ރިކޯޑް އަދަދެއްގެ އަންހެން ބޭފުޅުންނާއެކު ރައީސް ސޯލިހުގެ ކެބިނެޓް އިއުލާން ކުރައްވައިފި

މިއަދު މަގާމާ ހަވާލުވެވަޑައިގެންނެވި ރައީސް އިބްރާހިމް މުހައްމަދު ސޯލިހުގެ ކެބިނެޓް އިއުލާން ކުރައްވައިފި އެވެ. ރައީސް ސޯލިހުގެ ކެބިނެޓްގައި ތިއްބަވަނީ ބަންޑާރަ ނައިބާ ނުލާ 19 މިނިސްޓަރުންނެވެ.

ރައީސް ސޯލިހުގެ ކެބިނެޓް ފައިނަލް ކުރެއްވީ ހަތަރު ލީޑަރުންނާއެކު ބައްދަލުވުމަށްފަހު އެވެ. އެ ބައްދަލުވުމަށް ލީޑަރުން ވަޑައިގެންނެވީ ކެބިނެޓަށް އެ ބޭފުޅުން އައްޔަން ކުރައްވަން ބޭނުންފުޅާ ބޭފުޅުންގެ ނަންތައް ހިއްޕަވައިގެންނެެވެ. އެ ބައްދަލުވުމުގައި ބައެއް ލީޑަރުން ވަނީ ކެބިނެޓްގެ ބައެއް މަގާމުތައް ދޫކުރައްވައި އެންމެން އެއްބަސްވާ ނަންތަކަށް ތާއިދު ވެސް ކުރައްވާފަ އެވެ.

ކެބިނެޓް ބަހާލާފައިވަނީ ޕާޓީތަކުގެ މެދުގަ އެވެ. އެގޮތުން އެމްޑީޕީއަށް ކެބިނެޓްގެ 40 ޕަސެންޓް ދީފައިވާއިރު ޖުމްހޫރީ ޕާޓީއަށް ދިނީ 25 ޕަސެންޓެވެ. ރައީސް މައުމޫނަށް 20 ޕަސެންޓް ދީފައިވާއިރު އަދާލަތު ޕާޓީއަށް ދިނީ 15 ޕަސެންޓެވެ.

ރައީސް ސޯލިހު މިރޭ އެކުލަވާލި ކެބިނެޓްގައި ގިނަ އަދަދެއްގެ އަންހެން ބޭފުޅުން ހިމެނިވަޑައިގަންނަވަ އެވެ. ޖުމްލަ 19 މިނިސްޓްރީގެ ތެރެއިން ހަތް މިނިސްޓްރީ ދީފައިވަނީ އަންހެން ބޭފުޅުންނަށެވެ.

ކެބިނެޓް:

ކެބިނެޓްގެ އެ މަގާމުތަކުގެ އިތުރުން ރައީސްގެ ޗީފް އޮރް ސްޓާފްގެ މަގާމަށް އަދާލަތު ޕާޓީގެ ނައިބު ރައީސް އަލީ ޒާހިރު މިރޭ ވަނީ އައްޔަން ކުރައްވާފަ އެވެ. އެއީ މިނިސްޓަރު ފެންވަރުގެ މަގާމެކެވެ. ރައީސް އޮފީހުގެ މިނިސްޓަރުގެ މަގާމަށް އަލީ ޝިޔާމް ވެސް ވަނީ އައްޔަން ކުރައްވާފަ އެވެ.

ރައީސް އޮފީހުގެ އެހެން އިސް މަގާމުތަކަށް ވެސް މިރޭ ވަނީ ބޭފުޅުން އައްޔަން ކުރައްވާފަ އެވެ. އެގޮތުން ސެކެޓަރީ ކޯޕަރޭޓް ސާވިސްއަށް ހުސެއިން އާމިރާއި ސެކެޓަރީ ކެބިނެޓް އެފެއާޒް އަހުމަދު ހަސަން ދީދީ އާއި ޑެޕިއުޓީ ޗީފް އޮފް ސްޓާފްގެ މަގާމަށް ހުސެއިން އާދަމާއި ސެކެޓަރީ ޕޮލިސީގެ މަގާމަށް އައިމިނަތު ޝައުނާ އާއި ލީގަލް ކައުންސިލް ޓު ދަ ޕްރެޒިޑެންޓްގެ މަގާމަށް އަހުމަދު އަބްދުﷲ އަފީފާއި ސެކެޓަރީ ކޮމިއުނިކޭޝަންސްގެ މަގާމަށް ހަސަން އިސްމާއިލް އަދި ސެކެޓަރީ އިން ފޮރިން ރިލޭޝަންގެ މަގާމަށް ސަބްރާ ނޫރައްދީން ވަނީ އައްޔަން ކުރައްވާފަ އެވެ. އެ ބޭފުޅުން އައްޔަން ކުރެއްވީ ސްޓޭޓް މިނިސްޓަރު ފެންވަރުގެ މަގާމަކަށެވެ.