ތ. ދިޔަމިގިލީގެ ބޯޓް ޔާޑުގައި ފޯކް ލިފްޓަކުން ތިރި ކުރަން އުޅުނު ދަގަނޑު ފިލައެއް އެތަނުގައި މަސައްކަތް ކުރާ މުވައްޒަފެއްގެ މައި މައްޗަށް ވެއްޓި ފައިގެ ބައެއް އިގިލިތަށް ބުރިވެފައިވާ ކަމަށް ފުލުހުން ބުނެފި އެވެ.
ފުލުހުން ބުނީ މިއަދު ހެނދުނު 9:15 ހާއިރު ހިގި އެހާދިސާގައި އަނިޔާވީ 36 އަހަރުގެ ދިވެހި ފިރިހެނަކަށް ކަމަށެވެ. އަދި ބުރިވެފައިވަނީ އެބޯޓު ޔާޑުގައި މަސައްކަތް ކުރާ މުވާޒިފެއްގެ ކަނާތުފައިގެ އިގިލިތަށް ކަމަށް ފުލުހުން ބުންޏެވެ.
ފުލުހުން އިތުރަށް މައުލޫމާތު ދެމުން ބުނީ އެމީހާ މިހާރު ތ. އަތޮޅު ހޮސްޕިޓަލަށް ގެންދިޔުމަށް މަސައްކަތް ކުރަމުންދާ ކަމަށެވެ. މިހާރު މިމައްސަލަ ފުލުހުން ތަހުގީގު ކުރަމުންދާ ކަމަށްވެސް ވަނީ ބުނެފަ އެވެ.
މިފަހަކަށް އައިސް އިމާރާތް ކުރާ ތަންތަނުގައި ހިގަމުންދާ ތަފާތު ހާދިސާތަކުގައި މީހުނަށް ދަނީ އެކިވަރުގެ އަނިޔާ ވަމުންނެވެ. އެހެން ނަމަވެސް މިއީ ބޯޓު ޔާޑެއްގައި ހިގި މިފަދަ ފުރަތަމަ ބޮޑު ހާދިސާ އެވެ. މިދިޔަސް މަސްތެރޭ ބޯޓު ބަނުމުގެ މަސައްކަތް ކުރާ ހަރުގެއްގައި ޖަހާފައިވާ ކަރަންޓް ދަންތުރައެއްގައި ޖެހި ގއ. ވިލިގިލިން ވަނީ މީހަކު މަރުވެފަ އެވެ. މިމައްސަލަ ވެސް ފުލުހުން ދަނީ ތަހުގީގު ކުރަމުންނެވެ.