިސްކޮށް ހުންނެވީ މިނިސްޓަރު ނާޒިމެވެ.