ބިދޭސީ ފާމަސިސްޓަކަށް ތޫނު އެއްޗަކުން ބިރު ދައްކައި އޭނާ މަސަކަތް ކުރާ ފާމަސީން ސިރިންޖު ތަކެއް ފޭރިގެންފި އެވެ.
ފުލުހުން ބުނީ އދ. މަހިބަދޫގެ ފާމަސީއެއްގައި މަސައްކަތް ކުރަމުން އައި ބިދޭސީ ފާމަސިސްޓަކަށް ރޭ ބިރު ދައްކާފައިވާ ކަމަށާއި ރޭގެ އެ ހާދިސާގައި ބިދޭސީ އެ މީހާއަށް ތޫނު އެއްޗަކުން ބިރު ދެއްކުމަށްފަހު އެ ފާމަސީން ތިން ސިރިންޖު ފޭރިގެންފައިވާ ކަމަށެވެ.
މި މައްސަލަ އާއި ގުޅިގެން ފުލުހުން ވަނީ އެ ރަށުގެ މަގުމަތީން ހުއްޓުވައި މީހަކު ހައްޔަރު ކޮށްފަ އެވެ. އޭނާ ހައްޔަރުކުރި އިރު ވެސް ހުރީ މަސްތުގެ ހާލަތުގައި ކަމަށް ފުލުހުން ބުންޏެވެ.
މަސްތުވާތަކެތި ބޭނުން ކުރާ މީހުން މަސްތުވުމަށް ވަރަށް ގިނައިން ހަށިގަނޑަށް އިންޖެކްޓްކޮށްގެން މަސްތުވެ އެވެ. މަސްތުވުމަށް މީގެ ކުރިން ވެސް ފާމަސީތަކުން ސިރިންޖް ފޭރުމުގެ ހާދިސާތައް ރާއްޖޭގައި އައިސްފައި ވެއެވެ.
