ސްރީލަންކާގައި މިއަދު ހަވީރު އިދިކޮޅު ކޯލިޝަންގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު، އިބޫއާއެކު ގުޅިފައިވާ ޕާޓީތަކުން ބާއްވާ ޖަލްސާ ހުރިހާ ގޮތަކުން ހާއްސަވާނެ ކަމަށް ލަންކާގައި ހުންނަވާ ޕާޓީތަކުގެ ކޯޑިނޭޓަރު މުހައްމަދު ތޯރިގު
ވިދާޅުވެއްޖެ އެވެ.
މިއަދު ހަވީރު ބަރްޖަޔާ ހޮޓެލްގައި ކުރިއަށް ގެންދާ ޖަލްސާގައި އިބޫގެ އިތުރުން ކުރީގެ ރައީސް މުހައްމަދު ނަޝީދު ބައިވެރިވަޑައިގަންނަވަ އެވެ. އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމް އެ ޖަލްސާއަށް މުހާތަބު ކުރައްވާ ގޮތަށް ވެސް ވަނީ ހަމަޖެހިފަ އެވެ. އޭގެ އިތުރުން ވެސް ޕާޓީތަކުގެ އިސް ބޭފުޅުން ވާހަކަ ދައްކަވާނެ އެވެ.
ޖަލްސާއާ ގުޅޭ މައުލޫމާތު ދެއްވަމުން ތޯރިގު ވިދާޅުވީ، ޕާޓީތަކުގެ ސިޔާސީ ހަރަކާތް ލަންކާގައި ކުރިއަށް ދަނީ ވަރަށް ފޯރީގަ ކަމަށެވެ. އޭގެ އެންމެ ބޮޑު ސަބަބަކީ ރައީސް ނަޝީދު އެކަމުގައި އަމަލީ ގޮތުން ބައިވެރިވެވަޑައިގަންނަވާތީ ކަމަށެވެ.
މިއަދު ހަވީރު ބާއްވާ ޖަލްސާއަކީ ކެންޑިޑޭޓް އިބޫއާއެކު ރައީސް ނަޝީދު ބައިވެރިވަޑައިގަންނަވާ ފުރަތަމަ ޖަލްސާއަށްވާއިރު ޖަލްސާ ވެގެން ދާނީ ހާއްސަ ޖަލްސާއަކަށް ކަމަށް ތޯރިގު ވިދާޅުވި އެވެ. ދެ ބޭފުޅުންނަށް އެކުގައި ބައިވެރިވަޑައިގެންނެވޭ ހަމައެކަނި ޖަލްސާއަށް މި ޖަލްސާވާނެކަން ވެސް އޭނާ ފާހަގަކުރެއްވި އެވެ.
ތޯރިގު ވިދާޅުވީ، ޖަލްސާގައި މުހިންމު މައުލޫމާތުތަކެއް ލިބިގެންދާނެ ކަމަށެވެ. އެގޮތުން ކުރިއަށް އޮތް އަހަރުތަކުގައި ރާއްޖެ ތަރައްގީ ކުރައްވާނެ ގޮތުގެ ސިޔާސަތުތައް ޕާޓީތަކުގެ އިސް ބޭފުޅުންނާއި ކެންޑިޑޭޓް ހާމަކުރައްވާނެ ކަމަށެވެ.
ލަންކާގައި ގިނަ އަދަދެއްގެ ދިވެހިން އުޅޭއިރު މިއަދުގެ ޖަލްސާގައި ބައިވެރިވާން ގިނަ ބަޔަކު ހޮޓެލަށް އަންނާނެ ކަމަށް ތޯރިގު ވިދާޅުވި އެވެ. ޖަލްސާއަށްފަހު އިބޫ އާއި ރައީސް ނަޝީދާއެކު ފޮޓޯ ނެގުމުގެ ފުރުސަތު ވެސް އޮންނާނެ އެވެ.