ޖުމަހޫރީ ޕާޓީގެ ލީޑަރުކަމުގެ މަގާމަށް ކުރިމަތިލުމުގެ ފުރުސަތު ހުޅުވާލަިފި އެވެ.
ޖޭޕީގެ ލީޑަރުކަމުގެ މަގާމް ހުސްވީ ކުރިން އެ ޕާޓީގެ ލީޑަރަކަށް ހުންނެވި މާމިގިލީ ދާއިރާގެ މެންބަރު ގާސިމް އިބްރާހީމްގެ މައްޗަށް ދައުލަތުން ހުށަހެޅި ރައްޔިތުންގެ މަޖިލީހުގެ މެމްބަރުންތަކަކަށް ރިޝްވަތު ހުށަހެޅި ކަމުގެ ދައުވާ ކްރިމިނަލް ކޯޓުގައި ސާބިތުވެ ގާސިމް ޖަލަށް ލާން ހުކުމް ކުރުމާ ގުޅިގެންނެވެ. ސިޔާސީ ޕާޓީތަކުގެ ގާނޫނުގައި މިހާރު އޮންނަ ގޮތުން، ޖިނާއީ ހުކުމެއްގައި ހުންނަވާ ބޭފުޅަކަށް ޕާޓީގެ އިސް މަގާމެއްގައި ނުހުރެވޭނެ އެވެ.
ލީޑަރުކަމުގެ މަގާމަށް ކުރިމަތިލުމަށް ޖޭޕީއިން ހުޅުވާލާފައިވާއިރު ގާސިމްގެ މައްޗަށް ކޮށްފައިވާ ޖަލު ހުކުމް ކްރިމިނަލް ކޯޓުން މިއަދު ވަނީ ބާތިލް ކޮށްފަ އެވެ.
ލީޑަރުކަމުގެ މަގާމަށް ބޭފުޅަކު ހޮވުމަށް އިއުލާންކޮށްފައިވަނީ، ޖޭޕީއިން ބުނިގޮތުގައި، މިއަދު އެޕާޓީގެ މައި އޮފީހުގައި ބޭއްވި އެ ޕާޓީގެ 123 ވަނަ ކައުންސިލް ބައްދަލުވުމުގައި މަޝްވަރާކޮށް، އެ މަގާމަށް މެންބަރަކު ހޮވުމަށް، ޕާޓީގެ ރައީސް އަލީ ވަހީދު ހުށަހެޅުއްވި ހުށަހެޅުމާ ގުޅިގެންނެވެ. އަލީ ވަހީދުގެ ހުށަހެޅުއްވުން ވޯޓުގައި ބައިވެރިވެވަޑައިގެންނެވި 61 މެމްބަރުންގެ އިއްތިފާގުން ވަނީ ފާސްވެފަ އެވެ.