ބައިނަލްއަގުވާމީ ގޮތުން މިޔަރާއި މަޑީގެ ބާވަތްތައް ހިމާޔަތްކުރުމުގެ މުހިއްމުކަމާއި ގުޅޭގޮތުން 13 ގައުމަކާއެކު ރީޖަނަލް ވަރކްޝޮޕެއް ރާއްޖޭގައި ބާއްވަން ހަމަޖައްސައިފި އެވެ.
މި ވޯކްޝޮޕް އަކީ ދިވެހިރާއްޖެއިން ބައިވެރިވެފައިވާ މުއާހަދާއެއްކަމަށްވާ "ކޮންވެންޝަން އޮން އިންޓަނޭޝަނަލް ޓެރޭޑް އިން އެންޑެންޖާޑް ސްޕީސިސް އޮފް ވައިލްޑް ފައުނާ އެންޑް ފްލޯރާ - ސައިޓީސް" ގެ 18 ވަނަ ކޮންފަރަންސް އޮފް ދަ ޕާޓީސް (ކޮޕް 18) އަށް ތައްޔާރުވުމުގެ ގޮތުން އޭޝިއާ ގައުމުތަކަށް އަމާޒުކޮށްގެން ބާއްވާ ވޯކްޝޮޕް އެކެވެ.
"ޝާކް އެންޑް ރޭއި ކޮންޒަވޭޝަން ވަރކްޝޮޕް" ގެ ނަމުގައި ބާއްވާ މިވަރކްޝޮޕް ބާއްވާނީ މި މަހުގެ 17 އާއި 18ގަ އެވެ. ސައުތު އަދި އީސްޓް އޭޝިއާ ސަރަޙައްދުގެ 13 ގައުމަކުން ބައިވެރިވާ މި ވޯކްޝޮޕްގެ މައިގަނޑު މަގްސަދަކީ ބައިނަލްއަގުވާމީ ގޮތުން މިޔަރާއި މަޑީގެ ބާވަތްތައް ހިމާޔަތްކުރުމުގެ މުހިއްމުކަމާއި ފައިދާތައް ބެލުން ކަމަށް އެންވާރަމަންޓް އިން ބުނެ އެވެ.
އަދި، ކޮޕް 18 ގައި ސައިޓީސް އެޕެންޑިކްސް ދޭއްގައި މިދިރުންތަކުގެ އާ ބާވަތްތައް ހިމެނުމާއި، މިޔަރާއި މަޑީގެ ބައިނަލްއަގުވާމީ ވިޔަފާރިއާއި ބެހޭގޮތުން މަޝްވަރާކުރުން މި ވޯކްޝޮޕްގައި ހިމެނެ އެވެ. އަދި މިދިރުންތައް ހިމާޔަތްކުރުމުގެ މުހިއްމުކަން ބައިނަލްއަގުވާމީގޮތުން ބަލައިގަތުމަށް ވާހަކަ ދެއްކޭނެ ކަމަށްވެސް އެންވާރަމަންޓް އިން ބުނެ އެވެ.