މަތީ ތައުލީމަށް ކިޔަވާ ދަރިވަރުންނަށް ޒަކާތު ފަންޑުން އެހީދޭން ނިންމައި، އެހީއަށް އެދުމުގެ ފުރުސަތު އިސްލާމިކް މިނިސްޓްރީން ހުޅުވާލައިފި އެވެ.
އެމިނިސްޓްރީން މިއަދު ކުރި އިއުލާނެއްގައި ބުނީ، ސަރުކާރުގެ ސްކޮލަރޝިޕެއްގައި ކިޔަވުމުންދާ ދަރިވަރުން ފިޔަވައި، މަތީ ތައުލީމުގެ ދާއިރާތަކުން މިހާރުވެސް ކިޔަވަމުންދާ ދަރިވަރުންނާއި އެކި ސަބަބުތަކާހުރެ ކިޔެވުން މެދުކެނޑިފައިވާ ފަރާތްތަކަށް، އެފަރާތްތަކުގެ ކިޔެވުން ކުރިއަށް ގެންދިއުމަށް އެހީތެރިވުމުގެ ގޮތުން ޒަކާތު ފަންޑުގެ އެހީއަށް އެދި ހުށަހެޅުމުގެ ފުރުސަތު މިމަހުގެ ނިޔަލަށް ހުޅުވާލާފައިވާ ކަމަށެވެ. އެހެންކަމުން ޝައުގުވެރިވާ ކެންޑިޑޭޓުން އެކަމަށް އެދި ވީހާވެސް އަވަހަށް ފޯމް ހުށަހެޅުމަށް އެ މިނިސްޓްރީން ވަނީ އެދިފަ އެވެ.
ޒަކާތު ފަންޑުން އެހީ ލިބޭނީ ކޯހެއްގައި އުޅެ، 50 ޕަސެންޓް ފުރިހަމަކޮށްފައިވާ ނަމަ އެވެ. އަދި ސަރުކާރުން ނުވަތަ ސަރުކާރު މެދުވެރިވެގެން ހިލޭ އެހީގެގޮތުގައި ފުރުސަތު ލިބިގެން މިވަގުތު ކިޔެވުމުގެ ހަރަދު ހަމަޖެހިފައިވާ ފަރާތެއް ކަމުގައި ދަރިވަރު ވެގެންނުވާނެ އެވެ. އަދި ސަރުކާރުގެ ހަރަދުގައި ކިޔަވާފައިވާ ދަރިވަރެއްނަމަ ލޯނަށް ފައިސާ ގަވާއިދުން ދައްކައި ހަލާސްކުރަމުންދާ ފަރާތެއް ކަމުގައި ވާންވާނެ އެވެ.
އިސްލާމިކް މިނިސްޓްރީން ބުނީ، ޒަކާތު ފަންޑުން އެހީ ދިނުމަށް ހަމަޖެހިފައިވަނީ ރާއްޖެއިން ބޭރުންގައި ކިޔެވުމަށް 17 ފުރުސަތު އަދި ރާއްޖޭގައި ކިޔެވުމަށް 36 ފުރުސަތު ކަމަށެވެ. އެއީ ރާއްޖެއިން ބޭރަށް، ކޮންމެ ކުއްޖަކަށް ގިނަވެގެން 100000 އަދި ރާއްޖޭގައި ކިޔަވާނަމަ ކުއްޖަކަށް ގިނަވެގެން 20،000 ރުފިޔާ އެވެ. މި އެހީގެ ދަށުން ރާއްޖޭގައި ކިޔަވާ ދަރިވަރުންނަށް ދިނުމަށް ހަމަޖެހިފައިވަނީ ހަމައެކަނި ކޯސް ފީއެވެ.
ޒަކާތު ފަންޑުން އެހީ ލިބޭ ކުދިންގެ އަތަށް ރުފިޔާއެއް ނުދޭނެ އެވެ. އެކުދިންގެ ފީތައް ދައްކަމުންގެންދާނީ މިނިސްޓްރީ އިންނެވެ. ކޮންމެ ދަރިވަރަކުވެސް އެ ދަރިވަރެއްގެ ކޯހުގެ ޓިއުޝަން ފީއަށްވާ ފައިސާ ދައްކާނީ އެ ކިޔަވާ ޔުނިވަސިޓީއެއްގެ އިންވޮއިސް އިސްލާމިކް މިނިސްޓްރީއަށް ފޮނުވުމުން އޭގައިވާ ގޮތުގެމަތިންނެވެ.
ޒަކާތުފަންޑުން މިހާތަނަށް އެހީދެމުން އައީ ހަމައެކަނި ބޮޑެތި ބަލިތަކަށް ބޭސްކުރުމަށެވެ. އެފަދަ ކަންކަމަށް 9 މިލިއަނަށް ވުރެ ގިނަ ފައިސާ މިހާތަނަށް ހަރަދުވެފައިވާކަމަށް އިސްލާމިކް މިނިސްޓްރީން ވަނީ ބުނެފަ އެވެ.