ކުރީގެ ނައިބު ރައީސް އަހުމަދު އަދީބުއާ ދެކޮޅަށް ޕްރޮސިކިއުޓާ ޖެނަރަލްގެ އޮފީހުން ދައުވާ އުފުލައި ކުރިމިނަލް ކޯޓަށް ފޮނުވާފައިވާ ހުރިހާ މައްސަލައެއް އަނބުރާ ފޮނުވާލަން ނިންމައިފި އެވެ.
"އަވަސް" އަށް އެނގިފައިވާ ގޮތުގައި ކުރިމިނަލް ކޯޓުން އެގޮތަށް ނިންމީ އެ ކޯޓުގެ ފަނޑިޔާރުންގެ މަޖިލީހުގެ ބައްދަލުވުމުގައި މިދިޔަ ބުދަ ދުވަހު އެވެ. އަދީބުގެ ހުރިހާ މައްސަލައެއް އަނބުރާ ފޮނުވާލުމަށް ހުށަހެޅުއްވީ ކޯޓުގެ އިސް ގާޒީ އަހުމަދު ހައިލަމެވެ.
އެނގިފައިވާ ގޮތުގައި ފަނޑިޔާރުންގެ މަޖިލިސް ބޭއްވީ، އިސް ގާޒީ ހައިލަމް އެ މައްސަލަތައް އަނބުރާ ފޮނުވާލުމަށް ކޯޓުގެ ރަޖިސްޓްރާއަށް އެންގުމުން، އެކަމަށް ރަޖިސްޓްރާ ދެކޮޅު ހެދުމުންނެވެ. ފަނޑިޔާރުންގެ މަޖިލީހުގައި އެންމެ ގާޒީއަކު ފިޔަވައި ދެން އެހެން ހުރިހާ ގާޒީއިން އެއްބަަސްވީ މައްސަލަތައް އަނބުރާ ފޮނުވާލުމަށެވެ. އެއީ އޭރުގެ ތަހުގީގުތައް ގޯސްކޮށް ކަމަށް ދެކޭތީ އެވެ.
ފަނޑިޔާރުންގެ މަޖިލީހުގައި އަދީބުގެ ހުރިހާ މައްސަލަތައް އަނބުރާ ފޮނުވާލުމަށް ދެކޮޅު ހެއްދެވީ ގާޒީ އަލީ ރަޝީދު ކަމަށް މައުލޫމާތު ލިބެ އެވެ. ނަމަވެސް މިކަމާ ގުޅިގެން ކުރިމިނަލް ކޯޓާއި ޕްރޮސިކިއުޓާ ޖެނަރަލްގެ އޮފީހުގެ ރަސްމީ ބަހެއް އަދި ނުލިބެ އެވެ.
އަނބުރާ ޕްރޮސިކިއުޓާ ޖެނަރަލްގެ އޮފީހަށް ފޮނުވާލި މައްސަލަތަކުގެ ތެރޭގައި ހައިކޯޓުން ކުރިމިނަލް ކޯޓަށް އަލުން ބަލަން އެންގި ދެ މައްސަލަ ވެސް ހިމެނެ އެވެ. އެއީ ފިނިފެންމާ ލޯންޗުކޮޅު ގޮއްވާލި މައްސަލަ އާއި މާބިންހުރާ ކޮރަޕްޝަންގެ މައްސަލަ އެވެ. އެ ދެ މައްސަލައަކީ ވެސް ސިޔާސީ ނުފޫޒުތައް ވަދެފައިވާ ދެ މައްސަލަ ކަމަށް ހައިކޯޓުން ކަނޑައަޅައި، އެ މައްސަލާގެ ޝަރީއަތް އަލުން ހިންގުމަށް ކުރިމިނަލް ކޯޓަށް ހައިކޯޓުން އޮތީ އަންގާފަ އެވެ.
އެ ދެ މައްސަލާގައި އަދީބުގެ މައްޗަށް ޖުމްލަ 23 އަހަރުގެ ޖަލު ހުކުމެއް އޮތެވެ.
ދެން އަނބުރާ ފޮނުވާލާފައިވަނީ އެމްއެމްޕީއާރްސީގެ ބޮޑު ހިޔާނާތުގެ ހިމެނޭ 10 ރަށެއްގެ ހިޔާނާތާ ގުޅިގެން އަދީބުގެ މައްޗަށް އުފުލާފައިވާ 10 ދައުވާ އެވެ. އެ 10 ދައުވާއަކީ ފުލުހުން ހިންގި ތަހުގީގަށްފަހު އުފުލާފައިވާ ދައުވާތަކެކެވެ. އެ މައްސަލާގެ އިޖުރާއީ އަޑުއެހުންތައް ވެސް ކުރިމިނަލް ކޯޓުގައި ކުރިއަށް ގެންދިޔަ އެވެ.
އަދީބުގެ ޖަލު ހުކުމްތައް ބާތިލްކޮށްފައިވީ ނަމަވެސް އޭނާ އަދިވެސް ހުންނެވީ ބަންދުގަ އެވެ. އޭނާގެ މައްޗަށް މިހާރު އޮތް ހަމައެކަނި ހުކުމަކީ ކުރިމިނަލް ކޯޓުގެ ހުރުމަތް ކަނޑައިގެން އިއްވި 15 ދުވަހުގެ ޖަލު ހުކުމް އެކަންޏެވެ.