ކުރީގެ ރައީސް މުހައްމަދު ނަޝީދުގެ މައްޗަށް އިއްވާފައިވާ 13 އަހަރުގެ ޖަލު ހުކުމް ރިވިއުކުރަން ސުޕްރީމް ކޯޓަށް ހުށަހެޅި މައްސަލާގައި މާދަމާ ހުކުމް އިއްވުމަށް ތާވަލުކޮށްފި އެވެ.
ރައީސް ނަޝީދުގެ މައްޗަށް 13 އަހަރުގެ ޖަލު ހުކުމެއް އިއްވީ އޭރުގެ ކްރިމިނަލް ކޯޓުގެ އިސް ގާޒީކަމުގެ މަގާމުގައި ހުންނެވި އަބްދުﷲ މުހައްމަދު ގާނޫނު އަސާސީއާ ހިލާފަށް ސިފައިންގެ ބެލުމުގެ ދަށަށް ގެންގޮސް ހައްޔަރުކޮށް ރަހީނުކޮށްގެން ގެންގުޅުނު މައްސަލާގައި ކުށް ސާބިތުވެގެންނެވެ.
އެ ހުކުމް އިސްތިއުނާފުކުރުމުގެ ހައްގު ރައީސް ނަޝީދު ބޭނުންފުޅު ކުރައްވާފައެއް ނުވެ އެވެ. ކުރިމިނަލް ކޯޓުން ރައީސް ނަޝީދުގެ މައްޗަށް އިއްވި ޖަލު ހުކުމް ހައިކޯޓުގައި އިސްތިއުނާފުކުރީ ދައުލަތުންނެވެ. އެ ކޯޓުން ވަނީ އެ ހުކުމް ރަނގަޅު ކަމަށް ނިންމާފަ އެވެ. އޭގެ ފަހުން މައްސަލަ ސުޕްރީމް ކޯޓަށް ހުށަހެޅީ ވެސް ދައުލަތުންނެވެ. އެ މައްސަލާގައި ސުޕްރީމް ކޯޓުން ވަނީ 13 އަހަރުގެ ޖަލު ހުކުމް ރަނގަޅު ކަމަށް ބުނެ އެއީ ނިހާއީ ހުކުމެއްގެ ގޮތުގައި ކަނޑައަޅާފަ އެވެ.
ޕީޖީގެ ފަރާތުން އެ މައްސަލަ ރިވިއުކުރަން ހުށަހެޅީ ރިޔާސީ އިންތިހާބަށްފަހު އެވެ. އެކަމަށް އޭރު ގިނަ ބަޔަކު ޕީޖީގައި އެދެމުން ވެސް ދިޔަ އެވެ. އެ މައްސަލާގައި ބޭއްވީ އެންމެ އަޑުއެހުމެކެވެ. އެ އަޑުއެހުމުގައި ދެ ފަރާތުން ވެސް ވަނީ ވާހަކަ ދައްކާފަ އެވެ.
އަޑުއެހުމުގައި ޑެޕިއުޓީ ޕްރޮސިކިއުޓާ ޖެނަރަލް މަރިޔަމް ނިހާޔަތު ވިދާޅުވީ މައްސަލަ ރިވިއުކުރަން ހުށަހެޅީ 13 އަހަރުގެ ޖަލު ހުކުމާ ގުޅިގެން ފާހަގަކުރެވޭ ކަންކަން ބަލައިދިނުމަށް ރައީސް ނަޝީދުގެ މަސްލަހަތުގައި އެކި ފަރާތްތަކުން ތަކުރާރުކޮށް އެ އޮފީހުގައި އެދެމުންދާތީ ކަމަށެވެ. އަދި އެ މައްސަލަ ރިވިއު ކުރަން ހުށަހެޅީ އެއީ އާންމު މަސްލަހަ ދަރަޖައަކަށް ހިމެނިގެންވާ މައްސަލައެއް ކަމަށް ފެންނާތީ ކަމަށެވެ.
ޖިނާއީ މައްސަލައަކާ ގުޅިގެން ކޯޓަކުން އިއްވާފައިވާ ހުކުމެއް ނުވަތަ ނިންމާފައިވާ ނިންމުމެއް އިސްތިއުނާފްކުރަން ހުށަހެޅުމާއި، ގާނޫނު އަސާސީގެ އެންމެހާ ހަމަތަކާއި، ގާނޫނާއި، އެންމެހާ ފަރުދުންގެ ހައްގުތަކާއި މިނިވަންކަން ނެގެހެއްޓުމަކީ ޕީޖީގެ ބާރުތަކާއި މަސްއޫލިއްޔަތުތަކުގެ ތެރޭގައި ހިމެނޭ ކަމެކެވެ.
ރައީސް ނަޝީދު މިއަދު ވަނީ ޝަރީއަތުގެ މަޖިލީހުގައި ހުކުމްއާ ގުޅޭ ގޮތުން ވާހަކަފުޅު ދައްކަވާފަ އެވެ. އެމަނިކުފާނު ވިދާޅުވީ އަބްދުﷲ ގާޒީ ހައްޔަރުކުރުމުގައި އެމަނިކުފާނުގެ ސީދާ ދައުރެއް ނޯންނާނެ ކަމަށެވެ.
ރައީސް ނަޝީދުގެ ވަކީލް ހިސާން ހުސެއިން ވަނީ ހުކުމް ބާތިލްކޮށް ދޭން އެދިވަޑައިގެންފަ އެވެ. އޭގެ ސަބަބުތައް ވެސް ހިސާން ވިދާޅުވި އެވެ. އެ ހުކުމް އިއްވާފައިވަނީ ރައީސް ނަޝީދަށް ގާނޫނު އަސާސީއިން ލިބިދޭ ހައްގުތައް ކަށަވަރުކޮށް ނުދީ ކަމަށް ހިސާން ވިދާޅުވި އެވެ. އަދި އެ މައްސަލާގައި ޓެރަރިޒަމްގެ ދައުވާ އުފުލާފައިވަނީ ވެސް ގާނޫނާ ހިލާފަށްކަން އޭނާ ފާހަގަކުރެއްވި އެވެ.
އެ މައްސަލާގައި ވަކި ގޮތެއް ކަނޑައެޅެންދެން އެ ހުކުމް ތަންފީޒުކުރުން ފަސްކުރަން ސުޕްރީމް ކޯޓުން ވަނީ ވަގުތީ އަމުރެއް ނެރެފަ އެވެ. އެ ހުކުމާ ގުޅިގެން އެއްވެސް ކަމެއް ތަންފީޒުނުކުރަން އިދާރާތައް ސުޕްރީމް ކޯޓުން އެ އަމުރުގައި އަންގާފައިވެ އެވެ.