އޭނާއާ ގުޅޭ ގޮތުން ޖުޑީޝަލް ސާވިސް ކޮމިޝަން (ޖޭއެސްސީ)އިން ބަލަމުންދާ މައްސަލަ ހުޅުވާލައިގެން ކުރިއަށް ގެންދިޔުމަށް ފެމެލީ ކޯޓުގެ އިސް ގާޒީ ހަސަން ސައީދު އެދިވަޑައިގެންފި އެވެ.
ޖޭއެސްސީގައި ހަސަން ސައީދު އެގޮތަށް އެދިވަޑައިގެންފައިވާއިރު މިހާތަނަށް ޖޭއެސްސީގެ އެއްވެސް ބައްދަލުވުމެއް ހުޅުވާލައިގެން ކުރިއަށް ގެންގޮސްފައެއް ނުވެ އެވެ. އަދި އެކަން އެގޮތަށް ކުރާނެ އުސޫލެއް ވެސް ނޯވެ އެވެ.
ގާޒީ ހަސަން ސައީދުގެ މައްސަލައެއް ޖޭއެސްސީއަށް ހުށަހަޅާފައިވާއިރު އެ މައްސަލާގައި އޭނާ ވަނީ ސަސްޕެންޑްކޮށްފަ އެވެ. އޭނާ ސަސްޕެންޑް ކުރުމަށް އިއްޔެ ބޭއްވި ޖޭއެސްސީގެ ބައްދަލުވުމުގައި ނިންމާފައިވަނީ ބައްދަލުވުމުގައި ބައިވެރިވި ނުވަ މެންބަރުންގެ އިއްތިފާގުންނެވެ.
ހަސަން ސައީދާ ދެކޮޅަށް ޖޭއެސްސީއަށް ހުށަހަޅާފައިވާ މައްސަލައަކީ ފެމެލީ ކޯޓުގެ ކައިވެނީގެ ރަޖިސްޓްރާ ވަކި ކުރި މައްސަލާގައި ވަކި ކުރި ރަޖިސްޓްރާ، ގާޒީ ހަސަން ސައީދާ ދެކޮޅަށް ހުށަހަޅާފައިވާ މައްސަލައެކެވެ.
އޭނާ ސަސްޕެންޑް ކުރަން ނިންމި ޖޭއެސްސީގެ ބައްދަލުވުމަކީ އާ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދާއި މަޖިލީހުގެ މެންބަރުންގެ ފަރާތުން ޖޭއެސްސީއަށް ވަޑައިގެން އާ މެންބަރު ހިސާން ހުސެއިން ބައިވެރިވެވަޑައިގެންނެވި ފުރަތަމަ ބައްދަލުވުމެވެ.
އޭނާގެ ވަކީލް ޖޭއެސްސީއަށް ފޮނުވި ސިޓީގައިވާ ގޮތުން އެ މައްސަލަ ރިވިއުކޮށް ދިނުމަށް މިދިޔަ މަހު ފަހުކޮޅު އެދިފައިވާނެ ކަމަށެވެ. އޭނާ ސަސްޕެންޑްކޮށްފައިވަނީ އާ މެންބަރުންނަށް އެކަން އެނގުމެއް ނެތި ކަމަށެވެ. އެހެންވެ ރިވިއު ކުރުމުގެ މައްސަލަ އަލުން އެޖެންޑާކޮށް ދިނުމަށް އެދިފައިވެ އެވެ.
ސިޓީގައި އިތުރަށް ބުނެފައިވަނީ ހަސަން ސައީދަކީ އަބަދުވެސް ކޮރަޕްޝަނާ ދެކޮޅަށް މަސައްކަތް ކުރައްވާ ބޭފުޅެއް ކަމަށާއި ފަނޑިޔާރު ކަމުގައި ހޭދަވި 10 އަހަރު ވެސް ސުލޫކީ މައްސަލައެއް ނެތް ކަމަށެވެ.
މީގެކުރިން ވެސް ވަނީ ހަސަން ސައީދު ޖޭއެސްސީއިން އޭނާ ސަސްޕެންޑް ކުރި އެވެ. އެއީ ހައި ކޯޓަށް އައްޔަން ކުރި ދެ ފަނޑިިޔާރަކީ ކޮރަޕްޓް ބައެއް ކަމަށް އޭނާ ވިދާޅުވި ކަމަށް ބުނެ އެވެ. އެ މައްސަލާގައި އޭނާ ޖޭއެސްސީ ގޮވައިގެން ސިވިލް ކޯޓަށް ވެސް ވަޑައިގަތެވެ. ނަމަވެސް ފަހުން ވަނީ ދައުވާ އަނބުރާ ގެންދަވާފަ އެވެ. ގިނަ ދުވަސްތަކަކަށްފަހު އޭނާ ސަސްޕެންޝަން އުވާލީ ވެސް ވަރަށް ފަހުންނެވެ.