ދެކުނު އެފްރިކާގެ ޖޮހަނަސްބާގުން އައްޑޫ އިންޓަނޭޝަނަލް އެއާޕޯޓަށް އަންނަ މަހުގެ ދެވަނަ ދުވަހު ފަށާނެ އެވެ.
އެނގިފައިވާ ގޮތުގައި ސައުތު އެފްރިކަން އެއާވޭސްގެ ދަތުރުތައް ފެށުމުގެ ގޮތުން އަންނަ މަހުގެ ދެވަނަ ދުވަހު މެންދުރު ގަން އިންޓަނޭޝަނަލް އެއާޕޯޓުގައި ހާއްސަ ރަސްމިއްޔާތެއް ފަށާނެ އެވެ. އަދި މި ރަސްމިއްޔާތުގައި ބައެއް ވަޒީރުން ވެސް ބައިވެރިވެ ވަޑައިގަންނަވާނެ އެވެ.
ސައުތު އެފްރިކަން އެއާވޭސްގެ ދަތުރުތައް ފަށާނެކަން އިއުލާނުކޮށްފައިވަނީ މި އަހަރުގެ އޮގަސްޓް ދެވަނަ ދުވަހު ޓޫރިޒަމް މިނިސްޓްރީގައި ބޭއްވި ރަސްމިއްޔާތެއްގައި އޭރުގެ ޓޫރިޒަމް މިނިސްޓަރު މޫސާ ޒަމީރު އެވެ. އޭރު ދަތުރު ފަށާނެ ކަމަށް ބުނެފައިވަނީ ނޮވެމްބަރު 24 ގަ އެވެ.
މި ދަތުރުގައި ބޭނުންކުރަނީ އެއާބަސް 340 ގެ ފްލައިޓް އެވެ. މި ދަތުރުތައް ފެށުމާއެކު ހަފުތާއަކު 300 ޓޫރިސްޓުން އައްޑުއަށް ގެންވޭނެ އެވެ. މި ދަތުރުތައް ރާއްޖެއަށް ކުރަނީ ދެކުނު އެފްރިކާގެ ޓުއާ އޮޕަރޭޓަރެއް ކަމަށްވާ އެއާ ޓުއާ އޮޕަރޭޓަރު (އޭޓީއޯ) އާ ގުޅިގެންނެވެ.
އޭޓީއޯގެ މެނޭޖިން ޑިރެކްޓަރު ކީތް އެޗް.އެފް ގޯ ވިދާޅުވީ ޖޮހަނަސްބާގުން ސީދާ ދަތުރުތައް ފެށުމަކީ އެފްރިކާ ބައްރުން އަންނަ ޓޫރިސްޓުން އިތުރު ކުރަން ލިބިގެންދާނެ އިތުރު ފުރުސަތެއް ކަމަށެވެ.
"މީގެ ސަބަބުން ހަމައެކަނި ޓޫރިސްޓުން އުފުލަން އެކަންޏެއްނޫން ފުރުސަތު ހުޅުވޭނީ. އެފްރިކާއަކީ އަކީ ދަނޑުވެރިކަމުގެ ސާމާނު އުފައްދާ ގައުމެއް. މި އެއާލައިނުން 20 ޓަނުގެ ކާގޯ ގެނެވޭނެ. އެހެންވެ އައްޑޫގެ ވިޔަފާރިތަކަށް ވެސް މިއީ ހުޅުވިގެންދާނެ ރަނުގެ ފުރުސަތެއް،" ކީތް ވިދާޅުވެފައިވެ އެވެ.
އެފްރިކާ އިން އަންނަ ފްލައިޓް ޖައްސާނީ 2016 ވަނަ އަހަރު ބޮޑު ބަދަލެއް ގެނެސް އިންޓަނޭޝަނަލް ފްލައިޓްތަކަށް ހުޅުވާލި، ގަން އިންޓަނޭޝަނަލް އެއާޕޯޓް (ޖީއައިއޭ) އަށެވެ. ޖީއައިއޭ ތަރައްގީކޮށްފައިވަނީ ދިވެހި ސަރުކާރާއި ރާއްޖޭގެ ޓޫރިޒަމްގެ އެންމެ ބޮޑު އެއް ކުންފުނި ކަމަށްވާ ކާސާ ހޯލްޑިންގެ 30 ޕަސެންޓް ހިއްސާ އާއި ސަރުކާރުގެ 50 ޕަސެންޓް އަދި އެސްޓީއޯ އާއި މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) ގެ 10 ޕަސެންޓް ހިއްސާއާ އެކުގަ އެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާ ގޮތުން މި އަހަރުގެ މިހާތަނަށް 5,876 މީހުން ވަނީ އައިސްފަ އެވެ. މިއީ މިދިޔަ އަހަރު އައި 5,876 މީހުންނާ އަޅާބަލާއިރު 11.5 ޕަސެންޓް އިތުރުވުމެކެވެ.